ភ្នំពេញ៖ អគ្គស្នងការនគរបាលជាតិ បានដាក់បទបញ្ជាឱ្យសមត្ថកិច្ចតាមដាន និងទប់ស្កាត់បទល្មើសក្រុមឧទ្ទាមក្រៅច្បាប់ ដែលនៅតែប៉ុនប៉ងផ្តួលរំលំរាជរដ្ឋាភិបាលស្របច្បាប់ តាមរយៈ ពង្រឹងការងារឱ្យបានច្បាស់លាស់តាំងពីថ្នាក់លើរហូតដល់ថ្នាក់មូលដ្ឋាន។
ក្នុងពិធីសម្ពោធអគារអធិការខណ្ឌនិងសមិទ្ធផលនានាមួយចំនួនទៀតនៅក្នុងខណ្ឌដូនពេញ នាព្រឹកថ្ងៃទី៨ ខែតុលានេះ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការដ្ឋាននគរបាលជាតិ បានមានប្រសាសន៍ថា កងកម្លាំងទាំងអស់ត្រូវត្រៀមខ្លួនជានិច្ច ចំពោះក្រុមឧទ្ទាមដែលជាចំណុចដ៏ធំ ព្រោះមកដល់ពេលនេះក្រុមឧទ្ទាម ពួកក្បត់ជាតិ ឧក្រិដ្ឋជន មិនបោះបង់ចោលឧបាយកលរបស់ពួកគេនៅទេ ហើយនៅតែបន្តបំផ្លាញរាជរដ្ឋាភិបាលស្របច្បាប់ ដែលកើតចេញពីការបោះឆ្នោត ។
ឯកឧត្តម បានបន្តថា កម្លាំងសមត្ថកិច្ចទាំងអស់មិនត្រូវធ្វេសប្រហែសបានឡើយ ដោយត្រូវគោរពតាមបទបញ្ជាឱ្យបានម៉ឺងម៉ាត់ ដើម្បីការពារសេចក្តីសុខរបស់ប្រជាពលរដ្ឋជាង១៦លាននាក់ ដោយកុំឱ្យអ្នកណាមកបំផ្លាញសេចក្តីសុខ សុខសន្តិភាពរបស់យើងនោះទេ ។ យើងត្រូវមានមោទនភាពយើងត្រូវការពារឱ្យបានដាច់ខាត អ៊ីចឹងព្យាករណ៍ទី១ ឧបាយកលពួកអមិត្ត ឧបាយកលពួកឧទ្ទាម មិនបោះបង់ចោលការបំផ្លាញយើងនោះទេ ត្រូវចាំត្រូវប្រឹងប្រែងរួមគ្នា ហើយកិច្ចការធ្វើកន្លងហើយគណៈបញ្ជការឯកភាពភ្នំពេញ ជាមួយខ្ញុំ ជាមួយឯកឧត្តម សៅ សុខា គឺសហការគ្នាបានល្អណាស់ ជាបទពិសោធរបស់យើងយើងត្រូវពង្រឹងបន្តទៀតគ្រប់សមត្ថកិច្ចទាំងអស់ ។ ហើយសូមអរគុណនិងសូមផ្តាំផ្ញើពិសេស អស់លោកលោកស្រីជាអភិបាលខណ្ឌទាំងអស់ សូមជួយជ្រោមជ្រែងដឹកនាំកងកម្លាំង បញ្ជការពារថែមទៀត ។
ឯកឧត្តម ឃួង ស្រេង អភិបាលរាជធានីភ្នំពេញ បានមានប្រសាសន៍ដែរថា ពួកប្រឆាំងនិងពួកឧទ្ទាមក្រៅច្បាប់នៅតែបន្តសកម្មភាព ប៉ុនប៉ងបង្កភាពចលាចលក្នុងសង្គម និងរៀបចំធ្វើរដ្ឋប្រហារ ប៉ុនប៉ងផ្ដួលរំលំរាជរដ្ឋាភិបាលស្របច្បាប់ និងរាជានិមយនៅកម្ពុជា តាមរយៈការប្រើប្រាស់សិទ្ធិដោយបំពានហួសព្រំដែនសេរីភាពសាធារណៈ ។
ឯកឧត្តម បានឱ្យដឹងថា សកម្មភាពប៉ុនប៉ងបង្កភាពចលាចលក្នុងសង្គមទាំងនោះ មានដូចជា ការយកបញ្ហាកម្មករ កម្មការិនី បញ្ហាព្រំដែន និងគម្រោងអភិវឌ្ឍន៍នានា ដើម្បីមកបំភ័ន្តនូវសាធារណៈមតិ ការលើកយកបញ្ហាការចាប់ខ្លួនអ្នកនយោបាយអតីតគណបក្សប្រឆាំង ការបង្កើតសកម្មភាពប្រមូលផ្តុំគ្នាតវ៉ា និងការដាក់ញត្តិនៅតាមស្ថានទូតនានា ក្នុងចេតនាបង្កើតឱ្យមានការប៉ះទង្គិច រវាងក្រុមបាតុករនិងអាជ្ញាធរសាធារណៈ ។
ឯកឧត្តមបានបញ្ជាក់ថា ទោះបី រាជធានីភ្នំពេញជួបប្រទះបញ្ហាស្មុគស្មាញជាបន្តបន្ទាប់យ៉ាងណាក្តី ប៉ុន្តែជាសំណាងខ្ពស់យើងមាននគរបាល ពលនគរបាល កងកម្លាំងប្រដាប់អាវុធគ្រប់ប្រភេទដ៏ស្មោះត្រង់ មានស្មារតី ឆន្ទះស្នេហាជាតិ នឹងមានមគ្គុទេសន៍ដឹកនាំដល់ឆ្នើម គឺ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានទប់ស្កាត់បញ្ហាប្រឈមនានាបានយ៉ាងមានសិទ្ធភាព មិនឱ្យក្រុមអមិត្តបំផ្លាញសុខសន្តិភាព និងសេចក្តីសុខរបស់ប្រជាពលរដ្ឋបានឡើយ។
យោងតាមរបាយការណ៍របស់ស្នងការរាជធានីភ្នំពេញឱ្យដឹងថា ក្នុងរយះពេល៩ខែ ឆ្នាំ២០២០នេះ រាជធានីភ្នំពេញ មានដូចជា បាតុកម្មឬកូដកម្មចំនួន ៥៣លើក បទល្មើសកើតឡើង៦៦លើក ថយចុះ២១លើកស្មើនឹង ៣១ភាគរយ បទឧក្រិដ្ឋមាន១២លើក កើនឡើង៩លើក ប្លន់៤លើក ឃាតកម្ម៥លើក ជំរិតទាប្រាក់១លើក រំលោភ២លើក និងលួច១១លើក៕ដោយ៖កូឡាប
