ភ្នំពេញ៖ ឯកឧត្តម រដ្ឋមន្ត្រីក្រសួងសាធារណការ បានថ្លែងថា ប្រទេសចិនបានផ្ដល់ជំនួយឥតសំណង ព្រមទាំងហិរញ្ញប្បទានដ៏ច្រើនសន្ធឹកសន្ធាប់សម្រាប់ការស្ដារ និងអភិវឌ្ឍហេដ្ឋារចនាសម្ព័ន្ធសំខាន់ៗ និងមានសក្ដានុពលជាច្រើន ក្នុងទិសដៅជំរុញកំណើនសេដ្ឋកិច្ច និងអភិវឌ្ឍកម្ពុជា។
ថ្ងៃព្រហស្បតិ៍ទី១៥ ខែតុលា ឆ្នាំ២០២០ តាមការអញ្ជើញរបស់លេខាធិការដ្ឋានរបស់កិច្ចសហប្រតិបត្តិការសេដ្ឋកិច្ចឈូងសមុទ្រ Pan-Beibu ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញចូលរួមថ្លែងសុន្ទរកថាតាមវីដេអូ នៅក្នុងវេទិកាសហប្រតិបត្តិការសេដ្ឋកិច្ចឈូងសមុទ្រ Pan-Beibu លើកទី១១ និងសន្និសីទកិច្ចសហប្រតិបត្តិការកំពង់ផែនៃសាធារណរដ្ឋប្រជាមានិតចិន និងអាស៊ានឆ្នាំ២០២០ ដែលប្រារព្ធធ្វើឡើងនៅទីក្រុងណាននីង ខេត្វក្វាងស៊ី សាធារណរដ្ឋប្រជាមានិតចិន។
ថ្លែងទៅកាន់វេទិកានាឱកាសនោះ ឯកឧត្តមទេសរដ្ឋមន្ត្រី បានថ្លែងអំណរគុណ និងវាយតម្លៃខ្ពស់ចំពោះប្រទេសចិនដែលបានផ្ដល់ជំនួយឥតសំណង ព្រមទាំងហិរញ្ញប្បទានដ៏ច្រើនសន្ធឹកសន្ធាប់សម្រាប់ការស្ដារ និងអភិវឌ្ឍហេដ្ឋារចនាសម្ព័ន្ធសំខាន់ៗ និងមានសក្ដានុពលជាច្រើន ក្នុងទិសដៅជំរុញកំណើនសេដ្ឋកិច្ច និងអភិវឌ្ឍកម្ពុជា។
ឯកឧត្តមទេសរដ្ឋមន្ត្រីក៏បានលើកឡើងថា វេទិកា និងសន្និសីទកំពង់ផែនេះ គឺជាយន្តការមួយសម្រាប់កសាងនូវបណ្តាញ និងពង្រឹងនូវកិច្ចសហប្រតិបត្តិការនៅក្រោមភាពជាដៃគូយុទ្ធសាស្ត្ររវាងអាស៊ាននិងចិន ដើម្បីទាញយកផលប្រយោជន៍ពីតំបន់ពាណិជ្ជកម្មសេរីរវាងអាស៊ាន និងចិន និងកិច្ចព្រមព្រៀងទ្វេភាគី។
ជាងនេះទៅទៀត ឯកឧត្តមទេសរដ្ឋមន្ត្រី បានគូសបញ្ជាក់ថា នេះមិនមែនជាពេលដែលចោទទម្លាក់កំហុសដាក់គ្នាទៅវិញទៅមកទេ គឺជាពេលដែលពិភពលោកត្រូវរួបរួមគ្នាក្នុងការប្រយុទ្ធប្រឆាំងនឹងការរាតត្បាតនូវជំងឺកូវីដ១៩ និងពង្រឹងពង្រីកនូវកិច្ចសហប្រតិបត្តិការរវាងគ្នា ដើម្បីជំរុញនូវកំណើនសេដ្ឋកិច្ចពិភពលោក និងជៀសវាងឱ្យបាននូវការវិលត្រឡប់ទៅរកការដាក់នូវរបាំង ឬវិធានការនានា ដែលរិតត្បិតដល់ការធ្វើពាណិជ្ជកម្មអន្តរជាតិដោយសេរី៕ដោយ៖បញ្ញាស័ក្តិ