បាត់ដំបង៖ បច្ចុប្បន្ន ជំនន់ទឹកភ្លៀងបានកំពុងវាយទុកទៅលើបណ្តាខេត្ត និងក្រុងជាច្រើននៅទូទាំងប្រទេសកម្ពុជា ដែលបង្កឲ្យស្រុកភូមិមួយចំនួនធំ ត្រូវទឹកជន់លិច ក្នុងនោះផ្ទះសម្បែងប្រជាពលរដ្ឋ និងផ្លូវថ្នល់ត្រូវរងការខូចខាតយ៉ាងដំណំ ដែលធ្វើឲ្យបងប្អូនពិបាកក្នុងការរស់នៅ និងការធ្វើដំណើរយ៉ាងខ្លាំង។ ជាក់ស្តែងកាលពីពេលថ្មីៗនេះ ក៏មានហេតុការណ៍ដ៏រន្ធត់មួយ បានធ្វើឲ្យស្ត្រីម្នាក់បាត់បង់ជីវិតដ៏គួរឲ្យអាសូរបំផុត ដោយសារជិះម៉ូតូធ្លាក់លូ ខណៈមេឃកំពុងធ្លាក់ភ្លៀងខ្លាំង នៅវេលាម៉ោងជាង ៦ ល្ងាចថ្ងៃទី១៣ ខែតុលា ឆ្នាំ ២០២០ ស្ថិតនៅសង្កាត់បឹងទំពុន២ ខណ្ឌមានជ័យ រាជធានីភ្នំពេញ។
ដោយឡែក នៅយប់មិញថ្ងៃដដែលនោះផងដែរ ក៏កើតមានហេតុការណ៍ដ៏គួរឲ្យរន្ធត់មួយទៀត ដែលបានកើតឡើងនៅលើផ្លូវជាតិលេខ៥ ត្រង់ចំណុចភូមិស្វាយជ្រុំ ឃុំជ្រៃ ស្រុកថ្មគោល ខេត្តបាត់ដំបង បានធ្វើឲ្យបុរស២នាក់ត្រូវរងរបួសស្រាលទាំងពីរ ដោយសារបើករថយន្ត Lexus 300 ធ្លាក់ចូលជង្ហុកទឹកលិចដ៏ជ្រៅ បណ្តាលឲ្យក្រឡាប់ផ្ងារជើង។
នេះបើយោងតាមគណនីហ្វេសប៊ុកឈ្មោះ Arigafy Lonh បានចែករំលែកពីហេតុការណ៍នេះឲ្យដឹងថា៖ «អ្នកធ្វើដំណើរពីស្រុកថ្មគោលមកក្រុងបាត់ដំបងសូមប្រយ័ត្ន!! ជួយ share អោយបងប្អូនគាត់ឃើញផង! Lexus 300 ធ្លាក់ជង្ហុកបាស់ជើងឡើងលើ នៅលើផ្លូវជាតិលេខ៥ ភូមិស្វាយជ្រុំ ឃុំជ្រៃ ស្រុកថ្មគោល ខេត្តបាត់ដំបង ចំណុចមុខ ហាងលក់គ្រឿងសំណង់ សំណង់ស្វាយជ្រុំ។ បើកបរដោយបុរសពីរនាក់ របួសស្រាលទាំងពីរ។ (ជង្ហុកនោះមានគ្រោះថ្នាក់ច្រើនករណីហើយ តែពុំឃើញមានការជួសជុលនៅឡើយទេ)»។ ហេតុដូច្នេះ សូមបងប្អូនប្រជាពលរដ្ឋមេត្តាបង្កើនការប្រុងប្រយ័ត្នខ្ពស់ទៅលើគ្រោះធម្មជាតិ និងក៏ដូចការធ្វើដំណើរនៅតាមទីកន្លែងផ្សេងៗ ក្នុងរដូវភ្លៀងធ្លាក់នេះ៕ ដោយ៖ លឹមហុង
