ភ្នំពេញ៖ រដ្ឋបាលរាជធានីភ្នំពេញបន្តនាំយកអំណោយមនុស្សធម៌របស់ម្តេចតេជោហ៊ុនសែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិតប៊ុនរ៉ានីហ៊ុនសែន ប្រធានកាកបាទក្រហមកម្ពុជា ទៅចែក ជូនប្រជាពលរដ្ឋចំនួន៣៧៥គ្រួសារ នៅខណ្ឌដង្កោ ដែលកំពុងរងគ្រោះដោយជំនន់ទឹកស្ទឹងព្រែកត្នោត ដើម្បីជួយសម្រាលបន្ទុកជីវភាពប្រចាំថ្ងៃរបស់ពួកគាត់។
ឯកឧត្តម ឃួង ស្រេង អភិបាលរាជធានីភ្នំពេញបានមានប្រសាសន៍ថា ក្រោមការដឹកនាំនិងបញ្ជាផ្ទាល់ពីសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាគឺបានណែនាំនឹងជំរុញឱ្យកងកម្លាំងទាំងអស់ ធ្វើយ៉ាងណាសង្គ្រោះប្រជាពលរដ្ឋរងគ្រោះនិងងាយរងគ្រោះ ឱ្យមកកាន់ទីទួលសុវត្ថិភាពបានទាន់ពេលវេលា ។ ឯកឧត្តមបានបញ្ជាក់ថា នៅពេលដែលបានជម្លៀសជម្លៀសប្រជាពលរដ្ឋមកកាន់ទីទួលសុវត្ថិភាពបានដោយជោគជ័យហើយ អាជ្ញាធរ និងរាជរដ្ឋាភិបាល នៅតែបន្តគិត គូរពីសុខទុក្ខរបស់ប្រជាពលរដ្ឋរងគ្រោះបន្តទៀត ដូចជាការផ្តល់អំណោយមនុស្សធម៌ ជាមួយនឹងការចែកអាហារហូបចុកគ្រប់គ្រាន់ ខណៈដែលការសង្គ្រោះប្រជាពលរដ្ឋនេះ គឺធ្វើឡើងដោយមិនគិតពីនិន្នាការនយោបាយឬគណបក្សណានោះឡើយ ពោល ឱ្យតែប្រជាពលរដ្ឋដែលទទួលរងគ្រោះគឺជួយទាំងអស់ ជាមួយនឹងការផ្ដល់អំណោយជូនពួកគាត់ផងដែរ ។
អភិបាលរាជធានីភ្នំពេញ បានបញ្ជាក់ថា៖ «ស្ថិតនៅក្នុងស្ថានភាពមហន្តរាយនេះ កងកម្លាំងចម្រុះនិងអាជ្ញាធរមូលដ្ឋានគ្រប់លំដាប់ថ្នាក់ ក្រោមការចង្អុលបង្ហាញជាប់ជាប្រចាំរបស់សម្ដេចតេជោនាយករដ្ឋមន្ត្រី បានមានម្ចាស់ការខ្ពស់សហការរួមគ្នាដោយធ្វើការសង្គ្រោះទាន់ពេលវេលា ដោយជម្លៀសបងប្អូនប្រជាពលរដ្ឋចេញពីតំបន់ដែលរងគ្រោះទៅកាន់ទីទួលសុវត្ថិភាព និងបានផ្គត់ផ្គង់ម្ហូបអាហារ ទឹកសុទ្ធ បង្គន់អនាម័យ និងទីកន្លែងស្នាក់នៅបណ្ដោះអាសន្នសមរម្យ ពោល គឺពុំមានអ្នកណាម្នាក់ត្រូវរងគ្រោះបាត់បង់ជីវិតនៅឡើយ» ។
ឯកឧត្តម Wang Wentian ឯកអគ្គរដ្ឋទូតចិនប្រចាំកម្ពុជា បានអញ្ជើញចូលរួមសកម្មភាពផ្ដល់អំណោយជាសម្ភារៈចាំបាច់ប្រចាំថ្ងៃរបស់ស្ថានទូតចិនជូនចំពោះប្រជាពលរដ្ឋរងគ្រោះដោយសារទឹកជំនន់ក្នុងខណ្ឌដង្កោរាជធានីភ្នំពេញ និងព្រមទាំងបានចុះត្រួតពិនិត្យស្ថានភាពទឹកជំនន់ក្នុងតំបន់។ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ និងមន្ត្រីជាច្រើនរូបទៀតអញ្ជើញមានវត្តមានក្នុងពិធីខាងលើ។
ឯកឧត្តម ឯកអគ្គរដ្ឋទូតចិន បានតំណាងឲ្យស្ថានទូតចិនប្រចាំកម្ពុជា សម្តែងការសួរសុខទុក្ខដោយស្មោះជូនចំពោះរាជរដ្ឋាភិបាលនិងប្រជាជនកម្ពុជាដែលទទួលរងគ្រោះមហន្តរាយមួយនេះ។ ឯកឧត្តមមានប្រសាសន៍ថា ចិននិងកម្ពុជា ជាបងប្អូនល្អដែលជួយគ្នាទៅវិញទៅមក និងរួមសុខរួមទុក្ខជាមួយគ្នា ភាគីចិនមានអារម្មណ៍ដូចគ្នាចំពោះគ្រោះមហន្តរាយដែលកម្ពុជាកំពុងជួបប្រទះយ៉ាងធ្ងន់ធ្ងរនេះ និងរីករាយរួមចំណែកជាកម្លាំងយ៉ាងសកម្មក្នុងការទប់ស្កាត់និងជួយសង្គ្រោះក្នុងគ្រោះទឹកជំនន់មួយនេះ។ គ្រប់ស្ថាប័ន និងសហគ្រាសចិនក្នុងប្រទេសកម្ពុជា បានចូលរួមយ៉ាងសកម្មក្នុងកិច្ចការងារជួយសង្គ្រោះគ្រោះមហន្តរាយទឹកជំនន់ក្នុងតំបន់។ ក៏សង្ឃឹមថា សម្ភារៈចាំបាច់ដែលផ្តល់ជូនដោយស្ថានទូតចិនលើកនេះ អាចជួយដល់អ្នកទាំងអស់គ្នាក្នុងការឆ្លងនូវទុក្ខលំបាកមួយនេះ។ យើងជឿជាក់ថា ស្ថិតក្រោមម្លប់ដ៏ត្រជាក់ត្រជំរបស់ព្រះករុណាព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និងស្ថិតក្រោមការដឹកនាំដ៏រឹងមាំរបស់សម្ដេចតេជោនាយករដ្ឋមន្ត្រី និងរាជរដ្ឋាភិបាលគណបក្សប្រជាជនកម្ពុជា ប្រជាពលរដ្ឋកម្ពុជាប្រាកដជាទទួលបានជ័យជម្នះលើការប្រយុទ្ធប្រឆាំងនិងកិច្ចជួយសង្គ្រោះក្នុងគ្រោះទឹកជំនន់លើកនេះយ៉ាងឆាប់រហ័សមិនខាន។
ឯកឧត្តម ឯកអគ្គរដ្ឋទូតចិនបានសង្កត់ធ្ងន់ថា ឯកឧត្តម Wang Yi ទីប្រឹក្សារដ្ឋ រដ្ឋមន្ត្រីក្រសួងការបរទេសនៃចិន បានបំពេញទស្សនកិច្ចក្នុងប្រទេសកម្ពុជាយ៉ាងជោគជ័យក្នុងពេលថ្មីៗនេះ ចិននិងកម្ពុជាកំពុងខិតខំរួមគ្នាអនុវត្តសមិទ្ធផលនៃដំណើរទស្សនកិច្ចនេះ ដើម្បីជាកម្លាំងជំរុញសម្រាប់ប្រទេសកម្ពុជាក្នុងកិច្ចការពន្លឿនស្តារជាថ្មីនៃសេដ្ឋកិច្ចដែលរងផលប៉ះពាល់ដោយជំងឺកូវីដ-១៩និងគ្រោះទឹកជំនន់នេះ រួមគ្នាកសាងសហគមន៍ជោគវាសនារួមរវាងចិននិងកម្ពុជាឲ្យកាន់តែស្អិតរមួត។
ឯកឧត្តម ហ៊ុន ម៉ានី សមាជិករដ្ឋសភា និងជាប្រធានគណៈកម្មការ អប់រំ យុវជន កីឡា ធម្មការ កិច្ចការសាសនា វប្បធម៌និងទេសចរណ៍នៃរដ្ឋសភាព បានវាយតម្លៃខ្ពស់ចំពោះកិច្ចខិតខំប្រឹងប្រែង របស់ ឯកឧត្តមឃួង ស្រេងអភិបាលរាជធានីភ្នំពេញ ដែលបានដឹកនាំកម្លាំងសរុប មធ្យោបាយសរុប ក្នុងការជួយ សង្គ្រោះប្រជាពលរដ្ឋបានទាន់ពេលវេលាមកកាន់ទីទួលសុវត្ថិភាព ដែលធានាឱ្យប្រជាពលរដ្ឋមាន សុវត្ថិភាព និងរស់នៅសមរម្យនៅតំបន់ទីទួលសុវត្ថិភាព។
ក្នុងឱកាសនោះដែរ ឯកឧត្តមក៏បានផ្តាំផ្ញើរសូមបងប្អូនដែលកំពុងជួបប្រទះនូវគ្រោះទឹកជំនន់ទឹកភ្លៀង ត្រូវគិតគូរពីបញ្ហាសុវត្ថិភាព និងបង្កើនការប្រុងប្រយ័ត្នពីគ្រោះថ្នាក់ដែលបង្កឡើងដោយទឹកជំនន់ ជាពិសេសកុមារដែលងាយប្រឈមនឹងគ្រោះថ្នាក់នេះ សំខាន់ត្រូវគិតគូរថែទាំសុខភាពឱ្យបានល្អ រក្សាអនាម័យស្អាត បរិភោគទឹកដាំឆ្អិនឬអាហារដែលចម្អិនបានល្អ ចៀសវាងជំងឺរាតត្បាតនានាដែលបង្កឡើងដោយទឹក និងប្រុងប្រយ័ត្នពីសត្វអាសិរពិសគ្រប់ប្រភេទ។
ឯកឧត្តម ហ៊ុន ម៉ានី បានថ្លែងអំណរគុណយ៉ាងជ្រាលជ្រៅចំពោះដំណើរចុះសួរសុខទុក្ខដោយផ្ទាល់របស់ឯកឧត្តមឯកអគ្គរដ្ឋទូតចិន ជូនចំពោះប្រជាពលរដ្ឋរងគ្រោះទឹកជំនន់ខាងលើ។ ឯកឧត្តមបានលើកឡើងថា កម្ពុជានិងចិន គឺជាប្រទេសជិតខាងដែលមានភាពជិតស្និទ្ធនិងរួសរាយរាក់ទាក់។ រយៈពេលយូរមកហើយ ប្រទេសចិនតែងផ្តល់ជំនួយដ៏មានតម្លៃជាច្រើន ដែលបានជំរុញយ៉ាងខ្លាំងដល់ការអភិវឌ្ឍសេដ្ឋកិច្ចនិងសង្គមក្នុងប្រទេសកម្ពុជា។ សម្ភារៈដែលផ្តល់ដោយស្ថានទូតចិននាលើកនេះនឹងជួយកាត់បន្ថយភាពលំបាកក្នុងជីវភាពរស់នៅរបស់ប្រជាពលរដ្ឋដែលរងគ្រោះទឹកជំនន់ក្នុងតំបន់ និងជួយបង្កើនទំនុកចិត្តក្នុងការកសាងគេហដ្ឋានរបស់ពួកគាត់សាជាថ្មីផងដែរ៕ ដោយ៖បញ្ញាស័ក្តិ
