ព្រះសីហនុ៖ ឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ និងជាប្រធានគណៈបញ្ជាការឯកភាពរដ្ឋបាលខេត្ត នៅល្ងាចថ្ងៃទី២១ ខែតុលា ឆ្នាំ២០២០ បានដឹកនាំបញ្ជាផ្ទាល់ ក្នុងប្រតិបត្តិការស្វែងរកក្មេងស្រីម្នាក់ ដែលបានរអិលជើងធ្លាក់ចូលទៅក្នុងល្បាក់ទឹក នៃតំបន់រមណីយដ្ឋានទឹកធ្លាក់ក្បាលឆាយ ស្ថិតនៅសង្កាត់១ ក្រុងព្រះសីហនុ ខេត្តព្រះសីហនុ។
សូមបញ្ជាក់ថា ប្រតិបត្តិការស្វែងរកក្មេងស្រីខាងលើ គឺធ្វើឡើងនៅវេលាម៉ោង២រសៀល បន្ទាប់ពីទទួលបានព័ត៌មានភ្លាមៗពីក្រុមគ្រួសារក្មេងស្រីរងគ្រោះ ដោយធ្វើប្រាស់កម្លាំងសរុបរបស់ខេត្ត ធ្វើការរុករកនៅលើទីតាំងដែលក្មេងស្រីខាងលើរអិលជើងធ្លាក់ចូល និងទីតាំងផ្សេងទៀត រហូតដល់ម៉ោងជាង៦ល្ងាច នៅតែមិនទាន់រកឃើញ។
តាមការសន្និដ្ឋានរបស់មន្ត្រីជំនាញបានលើកឡើងថា ក្មេងស្រីខាងលើគឺស្លាប់បាត់បង់ជីវិតហើយ។ ដោយសារស្ថានភាពយប់ងងឹត និងល្បឿនទឹកធ្លាក់បោកចុះខ្លាំង ទើប ឯកឧត្តមអភិបាលខេត្ត សម្រេចដកកម្លាំងកំពុងធ្វើការរុករកឡើងមកលើគោកវិញ ដើម្បីការពារសុវត្ថិភាពរបស់ក្រុមជួយសង្គ្រោះរបស់យើង។
ទន្ទឹមនេះឯកឧត្តមអភិបាល បានដាក់ចេញនូវផែនការស្វែងរកក្មេងស្រីរងគ្រោះនៅព្រឹកស្អែកបន្តទៀត ដោយឯកឧត្តម បានមានប្រសាសន៍បន្ថែមថា៖ «ទោះបីក្មេងស្រីខាងលើស្លាប់បាត់ជីវិតក៏ដោយ ក៏យើងត្រូវស្វែងរកសាកសពឱ្យឃើញដែរ»៕ដោយ៖បញ្ញាស័ក្តិ
