ភ្នំពេញ៖ មន្ត្រីជាន់ខ្ពស់នៃ ធនាគារ អេស៊ីលីដា ភីអិលស៊ី បានឲ្យដឹងថា បច្ចុប្បន្ននេះវិនិយោគិនចូលរួមជួញដូរភាគហ៊ុនរបស់ធនាគារ អេស៊ីលីដា ជាមធ្យមក្នុងមួយថ្ងៃប្រមាណ២ម៉ឺនហ៊ុន បើគិតជារូបវ័ន្តបុគ្គលក្នុងម្នាក់ៗជួញដូរប្រមាណ២ពាន់ហ៊ុន ហើយបានធ្វើឱ្យសកម្មភាពនៃការជួញដូរមូលបត្រក្នុងផ្សារមូលបត្រកម្ពុជាកាន់តែមានភាពសកម្មជាងពីមុន។
លោកស្រី ម៉ារ អមរ៉ា អនុប្រធាននាយកប្រតិបត្តិ និងជាគណៈប្រធាននាយិកាប្រតិបត្តិហិរញ្ញវត្ថុនៃធនាគារ អេស៊ីលីដា ភីអិលស៊ី បានថ្លែងដូច្នេះនៅក្នុងសិក្ខាសាលាស្ដីពីឱកាសចំណេញក្នុងការវិនិយោគក្នុងវិស័យមូលបត្រ កាលពីព្រឹកថ្ងៃទី ២៤ ខែតុលា ឆ្នាំ២០២០កន្លងទៅនេះ នៅការិយាល័យកណ្ដាលធនាគារ អេស៊ីលីដា ថាធនាគារ អេស៊ីដា។
លោកស្រី ម៉ារ អមរ៉ា នៅតែបន្តស្វាគមន៍ចំពោះសាធារណជន ក្នុងការក្លាយខ្លួនជាម្ចាស់ភាគហ៊ុន ក្នុងធនាគារតាមរយៈការចូលរួមវិនិយោគភាគហ៊ុនក្នុងផ្សារមូលបត្រកម្ពុជា បើទោះបីជាបច្ចុប្បន្នវិនិយោគិនជាច្រើនបានចាប់អារម្មណ៍ និងកំពុងជួញដូរភាគហ៊ុនធនាគារនេះក្នុងផ្សារមូលបត្ររួចហើយក្ដី ។
លោកស្រីបន្ថែមទៀតថា ចាប់តាំងពីធនាគារ អេស៊ីលីដា បានបោះផ្សាយភាគហ៊ុនក្នុងផ្សារមូលបត្រឃើញថា បានជំរុញឱ្យវិនិយោគិនកាន់តែចាប់អារម្មណ៍ និងចូលរួមជួញដូរកាន់តែច្រើន ដែលក្នុងនោះជាង៩០ភាគរយបានជួញដូរភាគហ៊ុនរបស់អេស៊ីលីដា និងបានធ្វើឱ្យតម្លៃភាគហ៊ុនអេស៊ីលីដាបានកើនឡើងមួយកម្រិតបើធៀបនឹងតម្លៃបោះផ្សាយ ។
លោកបណ្ឌិត អ៉ិន ចាន់នី ប្រធាននាយកប្រតិបត្តិធនាគារ អេស៊ីលីដា ភីអិលស៊ី ក៏បានឲ្យដឹងថាដែរថា ទីផ្សារភាគហ៊ុនបច្ចុប្បន្នកំពុងទទួលបានការចាប់អារម្មណ៍ពីសំណាក់សាធារណជន និងវិនិយោគិន ជាពិសេសគឺធនាគារ អេស៊ីលីដា ភីអិលស៊ី ជាក្រុមហ៊ុនចុះបញ្ជីលក់ភាគហ៊ុននៅក្នុងផ្សារមូលបត្រកម្ពុជា ដែលផ្ដល់ឱកាសចំណេញយ៉ាងច្រើន ដល់វិនិយោគិនតាមរយៈការវិនិយោគទៅលើភាគហ៊ុនរបស់ធនាគារ អេស៊ីលីដា ដែលបានដាក់លក់នៅក្នុងផ្សារមូលបត្រកម្ពុជា៕
ដោយ៖CEN
