ភ្នំពេញ៖ នៅថ្ងៃទី២៧ ខែតុលា ឆ្នា២០២០ ស្អែកនេះ សាលាដំបូងរាជធានីភ្នំពេញនឹងបើកសវនាការលើសំណុំរឿងលោក រស់ សុឃិត ចាងហ្វាងកាសែតជាតិខ្មែរ ដែលត្រូវបានចាប់ខ្លួនកាលពីខែមិថុនា ឆ្នាំ២០២០ និងដាក់ឱ្យជាប់ឃុំតាំងពីពេលនោះមក។ នេះបើតាមការផ្សាយព័ត៌មានរបស់មជ្ឈមណ្ឌលសិទ្ធិមនុស្សកម្ពុជា។
លោក រស់ សុឃិត សរសេរអត្ថបទជាច្រើនរិះគន់បញ្ហាសង្គម ដែលកើតមាននៅកម្ពុជា និងធ្វើការផ្សព្វផ្សាយ នៅតាមប្រព័ន្ធផ្សព្វផ្សាយសង្គម។ លោក សុឃិត ជាប់ចោទពីបទ ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម តាមមាត្រា ៤៩៤ និង ៤៩៥ នៃក្រមព្រហ្មទណ្ឌកម្ពុជា។
លោក រស់ សុឃិត ចាងហ្វាងកាសែតជាតិខ្មែរ ត្រូវបានសមត្ថកិច្ចចាប់ខ្លួន នៅថ្ងៃទី២៥ ខែមិថុនា ឆ្នាំ២០២០នេះ តាមដីការបស់តុលាការពាក់ព័ន្ធបទល្មើស ញុះញង់បង្កឱ្យមានភាពវឹងវរធ្ងន់ធ្ងរដល់សន្តិសុខសង្គម។
ការឃាត់ខ្លួននេះ បានធ្វើឡើងបន្ទាប់ពី លោក សៀង ហៀង ព្រះរាជអាជ្ញារងអមសាលាដំបូងរាជធានីភ្នំពេញ បានចេញដីកាមួយ នៅថ្ងៃទី២៤ ខែមិថុនា ឆ្នាំ២០២០ ដោយបង្គាប់ឱ្យ លោក រស់ សុឃិត បង្ហាញខ្លួននៅការិយាល័យប្រឆាំងបទល្មើសបច្ចេកវិទ្យា នៃស្នងការដ្ឋាននគរបាលរាជធានីភ្នំពេញ ឱ្យបានមុនថ្ងៃទី១៣ ខែកក្កដា ឆ្នាំ២០២០ ដើម្បីសាកសួរពីដំណើររឿង ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម៕
ដោយ : បញ្ញាស័ក្តិ
