ភ្នំពេញ៖ លោក និល ណុន ប្រធានក្រុមប្រឹក្សាជំនុំជម្រះនៃតុលាការកំពូល នៅថ្ងៃទី២៧ខែតុលាឆ្នាំ២០២០នេះ បានសម្រេចតម្កល់សេចក្ដីសម្រេចរបស់សាលាសាលាដំបូងរាជធានីភ្នំពេញទុកជាបានការដដែល ពាក់ព័ន្ធនឹងការបើកការស៊ើបអង្កេតសំណុំរឿងរបស់អតីតបុគ្គលិកវិទ្យុអាស៊ីសេរីពីររូប ដោយសម្អាងថា ការឱ្យបើកការស៊ើបអង្កេតវិញនេះ ដើម្បីឱ្យតុលាការស្វែងរកភស្តុតាងបន្ថែម។
កាលពីថ្ងៃទី៣ ខែតុលាឆ្នាំមុន សាលាដំបូងរាជធានីភ្នំពេញ បានសម្រេចឱ្យបើកការស៊ើបអង្កេតឡើងវិញនូវសំណុំរឿងប្រឆាំងអតីតបុគ្គលិកវិទ្យុអាស៊ីសេរី លោក អ៊ួន ឈិន និងលោក យាង សុធារិន្ទ ។ប៉ុន្តែអតីតបុគ្គលវិទ្យុអាស៊ីសេរីទាំង២រូបនេះ បានប្ដឹងទៅតុលាការកំពូលជាបន្តបន្ទាប់ ដោយជំទាស់នឹងសេចក្ដីសម្រេចបែបនេះរបស់សាលាដំបូងរាជធានីភ្នំពេញ។
លោកស្រី ចក់ សុភាព នាយិកាប្រតិបត្តិនៃមជ្ឈមណ្ឌលសិទ្ធិមនុស្សកម្ពុជា( ម.ស.ម.ក) បានលើកឡើងថា
សាលដីកាតុលាការកំពូលតម្កល់សាលដីកាចាត់របៀប (សាលដីកាបង្គាប់ឱ្យមានការស៊ើបអង្កេតបន្ថែម) លើបទចោទប្រគល់ឱ្យរដ្ឋបរទេសនូវព័ត៌មានជាអាទិ៍ ដែលអាចធ្វើឱ្យអន្តរាយការការពារជាតិ ដែលមិនមានភស្តុតាងប្រឆាំងនឹងអតីតអ្នកកាសែតវិទ្យុអាស៊ីសេរី លោក អួន ឈិន និងលោក យាង សុធារិន្ទ គឺជារឿងគួរឱ្យសោកស្ដាយ ហើយ ម.ស.ម.ក មានការខកចិត្តចំពោះការបន្តយាយីតាមផ្លូវតុលាការលើអ្នកទាំងពីរ ដែលនៅមិនទាន់ទទួលបានសេចក្តីសម្រេចជាក់លាក់ណាមួយ អស់រយៈពេលជិតបីឆ្នាំ ចាប់តាំងពីពេលចាប់ខ្លួនពួកគេ តាំងពីដំបូងនៅខែវិច្ឆិកា ឆ្នាំ២០១៧៕ដោយ៖បញ្ញាស័ក្តិ