ភ្នំពេញ៖ អ្នកនាង ទ្រី ដាណា ដែលបច្ចុប្បន្នកំពុងជោគជ័យខ្លាំងលើរបរអនឡាញនិងហាងលក់ពេជ្រ ថ្មីៗនេះអ្នកនាងបានប្រកាសបើកឳកាសឲ្យអ្នកដែលចង់ក្លាយជាតារាចម្រៀងមកប្រឡងនៅក្រុមហ៊ុនខ្លួនផ្ទាល់ និងផ្តល់ប្រាក់រង្វាន់ចំនួន១ម៉ឺនដុល្លារសម្រាប់ជ័យលាភីលេខ១ផងដែរ។
តាមរយៈគណនី TikTok ផ្ទាល់របស់អ្នកនាង ទ្រី ដាណា ទើបបានបង្ហោះកាលពីថ្ងៃម្សិលមិញបានឲ្យដឹងថា អ្នកនាងមានដំណឹងពិសេសមួយសម្រាប់អ្នកដែលចង់ក្លាយជាតារាចម្រៀង ឥលូវនេះអ្នកនាងមកបើកឳកាសហើយ។ ដោយអ្នកនាងនឹងបើកការប្រឡងជាផ្លូវការមួយនៅក្រុមហ៊ុនផ្ទាល់ ដើម្បីជ្រើសរើសតារាចម្រៀងសម្រាប់ឆ្នាំ២០២០ ហើយសម្រាប់ជ័យលាភីលេខ១នឹងទទួលបានប្រាក់រង្វាន់ចំនួន១ម៉ឺនដុល្លារ និងកុងត្រារយៈពេល២ឆ្នាំក្នុងការច្រៀងសម្រាប់ក្រុមហ៊ុនផ្ទាល់ ព្រមជាមួយនិងការជំរុញឲ្យមានភាពល្បីល្បាញផងដែរ។
គួរបញ្ជាក់ថា ក្រៅពីរបរអនឡាញនិងហាងលក់ពេជ្រ អ្នកនាង ទ្រី ដាណា ក៏ទំនងជាស្រឡាញ់នូវវិស័យសិល្បៈចម្រៀងផងដែរ ព្រោះជារឿយៗអ្នកនាងតែងតែថតបទចម្រៀង cover បង្ហោះក្នុងបណ្តាញសង្គម ហើយចុងក្រោយនេះក៏បានប្រកាសបើកការប្រឡងរើសតារាចម្រៀងសម្រាប់ក្រុមហ៊ុនខ្លួនទៀត៕ ដោយ៖ កូលាប ក្រហម
