ភ្នំពេញ៖ យុវជនបីនាក់បើករថយន្តក្នុងល្បឿនលឿន ដល់ផ្លូវកោងបត់មិនប្រយ័ត្នជ្រុលទៅបុករូបបដិមាបណ្ដាលឲ្យក្រឡាប់ផ្ងារជើង ចំណែកឯតៃកុងរងរបួសធ្ងន់បញ្ជូនយកទៅមន្ទីរពេទ្យ។ ហេតុការណ៍នេះដែរកើតឡើងនៅវេលាម៉ោង ១១និង៣០ នាទីយប់ថ្ងៃអង្គារទី៣ ខែវិច្ឆិកាឆ្នាំ ២០២០ ស្ថិតនៅតាមបណ្តោយផ្លូវហាណូយសង្កាត់ឃ្មួញ ខណ្ឌសែនសុខ រាជធានីភ្នំពេញ។
ប្រភពព័ត៌មានពីប្រជាពលរដ្ឋបានឲ្យដឹងថា មុនពេលកើតហេតុគេបានឃើញយុវជន៣នាក់បើករថយន្តម៉ាក range rover ពណ៌ខ្មៅមួយគ្រឿង ដែលពាក់ផ្លាកលេខ ភ្នំពេញ 2-BI 1669 ធ្វើដំណើរក្នុងទិសដៅពីជើង មកត្បូងក្នុងល្បឿនលឿន ខណៈមកដល់ចំណុចកើតហេតុ ផ្លូវកោងមិនប្រយ័ត្នក៏ជ្រុលទៅបុកនិងរូបបដិមាជាច្រើនអង្គ បណ្តាលឲ្យរថយន្តក្រឡាប់ផ្ងារជើង ។ ចំណែកឯនាក់បើកបរថយន្តរងរបួសធ្ងន់។
ក្រោយពេលកើតហេតុសមត្ថកិច្ចមូលដ្ឋាន សហការជាមួយជំនាញចុះមកដល់ធ្វើកំណត់ហេតុ និងវាស់វែងយករថយន្តទៅរក្សាទុក នៅអធិការដ្ឋានខណ្ឌពោធិ៍សែនជ័យ រង់ចាំដោះស្រាយនៅពេលក្រោយ ៕ ដោយ៖ សា មេត
