ភ្នំពេញ៖ មន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានឱ្យដឹងថា រហូតមកដល់ឆ្នាំ២០២០នេះ កម្ពុជា ជារួមមានរោងចក្រចំនួន ១.៨៣១ ក្នុងនោះ គិតត្រឹមខែតុលា ២០២០នេះ មានរោងចក្រកមន្តសាល ៣៩០ បានព្យួរ និងរោងចក្រចំនួន ៩៥ បានបិទទ្វារ ហើយក៏មានរោចក្រកើតថ្មីចំនួន ១៩៦ ផងដែរ។ នៅកម្ពុជា បែងចែក រោងចក្រពីរប្រភេទ គឺប្រភេទទីមួយ ជារោងចក្រធុនតូច មធ្យម និងទីពីរ ជាប្រភេទរោងចក្រធុនធំ។
ស្ថិតក្នុងកាលៈទេសៈប្រទេសកម្ពុជា និងពិភពលោកជួបនឹងវិបត្តិជំងឺឆ្លងកូវីដ-១៩នេះ បើតាមមន្ត្រីជាន់ខ្ពស់នៃក្រសួងឧស្សាហកម្ម បច្ចុប្បន្ននេះ កម្ពុជាមិនពឹងផ្អែកទាំងស្រុងតែទៅលើវិស័យឧស្សាហកម្មកាត់មួយមុខនោះទេ ពោលគឺកម្ពុជាកំពុងធ្វើពិធិធកម្មទៅលើវិស័យឧស្សាហកម្មជាច្រើនផ្សេងទៀត ពិសេសឧស្សាហកម្មដែលពឹងផ្អែកទៅលើបច្ចេកវិទ្យា។
ស្ថិតក្នុងដំណាក់កាលកូវីដ១៩នេះ លោកថា បណ្តារោងចក្រមួយចំនួន បានពង្រីកខ្សែច្រវ៉ាក់ផលិតកម្ម ក្រៅអំពីវិស័យកាត់ដេរ ទៅជាឧស្សាហកម្មដែលបម្រើដល់វិស័យវិជ្ជសាស្ត្រ ដូចជា៖ រោងចក្រដេរម៉ាស់ ដេរសម្លៀកបំពាក់វិជ្ជសាស្ត្រជាដើម។ មន្ត្រីក្រសួងឧស្សាហកម្ម បានអះអាងថា ទាំងអស់នេះ គឺជាការចូលរួមចំណែកមួយក្នុងការទប់ស្កាត់កុំឱ្យបិទទ្វារោងចក្រ បង្កើននូវសេដ្ឋកិច្ចជាតិ និងជួយរក្សាបាននៅការងារសម្រាប់កម្មករ កម្មការិនីនៅកម្ពុជា។
ឯកឧត្ដម ហេង សុខគង់ អ្នកនាំពាក្យក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានឱ្យដឹងថា ចំនួនទិន្ន័យនៃការបិទទ្វារ និងរោងចក្រកើតថ្មីឡើងវិញ ជាទិន្នន័យសំខាន់សម្រាប់វាយតម្លៃអំពីកំណើនសេដ្ឋកិច្ចជាតិ ដែលពឹងផ្អែកលើវិស័យឧស្សាហកម្ម។
សូមជម្រាបថា ចាប់ពីឆ្នាំ២០១៥ ក្រោមគោលនយោបាយអភិវឌ្ឍន៍វិស័យឧស្សាហកម្មកម្ពុជា ឆ្នាំ២០១៥ ដល់ ២០២៥ វិស័យឧស្សាហកម្ម បានធ្វើពិពិធកម្មឧស្សាហកម្ម ក្រៅពីវិស័យកាត់ដេរ ដែលមានកំណើនជាបន្តបន្ទាប់។ ការធ្វើពិពិធកម្ម ដែលមិនពឹងផ្អែកតែលើវិស័យឧស្សាហកម្មកាត់ដេរមួយមុខប៉ុណ្ណោះទេ ឧស្សាហកម្មកម្ពុជា ក៏បានពឹងផ្អែកទៅលើឧស្សាហកម្មជំនាញ និងឧស្សាហកម្ម ដែលមានបច្ចេកវិទ្យា ដើម្បីរួមចំណែកជម្រុញឱ្យវិស័យឧស្សាហកម្ម មានកំណើនពីមួយឆ្នាំទៅមួយឆ្នាំ៕ CEN
