កាលពីប៉ុន្មានថ្ងៃកន្លងមកនេះ ប្រិយមិត្តជាច្រើននៅលើបណ្តាញសង្គម ពិតណាស់មានក្តីក្តុកក្តួលរំជួលចិត្តជាខ្លាំងរួចហើយ ព្រោះតែនារីដ៏ស្រស់សោភាពោរពេញដោយស្នាមញញឹមជានិច្ច មិនគួរណាបានបាត់បង់ជីវិតទាំងនៅវ័យក្មេង ដោយសាររជំងឺបេះដូងឆក់យកជីវិតនាងទាំងពុំបានលាប្តីនិងកូនស្រីជាទីស្រឡាញ់ ដែលធ្វើឲ្យក្រុមគ្រួសារ សាច់ញាតិ មិត្តភក្តិ សឹងតែពុំអាចទទួលយកបានឡើយ។
ជាមួយនឹងការបាត់បង់ប្រពន្ធជាទីស្រឡាញ់យ៉ាងលឿនបែបនេះ ក៏បានធ្វើឲ្យបុរសជាប្តីដែលមានគណនីហ្វេសប៊ុកឈ្មោះ Sothon Huot បង្ហោះសារដ៏រំជួលចិត្តជាបន្តបន្ទាប់ឥតឈប់ឈរ ដោយបង្ហាញពីទំហំនៃក្តីស្រឡាញ់ប្រពន្ធស្មើនឹងជីវិតរបស់គាត់ ដល់ថ្នាក់គាត់បានបញ្ចេញអារម្មណ៍ពិតយ៉ាងមុតមាំដូច្នេះថា៖ «ទោះបីមិនបានឃើញរូបចាស់ៗ តែខួរក្បាលនេះ មាត់នេះចង់តែស្រែករកអូន ប្រពន្ធជាទីស្រឡាញ់ បើមានជាតិក្រោយពិតមែន បងប្រាថ្នាគ្រប់ៗជាតិ សូមឲ្យអូនមានសុខភាពល្អ បានកើតមកជាប្តីប្រពន្ធ មើលថែគ្នា ស្រឡាញ់គ្នារហូតដល់ចាស់ជរាកោងខ្នង ហើយបងនៅតែធ្វើជាប្តីល្អសម្រាប់អូនរហូត Soknath Darasina ព្រះអង្គម្ចាស់អើយ មិនគួរណាមកបំបែកគាត់ ពីខ្ញុំ»។ គាត់ក៏បានបញ្ជាក់ឲ្យដឹងបែបនេះថា៖ «កាត់ចិត្តអ្វីទៅ ដែលអ្នកអាចកាត់បាន…. ហើយមេត្តាកុំសួរថាថ្ងៃក្រោយ យកឬមិនយក ដឹងត្រឹមថារាល់ថ្ងៃខ្ញុំមានប្រពន្ធដែលជាទីស្រឡាញ់ហើយ ទោះបីគាត់មិនបាននៅទៀតក៏ដោយ ខ្ញុំនៅតែរក្សាតម្លៃគាត់រហូត…»។ និងនៅមានសារជាច្រើនទៀត ដែលលើកយករៀបរាប់មិនអស់។
លើសពីនេះ អ្វីដែលខ្លោចចិត្តនោះ គឺពេលឃើញវីដេអូបង្ហាញចិញ្ចៀន ដោយបុរសខាងលើបានភ្ជាប់សារដ៏កំសត់យ៉ាងដូច្នេះថា៖ «សម្រាប់អូន តែពេលអូនទម្ងន់ ពាក់មិនត្រូវ អូនដោះទុកហើយបងក៏បានយកមកលាងសម្អាតទុក ប៉ុន្តែឥលូវនេះបងមានតែថែរក្សាទុកសម្រាប់កូនស្រីជាទីស្រឡាញ់របស់យើង ពាក់នូវពេលកូនធំឡើង ត្រូវដៃគាត់»។
យ៉ាងណាមិញ ក្រោយពីបានឃើញបុរសជាប្តីដ៏ល្អកម្ររកខាងលើ បានបង្ហោះរូបភាព និងវីដេអូអនុស្សាវរីយ៍ជាច្រើន ដោយភ្ជាប់សាររៀបរាប់ជាមួយក្តីនឹករលឹកជាខ្លាំង និងជាពិសេសមួយម៉ាត់ណាក៏លើកសរសើរផ្តល់តម្លៃឲ្យប្រពន្ធជានិច្ច ជាហេតុធ្វើឲ្យអ្នកនាង ពេជ្រ សោភា ទប់ចិត្តពុំបាន ក៏បានបង្ហាញអារម្មណ៍មួយនេះថា «ខ្ញុំមើលហើយ បេះដូងខ្ញុំឈឺចាប់ម្លេះ អាណិតបងប្រុសណាស់ យ៉ាងណាត្រូវវឹងមាំណាបងដើម្បីកូនបង»។
ទន្ទឹមនេះផងដែរ ឃើញថាមានមជ្ឈដ្ឋានមហាជជាច្រើន ក៏បានចូលខមិនលើកទឹកចិត្ត និងសរសើរចំពោះទំហំនៃសេចក្តីស្រឡាញ់របស់គាត់ចំពោះប្រពន្ធ ដែលក្នុងនោះគណនីម្នាក់បានលើកឡើងថា៖ «ខ្ញុំគិតថាលើលោកនេះវាគ្មានស្នេហាបែបនេះទេគ្មានមនុស្សប្រុសបែបនឹងទេតែពេលដែលឃើញបងទាំងពីទើបខ្ញុំដឹងថាលើលោកនេះពិតជាមានស្នេហាដែលពិតប្រាកដ បងប្រុសត្រូវតែរិងមាំឡើង ដើម្បីថែរក្សា ផ្ដល់ភាពកក់ក្ដៅដល់កូនស្រី»៕ ដោយ៖ លឹម ហុង
