ឧកញ៉ា ឡេង ណាវ៉ាត្រា ដែលបច្ចុប្បន្នកំពុងជោគជ័យខ្លាំងលើវិស័យអចលនទ្រព្យរហូតដល់សល់លុយរាប់លានដុល្លារ បានសម្រេចបង្ហាញមុខអ្នកនៅពីក្រោយភាពជោគជ័យរបស់លោកមកទល់សព្វថ្ងៃនេះ ដែលមិនមែនជាអ្នកនៅឆ្ងាយឯណាទេ តែជាបងប្រុសបង្កើតរបស់លោកតែម្តងដែលបានដើរតួជាម្តាយផងឪពុកផងខណៈបងប្អូនរបស់លោកបានចាកចេញពីគ្រួសារតាំងពីអាយុជាង១០ឆ្នាំម្លេះ។
ដោយលោកបានបង្ហោះនៅលើទំព័រផេកហ្វេសបុកផ្លូវការរបស់លោកថា «តើបងប្អូនណាខ្លះមានរឿងដូចខ្ញុំ? នៅក្នុងគ្រួសារបន្ទាប់ពីឪពុកម្ដាយគឺបងប្រុសនេះដែលដើតួរជាម្ដាយផងជាឪពុកផង ព្រោះបងប្អូនខ្ញុំចាកចេញពីគ្រួសារតាំងពីអាយុជាង១០ឆ្នាំ។ ចរិតរឹងរូសងងក់ធ្វើអ្វីតាមអំពើចិត្តនឹងឌឺដងបងប្រុសគឺខ្ញុំនេះឯង មិនសូវឲ្យតម្លៃបងខ្លួនឯងទេ កាលនៅធ្វើការឈ្លោះគ្នាម្ដងៗបងតែងតែចាញ់ខ្ញុំជានិច្ច ហើយគាត់តែងតែមកយកចិត្តខ្ញុំទៀត ជាពិសេសពេលឈឺបងប្រុសស្ទុះស្ទារកគ្រប់មធ្យោបាយដោះស្រាយឲ្យប្អូន។ ពេលខ្ញុំបរាជ័យគាត់គឺជាអ្នកលើកខ្ញុំឱ្យក្រោកឈរ ពេលខ្ញុំធ្វើខុសគាត់តែងតែតាមតម្រង់ផ្លូវខ្ញុំជានិច្ច ទោះបីគាត់ត្រូវបានខ្ញុំធ្វើឲ្យគាត់ហូទឹកភ្នែកក៏ដោយ បងប្រុសម្នាក់នេះចិត្តធំណាស់ហ៊ានលះបង់គ្រប់បែបយ៉ាងដើម្បីប្អូនៗ»។
លោកបន្តទៀតថា «មកដល់ពេលនេះទើបដឹងថាខ្ញុំចាញ់គាត់គ្រប់យ៉ាង ចាញ់ភាពអត់ធ្មត់ ចាញ់ភាពស្រលាញ់ ចាញ់ភាពតស៊ូ ចាញ់ត្រង់គាត់ធ្វើអ្នកចាញ់រហូត ចាញ់ភាពកក់ក្ដៅដែលគាត់លះបង់ឲ្យខ្ញុំ ចាញ់ត្រង់ខ្ញុំខឹង គាត់មិនខឹងខ្ញុំ ពេលនេះទើបខ្ញុំដឹងថាភាពកក់ក្ដៅដែលបងប្រុសផ្ដល់ឲ្យមិនអាចកាត់ថ្លៃបានទេ អ្នកដែលនៅពីក្រោយភាពជោគជ័យរបស់ខ្ញុំគឺគាត់ គាត់ជាគ្រូបង្រៀនជាទីព្រឹក្សាដ៏ពូកែ ជាបងប្អូនបង្កើតនឹងគ្នា តើអ្នកស្រណោះនឹកគ្រាដែលរត់លេងកាលនៅតូចៗឬអត់? តើអ្នកនឹកឃើញពេលហូបបាយជុំគ្នាឬទេ? ហើយពេលនោះយើងមិនសូវមានអីហូបដែរ តើអ្នកស្រណោះពេលមើលថែគ្នាឬអត់! ពាក្យថាបងប្អូនបង្កើតមានន័យណាស់បន្ទាប់ពីពុកម៉ែ ពេលនេះលុយនិងកិត្តិយសមិនអាចផ្ដូរកាត់ឈាមបងប្អូនបានទេ»។
គួរបញ្ជាក់ផងដែរថា បច្ចុប្បន្នក្រៅពីជោគជ័យលើជំនួញអចលនទ្រព្យ ឧកញ៉ា ឡេង ណាវ៉ាត្រា នៅមានមុខជំនួញជាច្រើនទៀតដែលកំពុងដំណើរការទៅយ៉ាងល្អ ដូចជា ផលិតកម្មចម្រៀងដែលមានកំពូលតារាចម្រៀងលោក ព្រាប សុវត្ថិ លោកខេម តារារលកក្រោយ តន់ ច័ន្ទសីម៉ា ជាដើម៕ ដោយ៖ កូលាប ក្រហម