ភ្នំពេញ៖ មានករណីបុរសជាប្ដីបានលែងលះគ្នាហើយទៅរៀបការប្រពន្ធថ្មី ។ បន្ទាប់មក ប្រពន្ធដើមក៏ទៅរករឿងដល់រោងការដើម្បីទាមទារឲ្យប្ដីជួយដោះស្រាយបំណុលដែលខ្ចីរួមគ្នា ។ ឥឡូវឃើញតុលាការខេត្តកណ្តាលចេញដីកាចាប់ខ្លួន ប្រពន្ធដើម យកមកដាក់គុក យោងតាមបណ្តឹងរបស់ ប្រពន្ធចុង ជាអ្នកប្ដឹង។
លោកផែង វណ្ណៈ បានលើកឡើងថា មន្ត្រីជាន់ខ្ពស់ក្រសួងយុត្តិធម៌ បានឲ្យដឹងថា ករណីឈ្មោះ ហុក ស្រីនុច ដែលសមត្ថកិច្ចនាំខ្លួនតាមដីកាបង្គាប់ឲ្យនាំខ្លួន របស់ចៅក្រម នួន វណ្ណៈ ត្រូវបានចៅក្រមអនុញ្ញាតឲ្យត្រឡប់ទៅផ្ទះវិញតាំងពីព្រឹកម្ល៉េះ បន្ទាប់ពីសាកសួររួចហើយ ចៅក្រមមិនបានឃុំខ្លួនទេ តែបានដាក់ឈ្មោះ ហុក ស្រីនុច ឲ្យស្ថិតនៅក្រោមការត្រួតពិនិត្យរបស់តុលាការ ។ មូលហេតុដែលចៅក្រមចេញដីកាបង្គាប់ឲ្យនាំខ្លួន ព្រោះតែឈ្មោះ ហុក ស្រីនុច មិនព្រមចូលខ្លួនមកបំភ្លឺតុលាការតាមការកោះហៅ ។
សូមរំលឹកថា៖ ស្ត្រីម្នាក់ដែលដឹកដៃកូនទៅទាមទាប្តីយកមករួមរស់ ជាមួយគ្នានឹងសង្ឃឹមថា បានមកមើលថែកូន តែមក ដល់ពេលនេះក្មេងតូចនោះ ត្រូវកំព្រារងា ឥតមេបា តែម្តងខណៈម្តាយ(ប្រពន្ធដើម)ត្រូវកម្លាំងកងរាជអាវុធហត្ថខេត្ត កណ្តាលចុះអនុវត្តន៍ដីកាចាប់ខ្លួន កាលព្រឹកថ្ងៃ ទី១៣ ខែវិច្ឆិកា ឆ្នាំ២០២០ ខណៈស្ត្រីរូបនោះ កំពុងអង្គុយលក់ត្រី នៅចំណុចស្តង់លក់ត្រីមួយ កន្លែងស្ថិតក្នុងភូមិរកាខ្ពស់ សង្កាត់រកាខ្ពស់ ក្រុងតាខ្មៅ ដើម្បីបានប្រាក់ចិញ្ចឹមកូន និងដោះបំណុលគេ (បំណុលរួមគ្នាជាមួយអតីតប្តីដែលលួចទៅរៀបការប្រពន្ធថ្មី)។
ដើមបណ្តឹងមានឈ្មោះ ទេស ស្រីនាង អាយុ៣៥ឆ្នាំ រស់នៅភូមិទួលក្រសាំង សង្កាត់រកាខ្ពស់ ក្រុងតាខ្មៅ បានរៀបការ ជាមួយឈ្មោះលី ច្រាយ ២៩ ឆ្នាំ កាលថ្ងៃទី៦ ខែកុម្ភៈ ឆ្នាំ២០២០ ដែលជាប្តីដើមរបស់ជនត្រូវចោទ។
ដោយឡែកជនត្រូវចោទ ជាប្រពន្ធដើមឈ្មោះ ហុក ស្រីណុច អាយុ២៦ឆ្នាំ នៅភូមិទួលក្តី ឃុំត្រើយស្លា ស្រុកស្អាង។ សមត្ថកិច្ចអនុវត្តដីកាបង្គាប់ឲ្យនាំខ្លួនលេខ ៨០២ ដប.នខ ចុះថ្ងៃទី១២ ខែវិច្ឆិកា ឆ្នាំ២០ ២០ របស់លោក ជួន វណ្ណៈ ចៅក្រមស៊ើបសួរ នៃ សាលាដំបូងខេត្តកណ្តាល ។ ទើបនៅវេលាម៉ោង៧៖០០នាទីព្រឹកថ្ងៃទី១៣ ខែវិច្ឆិកា ឆ្នាំ២០២០ សមត្ថកិច្ចចំនួន៨នាក់ ចុះទៅឃាត់ខ្លួន ស្ត្រីរូបនោះ នៅចំណុចភូមិព្រែកខ្សេវ សង្កាត់រកាខ្ពស់ ក្រុងតាខ្មៅ ខេត្តកណ្តាល ពីបទរំលោភលើលំនៅឋាន និងបរិហាកេរ្តិ៍ជា សាធារណៈ ប្រព្រឹត្តនៅភូមិទួលក្រសាំង សង្កាត់រកាខ្ពស់ ក្រុងតាខ្មៅ ខេត្តកណ្តាល កាលពីថ្ងៃទី៦ ខែកុម្ភៈ ឆ្នាំ២០២០ ហើយត្រូវបានបញ្ជូនទៅបញ្ជាការដ្ឋានកងរាជអាវុធខេត្តកណ្តាល ដើម្បីបន្តនីតិវិធី៕
ដោយ៖បញ្ញាស័ក្តិ
