ភ្នំពេញៈ គ្រោះថ្នាក់ចរាចរណ៍ដ៏រន្ធត់មួយបានកើតឡើងរវាងរថយន្តដឹកអ្នកដំណើរកាពីតូល និងរថយន្តស្ទួច បានបណ្តាលឲ្យមនុស្សចំនួន ៤នាក់រងរបួសធ្ងន់ និងស្រាល និងមានអ្នកគាបជាប់នៅក្នុងកាប៊ីនរថយន្តផងដែរ។
ហេតុការណ៍គ្រោះថ្នាក់ចរាចរណ៍នេះ បានកើតកើតឡើងកាលពីម៉ោង១២និង២០រំលងអធ្រាត្រឈានចូលថ្ងៃទី១៩ ខែវិច្ឆិកា ឆ្នាំ២០២០ ស្ថិតនៅផ្លូវជាតិលេខ៦ សង្កាត់ព្រែកលៀប ខណ្ឌជ្រោយចង្វា រាជធានីភ្នំពេញ។
នៅក្នុងគ្រោះថ្នាក់ចរាចរណ៍នេះ រថយន្តកាពីតូលដឹកនាំដំណើរពីខេត្តកំពង់ចាមមករាជធានីភ្នំពេញ បើកបរក្នុងល្បឿនលឿនលុះកន្លែងកើតហេតុខាងលើ ក៏បានបើកបុកពីខាងក្រោយរថយន្តស្ទូចពេញទំហឹងតែម្តង បណ្តាលឲ្យរថយន្តកាទីតូលរងការខូចខាតផ្នែកខាងមុខ និងរួញគាបជាប់មនុស្សនៅក្នុងនោះចំនួន ៤នាក់ (ប្រុស ៣នាក់ ស្រី ១នាក់) រងរបួស។ ប៉ុន្តែមិនមានអ្នកស្លាប់នោះទេ។
មនុស្សដែលគាបជាប់នៅក្នុងរថយន្តត្រូវបានប្រជាពលរដ្ឋ និងសមត្ថកិច្ចជួយគាស់យកមនុស្សចេញ រួចបញ្ជូនទៅសង្គ្រោះនៅមន្ទីរពេទ្យ។
ជាការកត់សម្គាល់នៅក្នុងគ្រោះថ្នាក់ចរាចរណ៍ដែលកើតឡើងនាពេលកន្លងមក គឺដោយសារតែអ្នកបើកបរធ្វេសប្រហែស បើកបរក្នុងល្បឿនលឿន និងពិសាសរគ្រឿងស្រវឹងពេលបើកបរ។ កត្តាទាំងនេះហើយដែលជាហេតុនាំឲ្យមានគ្រោះថ្នាក់ចរាចរណ៍បង្កឲ្យមានការស្លាប់បាត់បង់ជីវិត រងរបួស និងបាត់បង់ទ្រព្យសម្បត្តិ។ ហេតុអ្នកអ្នកបើកបរគួរប្រុងប្រយ័ត្ននិងជៀសវាងកុំពិសាគ្រឿងស្រវឹងពេលបើកបរ។
អ្នកនាំពាក្យអគ្គស្នងការដ្ឋាននគរបាលជាតិ បានបញ្ជាក់ថា គ្រោះថ្នាក់ចរាចរណ៍កើតឡើងសម្រាប់ម៉ូតូ និងរថយន្ត គឺដោយសារអត់ពាក់មួកសុវត្ថិភាព ល្មើសសញ្ញា បត់ជែង លើសចំណុះ ស្រវឹង អត់ផ្លាកលេខ ល្មើសល្បឿន អត់ប័ណ្ណបើកបរ អត់ខ្សែក្រវ៉ាត់ គ្មានស្លាកលេខ និងនិយាយទូរស័ព្ទពេលបើកបរ៕
ដោយ៖CEN
