អ្នកនាងដួងច័ន្ទ រហស្សនាមយាយតយ ដែលអ្នកលេងបណ្តាញសង្គមភាគច្រើនស្គាល់តាមរយៈវីដេអូកំប្លុកកំប្លែង
ថ្មីៗនេះបានចេញវីដេអូខ្លីមួយ កំប្លែងតែបង្កប់ន័យចាក់ដោតដល់អ្នកលេងបណ្តាញសង្គមដែលចូលចិត្តហៅគេថាម៉ែ។
តាមរយៈវីដេអូខ្លីដែលអ្នកនាងដួងច័ន្ទ ហៅយាយតយ បង្ហោះក្នុងគណនី TikTok របស់ខ្លួនបានរៀបរាប់បែបកំប្លែងតែបង្កប់អត្ថន័យយ៉ាងដូចច្នេះថា «ខ្លួនឆ្ងល់រឿងមួយ ម៉េចបានជាអ្នកលេង TikTok និង Facebook ឥឡូវចូលចិត្តហៅគេគ្រប់គ្នាថាម៉ែ?? ហើយបានហាមបុគ្គលិករបស់ខ្លួនមិនឱ្យហៅអ្នកដទៃថាម៉ែ ព្រោះពាក្យថាម៉ែមួយម៉ាត់វាធ្ងន់ណាស់ ខំបង្កើតយើងមកអស់ឈាមទាំងថ្លុកមិនមែនគ្រាន់តែចូលចិត្តគេ ហៅគេថាម៉ែនោះទេ។ មួយវិញទៀតបើថាស្រឡាញ់ឬគោរពគេ អាចហៅគេថាបង ឬIdol តែហាមហៅម៉ែប្រយ័ត្នឈើជ្រុង ឱ្យដឹងថាម៉ែយើងមួយណាផងកុំចេះតែហៅផ្តេសផ្តាស»។
ក្រោយបង្ហោះភ្លាម វីដេអូនោះទទួលបានការគាំទ្រជាច្រើនពីអ្នកលេងសង្គម TikTok ដោយនាំគ្នាចូលមកខមិនថា បងនិយាយត្រូវណាស់, ត្រូវចិត្តណាស់, ត្រូវទៀតហើយចែតយ ចំណែកអ្នកខ្លះក៏បានខមិនថា គាំទ្រសំដីបង ពាក្យថាម៉ែទោះមិនបានបង្កើតយើង យ៉ាងហោចណាស់ធ្លាប់ជួយជីវិតយើង ឬអាចជាអ៊ំស្រីធំ ឬលោកយាយ នោះប្រហែលយើងអាចហៅបាន។ តែពិតមិនយល់មនុស្សសម័យនេះ។
គួរបញ្ជាក់ថា ការលើកឡើងបែបនេះ កើតឡើងស្របពេលគេសង្កេតឃើញថា បច្ចុប្បន្នអ្នកលេងបណ្តាញសង្គមឥឡូវហាក់រអិលមាត់ក្នុងការហៅមនុស្សគ្រប់គ្នាថាម៉ែ ទាំងមិនត្រូវជាអ្វីនិងគ្នាទាល់តែសោះ ជាពិសេសគឺអ្នកលក់អនឡាញល្បីៗ តារាសម្តែង តារាហ្វេសបុក តារា TikTok ជាដើម ឱ្យតែល្បីឱ្យតែខ្លួនចូលចិត្តក៏តាំងហៅគេថាម៉ែពេញៗមាត់តែម្តង៕ ដោយ៖ កូលាប ក្រហម