ភ្នំពេញ៖បុរសម្នាក់បើករថយន្តក្នុងស្ថានភាពស្រវឹងជោកជាំ បើកក្នុងល្បឿនលឿនជ្រុលទៅបុកនឹងរបាំងថ្មពេញទំហឹង រួចជ្រុលទៅបុកផ្ទះប្រជាពលរដ្ឋផ្ទប់ជាប់និងជញ្ជាំងបណ្ដាលឲ្យរងការខូចខាតយ៉ាងដំណំ។
ហេតុការណ៍នេះដែរ កើតឡើងនៅវេលាម៉ោង ១១ និង ០០ នាទីយប់ថ្ងៃព្រហស្បតិ៍ទី ១៩ ខែវិច្ឆិកាឆ្នាំ ២០២០ ស្តិតនៅតាមបណ្ដោយផ្លូវ ២៧១ ក្នុងសង្កាត់ទួលទំពូងទី២ ខណ្ឌចំការមន រាជធានីភ្នំពេញ។
បើយោងតាមប្រភពព័ត៌មាន ពីប្រជាពលរដ្ឋនៅកន្លែងកើតហេតុ បានឲ្យដឹងថា មុនពេលកើតហេតុគេឃើញបុរសម្នាក់បើករថយន្ត
ម៉ាក ford ranger មួយគ្រឿងដែលពាក់ផ្លាកលេខ ខេមរភូមិន្ទ 0- 2-4761 ធ្វើដំណើរតាមបណ្តោយផ្លូវ ២៧១ ក្នុងទិសដៅពីកើតមកលិច ក្នុងល្បឿនលឿនមិនបង្អង់ មកដល់ចំណុចកើតហេតុ ទៅបុករបាំងថ្មពុះចែកផ្លូវបាក់មួយកង់ រួចក៏ជ្រុលទៅបុកផ្ទះប្រជាពលរដ្ឋបន្តែមទៀត បណ្ដាលឲ្យរងការខូចខាតយ៉ាងដំណំ ។ ចំណែកឯរថយន្តវិញ រងការខូចខាតផ្នែកខាងមុខស្ទើរទាំងស្រុង។
បញ្ជាក់ ក្នុងករណីគ្រោះថ្នាក់ចរាចរណ៍នេះ មិនបង្ករបួសស្នាមទៅដល់បងប្អូនប្រជាពលរដ្ឋ ដែលកំពុងតែរួមដំណើរនៅតាមបណ្ដោយផ្លូវនេះទេ រងការខូចខាតតែទ្រូងថ្មពុះចែកផ្លូវមួយកង់ និងផ្ទះបងប្អូនប្រជាពលរដ្ឋ។
ក្រោយពេលកើតហេតុសមត្ថកិច្ចមូលដ្ឋាន សហការជាមួយនឹងជំនាញ ចុះមកដល់រួចក៏ទំនាក់ទំនងទៅខាងជំនាញចរាចរណ៍ក្រុង ឲ្យចុះមកវាស់វែង និងធ្វើកំណត់ហេតុយករថយន្ត ទៅរក្សាទុករង់ចាំដោះស្រាយនៅពេលក្រោយ៕ដោយ៖ សា មេត
