ភ្នំពេញ៖ ការកំណត់ពេលប្រកាសសាលក្រមទៅធ្វើនៅថ្ងៃទី១៧ ខែធ្នូ ខាងមុខនេះ បន្ទាប់ពីបញ្ចប់សវនាការសួរដេញដោលលើជនជាប់ចោទអតីតនគរបាលចរាចរផ្លូវគោករាជធានីភ្នំពេញ ដែលឈរជើងនៅចំណុចមុខមន្ទីរពេទ្យបាយ័ន ក្បែរស្ពានអាកាសក្បាលថ្នល់ បានសារភាពក្នុងសវនការនាថ្ងៃទី ២៣វិច្ឆិកា ឆ្នាំ២០២០នេះថា ខ្លួនបានទទួលទុកបញ្ញើប្រាក់ចំនួន៩០មុឺនដុល្លារអាមេរិក នៅក្នុងចំណោមប្រាក់២លាន៤សែនដុល្លារ ដែលក្រុមចោរលួចយកពីឡានរបស់ក្រុមហ៊ុន ។
តុលាការបានសួរចម្លើយជនជាប់ចោទឈ្មោះ លី អ៊ិន អតិតមន្ត្រីនគរបាលចរាចរដែលត្រូវបានលុបឈ្មោះចេញពីក្របខន្តមន្ត្រីនគរបាល បានសារភាពថា នៅព្រលប់ថ្ងៃទី ១៦កក្ដដា ឆ្នាំ២០១៩ ប្អូនធ៌មរបស់គាត់ឈ្មោះ វ៉ា ស្រ៊ីម ភេទស្រីបានជិៈរថយន្តយកប្រាក់ចំនួន៩០មុឺនដុល្លារមកផ្ញើ ដោយប្រាប់ថា ជាប្រាក់របស់ឈ្មោះវ៉ា សុខ យកមកផ្ញើទុក ប៉ុន្តែដោយខ្លួនមិនមានសមត្ថភាពរក្សាទុក ទើបយកមកផ្ញើបន្តនៅឈ្មោះ លី អ៊ិន ។
បន្ទាប់មកខ្លួនបានយកប្រាក់ទៅទុកនៅក្នុងបន្ទប់ដេក ហើយក៏បានធ្វើដំណើរទៅប្រទេសថៃដើម្បីព្យាបាលជំងី លុះដល់ថ្ងៃទី ២២កក្ដដា ២០១៩ ទើបមេបញ្ជាការទូរស័ព្ទអោយត្រឡប់មកវិញដើម្បីដោះស្រាយបញ្ហាលុយបញ្ញើនោះ ។ ហើយនៅថ្ងទី ២៣កក្ដដា២០១៩ ទើបខ្លួនត្រឡប់មកវិញក៏ត្រូវសមត្ថកិច្ចចាប់ខ្លួននិងបានដកហូតលុយទៅវិញចំនួន៨២ម៉ឺនន៩ពាន់ដុល្លារអាមេរិក ។
ក្រោយបញ្ចប់សវនាការនេះ ក្រុមប្រឹក្សាតុលាការបានកំណត់យកថ្ងៃទី ១៧ធ្នូ ដើម្បីប្រកាសសាលក្រមរ៉ងក្ដីនេះសំណុំរឿងប្លន់ប្រាក់២លាន៤សែនដុល្លារក្នុងចំណោមប្រាក់ចំនួន៥លានដុល្លារដែលបើកចេញពីធនាគារCIMBកាលពីឆ្នាំ២០១៩ត្រូវបានក្រុមប្រឹក្សាជំនុំជំរះសាលាដំបូងរាជធានីភ្នំពេញលើកយកមកបើកសវនាការកាត់ទោសលើជនជាប់ចោទដែលជាអតីតអ្នកទោសចោរប្លន់ដែលទើបចេញពីពន្ធនាគារ ។
ជនត្រូវចោទដែលតុលាការកាត់ទោសក្នុងសំណុំរឿងនេះមាន៧នាក់រួមមាន ៖ ទី១ ឈ្មោះ វ៉ា សុខ អាយុ៣៧ឆ្នាំ ជាអ្នកបើកបររថយន្តដឹកប្រាក់ចេញពីធនាគារ និងជាអតីតចោរប្លន់ដែលទើបចេញពីពន្ធនាគារ។ទី២ឈ្មោះមាស សំណាងអាយុ៣៨ឆ្នាំ ជាអតីតចោរប្លន់ដែលជាប់ពន្ធនាគារ៨ឆ្នាំ ទើបចេញពីគុក ។ទី៣ឈ្មោះ អៀម សំអន អាយុ៣៧ឆ្នាំ ជាអតីតចោរប្លន់ទើបចេញពីពន្ធនាគារ និងជាអង្គរក្ស។ទី៤ឈ្មោះវ៉ាស្រ៊ីម ភេទស្រី អាយុ៣១ឆ្នាំ ។ទី៥ឈ្មោះ លី អុិន ជានគរបាលចរាចរផ្លូវគោករាជានីភ្នំពេញ ។ទី៦ឈ្មោះ លឹម រតនៈ ភេទប្រុស ។ទី៧ឈ្មោះ លឹម រតនា ភេទប្រុស ។
តុលាការបានចោទប្រកាន់លើក្រុមជនជាប់ចោទពីបទ លួចមានស្ថានទំងន់ទោស បទសមគំនិតលួច និងបទទទួលផលចោរកម្ម ប្រព្រឹត្តកាលពីថ្ងៃទី ១៦កក្ដដា ឆ្នាំ២០១៩ នៅក្នុងខណ្ឌចម្ការមនរាជធានីភ្នំពេញ ។
សូមរំលឹកថាលោកអ៉ឹម វណ្ណៈ ប្រធានក្រុមប្រឹក្សាជំនុំជម្រះនៃសាលាដំបូងរាជធានីភ្នំពេញនិងលោក សេង ហៀង ជាតំណាងអយ្យការនៅព្រឹកថ្ងៃទី២ខែវិច្ឆិកាឆ្នាំ២០២០នេះ គ្រោងនឹងបើកសវនាការជំនុំជម្រះលើជនជាប់ចោទចំនួន៧នាក់ ពាក់ព័ន្ធទៅនឹងករណី លួចមានស្ថានទម្ងន់ទោសដោយសារការប្រព្រឹត្តអំពើហិង្សា និងសមគំនិតក្នុងបទល្មើសលួចមានស្ថានទម្ងន់ទោសដោយសារការប្រព្រឹត្តអំពើហិង្សា និងកាន់កាប់អាវុធដោយគ្មានការអនុញ្ញាត និងការទទួលផលចោរកម្ម តែសវនាការនេះត្រូវបានលើកពេលវិញដោយសារខាងពន្ធនាគារព្រៃស (ម២)មិនបានធ្វើការបញ្ជូនខ្លួនជនជាប់ចោទមកតុលាការដោយសារខាងពន្ធនាគារមានការលិចទឹកភ្លៀង មិនទាន់រាបចំមនុស្សមកបាន ទើបតុលាការសម្រេចលើកពេលសវនាការសិននិងបន្តសវនាការនៅពេលក្រោយ។
សូមបញ្ជាក់ថា ជនជាប់ចោទ១. ឈ្មោះ វ៉ា សុខ ភេទប្រុស អាយុ៣៨ឆ្នាំ ស្នាក់នៅផ្ទះលេខ២០២ អឺ៣ផ្លូវ១៣០ ក្រុម៩ ភូមិ២ ខណ្ឌដូនពេញ រាជធានីភ្នំពេញ មុខរបរបើកបររថយន្ត(ឃាត់ខ្លួនថ្ងៃទី១៨ ខែកក្កដា ឆ្នាំ២០១៩ វេលាម៉ោង៥និង៤០នាទី នៅក្រុងបាវិត)។ ២.ឈ្មោះ អៀម សំអន ភេទប្រុស អាយុ៣៨ឆ្នាំ ស្នាក់នៅផ្ទះគ្មានលេខ ផ្លូវលំ ភូមិប៉ាយ៉ាប សង្កាត់ភ្នំពេញថ្មី ខណ្ឌសែនសុខ មុខរបរលក់ដូរ ឃាត់ខ្លួនថ្ងៃទី១៩ ខែកក្កដា ឆ្នាំ២០១៩ វេលាម៉ោង៧និង៤០នាទី នៅចំណុចមុខផ្ទះគ្មានលេខ ផ្លូវបេតុង ភូមិប៉ាយ៉ាប សង្កាត់ភ្នំពេញថ្មី ខណ្ឌសែនសុខដកហូតបានអាវុធខ្លី០១ដើមម៉ាក KIMBER បង់១គ្រាប់ចំនួន៨គ្រាប់ ។ ៣.ឈ្មោះ ពាស សំណាង ហៅ ចាន់ ភេទប្រុស អាយុ៣៧ ឆ្នាំ ស្នាក់នៅផ្ទះជួល ផ្លូវរទេះភ្លើង សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញមុខរបរមិនពិតប្រាកដ (ឃាត់ខ្លួនថ្ងៃទី២២ ខែកក្កដា ឆ្នាំ២០១៩ វេលាម៉ោង៣រសៀល ) នៅចំណុចផ្ទះសំណាក់បូតិច ផ្លូវ១៩៧០ សង្កាត់ភ្នំពេញថ្មី ខណ្ឌសែនសុខ ។ ៤.ឈ្មោះ លី អ៉ិន ភេទប្រុស អាយុ៤៧ឆ្នាំ មុខរបរនគរបាលចរាចរណ៍ ឃាត់ខ្លួននៅថ្ងៃទី២៣ ខែកក្កដា ឆ្នាំ២០១៩ វេលាម៉ោង៤និង១៥នាទី (ទទួលផលចោរកម្ម) ។៥.ឈ្មោះ វ៉ា ស្រ៉ីម ភេទស្រី អាយុ៤០ឆ្នាំ ស្នាក់នៅផ្ទះលេខសេ១០ ផ្លូវបេតុង បុរីមង្គលភ្នំពេញ សង្កាត់វាលស្បូវ ខណ្ឌចំការមន មុខរប រនៅផ្ទះ ឃាត់ខ្លួនបាននៅថ្ងៃទី ២២ ខែកក្កដា ឆ្នាំ២០១៩ វេលាម៉ោង៥ល្ងាច នៅចំណុចផ្ទះលេខសេ១០ ផ្លូវបេតុង បុរីមង្គលភ្នំពេញ សង្កាត់វាលស្បូវ ខណ្ឌចំការម ន ។ ៦.ឈ្មោះ លឹម រតនា ភេទប្រុស អាយុ៣១ឆ្នាំ មុខរបរលក់ដើមឈើ ឃាត់ខ្លួនថ្ងៃទី២៣ ខែកក្កដា ឆ្នាំ២០១៩ វេលាម៉ោង៧យប់ ។ និង៧.ឈ្មោះ លឹម រតនៈ ភេទប្រុស អាយុ៣៧ឆ្នាំ។
សូមបញ្ជាក់ទៀតថា ករណីបង្ក្រាបជនជាប់ចោទទាំង៧នាក់ខាងលើនេះសមត្ថកិច្ចបានធ្វើការដកហូតបានប្រាក់មកវិញសរុប ១.២៣៨.៣០០ ដុល្លារអាមេរិក និងលុយថៃចំនួន៩២.២៥០ បាត និងរថយន្តម៉ាកឡិចស៊ីស១គ្រឿង ។
ដើមហេតុ នៃបទល្មើសខាងលើនេះ យោងតាមពាក្យបណ្តឹងរបស់ជនរងគ្រោះឈ្មោះ សំ ឆាយវ៉ាន់ ភេទប្រុស អាយុ៧៨ឆ្នាំស្នាក់នៅផ្ទះលេខ៣១ ផ្លូវ២៨៦ ភូមិ២ សង្កាត់អូឡាំពិក ខណ្ឌចំការមន មុខរបរជាប្រធានក្រុមហ៊ុនឆាយវ៉ាន់ បានបញ្ជាក់ថា កាលពីវេលាម៉ោង៧ និង៤០ នាទីយប់ថ្ងៃទី១៦ កក្កដា ឆ្នាំ២០១៩ គណនេយ្យរបស់ក្រុមហ៊ុនឆាយវ៉ាន់ បានឲ្យសែកមួយសន្លឹកមានទឹកប្រាក់៥ លានដុល្លារអាមេរិកទៅបុគ្គលិកឈ្មោះ នី សំអាត និងតៃកុងរថយន្តម្នាក់ឈ្មោះ វ៉ា សុខ ដើម្បីទៅបើកប្រាក់ពីធនាគារCIMB ដែលមានទីតាំងស្ថិតនៅជាប់អតីតៈក្រសួងពាណិជ្ជកម្ម តាមបណ្តោយមហាវិថីព្រះនរោត្តម ខណ្ឌដូនពេញ ។
ដំណើររឿងបានបន្តថាបន្ទាប់ពីបើកប្រាក់បានហើយជនសង្ស័យឈ្មោះ នី សំអាត ក៏ដាក់លុយនោះច្រកចូលទៅក្នុងសាក់កាដូចំនួន២ និងថងខ្មៅមួយ រួចដាក់បាំងខាងក្រោយក្នុងរថយន្ត ហើយនាំគ្នាបើករថយន្តត្រឡប់ទៅវិញ និងបានទៅយកបុគ្គលិកម្នាក់ទៀតនៅចាំមុខកាស៊ីណូណាហ្គា២ ក៏ចេញដំណើរទៅទៀត និងបានដាក់បុគ្គលិកម្នាក់នោះឲ្យចុះវិញនៅមុខធនាគារABA តាមមហាវិថីព្រះសីហនុ កែងផ្លូវលេខ៦៣ សង្កាត់បឹងកេងកង២ ខណ្ឌបឹងកេងកង ។
ក្នុងពាក្យបណ្តឹង បានបន្តថា លុះពេលរថយន្តបើកទៅដល់មុខផ្ទះលេខ៤៥៧ ផ្លូវ៣១០ សង្កាត់បឹងកេងកង២ ជនជាប់ចោទឈ្មោះ វ៉ា សុខ បានប្រើល្បិចធ្វើជាឈប់រថយន្តចូលទិញទឹកផឹក រួចត្រឡប់ទៅក្រោយវិញ និងបានបើកទ្វារថយន្ត ឆក់យកសាក់កាដូពណ៌ខ្មៅមួយដែលមានទឹកប្រាក់ចំនួន២ លាន៤ សែនដុល្លារអាមេរិក ហើយបានគំរាមមិនឲ្យឈ្មោះ នី សំអាត ស្រែក រួចរត់ឡើងជិះម៉ូតូបក្ខពួករបស់គេគេចបាត់ទៅ។
តុលាការនឹងសម្រេចទោសទណ្ឌចំពោះក្រុមចោរទាំង៧នាក់នៅខែក្រោយ៕ ដោយ៖ CEN
