ភ្នំពេញ៖ ប្រជាពលរដ្ឋបានប្តឹងលោក ប្រាជ្ញ វុត្ថា ជាប្រធាន លោក ថេង សេដ្ឋា អនុប្រធានអគ្គិសនីខេត្តមណ្ឌលគីរី និង លោក អេង គន្ឋា អគ្គនាយករងអគ្គិសនីកម្ពុជា ទៅអង្គភាពប្រឆាំងអំពើពុករលួយ ដើម្បីជួយអន្តរាគមន៍លើករណីវិវាទដីធ្លីស្ថិតនៅភូមិដើមស្រល់ សង្កាត់មនោរម្យក្រុងសែនមនោរម្យ ខេត្តមណ្ឌលគីរី។ ការដាក់ពាក្យបណ្តឹងនេះ បានធ្វើឡើងកាលពីថ្ងៃទី១៦ ខែវិច្ឆិកា ឆ្នាំ២០២០។
យោងតាមពាក្យបណ្តឹងប្រជាពលរដ្ឋឈ្មោះ ថៃ ឃីន បានជម្រាបជូនលោកទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយថា “កាលពីពីថ្ងៃទី០៩ ខែតុលា ឆ្នាំ២០២០ ឯកឧត្តមអភិបាលខេត្តមណ្ឌលគិរី បានសម្រេចប្រគល់ដីទំហំ ២០៣៥ម៉ែត្រការ៉េ គឺជាដីដែលគ្មានក្នុងបញ្ជីសារពើភ័ណ្ឌទ្រព្យរដ្ឋរបស់អគ្គិសនីមណ្ឌលគិរី និងទ្រព្យរដ្ឋរបស់អគ្គិសនីកម្ពុជាទេ មកអោយខ្ញុំជាម្ចាស់កម្មសិទ្ធបានគ្រប់គ្រងឡើងវិញហើយ។ តែបែរជាបុគ្គលទាំងបីរូបខាងលើនៅតែមិនព្រមប្រគល់ដីទំហំ២០៣៥ម៉ែត្រការ៉េនេះ ឋិតក្នុងភូមិ សង្កាត់ ក្រុង ខេត្ត ខាងលើមកអោយខ្ញុំគ្រប់គ្រងវិញទេ។ ហើយខេត្តក៏បានបញ្ជាក់ថា សូមអោយអគ្គិសនីខេត្តមណ្ឌលគិរី និងអគ្គិសនីកម្ពុជាគ្រប់គ្រងតែដីទំហំ ២៨០២ម៉ែត្រការ៉េ គឺជាដីដែលក្រសួងបានផ្ទេរអោយ គឺជាដីដែលមាននៅក្នុងបញ្ជីសារពើភ័ណ្ឌទ្រព្យរដ្ឋរបស់អង្គភាពខ្លួនបានហើយ។
រីឯដីទំហំ ២០៣៥ម៉ែត្រការ៉េ គឺជាដីរបស់ប្រជាពលរដ្ឋ ឈ្មោះ ថៃ ឃីន និងឈ្មោះ អ៊ឹង ចន្ធូ បានអាស្រ័យផលនិងចាត់ចែងតាំងពីឆ្នាំ២០០០ រហូតមកដល់ពេលបច្ចុប្បនេះ ដែលមានអាជ្ញាធរមូលដ្ឋានទទួលរួចមកហើយ។ គួរឲ្យកត់សំគាល់ផងដែលថា ហេតុអ្វីបានជាដីនៅក្នុងបញ្ជីសារពើភ័ណ្ឌរបស់អង្គភាពអគ្គិសនីខេត្តមណ្ឌលគិរី និងអគ្គីសនីកម្ពុជា បានគ្រប់គ្រងទំហំដីពិតប្រាកដជាក់ស្តែងក្នុងទំហំសរុប ២៨០២ម៉ែត្រការ៉េដែលមាននៅក្នុងបញ្ជីសារពើភ័ណ្ឌទ្រព្យរដ្ឋរបស់អង្គភាពខ្លួនរួចហើយ ពុំមានការបាត់បង់ទេ ចុះហេតុអ្វីបានជាអស់លោកទាំងបីនេះបែរជាមកប្តឹងទាមទារយកដីក្រៅពីបញ្ជីសារពើភ័ណ្ឌទ្រព្យរដ្ឋរបស់អង្គភាពខ្លួនទៅវិញ? អាស្រ័យហេតុ ដូចបានគោរពជម្រាបជូនខាងលើ សូមឯកឧត្តមទេសរដ្ឋមន្ត្រី មេត្តាជួយសិក្សាស្រាវជ្រាវបន្ត និងជួយអន្តរាគមន៍ផ្តល់ដីទំហំ២០៣៥ម៉ែត្រការ៉េនេះ បានគ្រប់គ្រងនិងអាស្រ័យផលឡើងវិញដល់ក្រុមគ្រួសារខ្ញុំបាទដោយក្ដីអនុគ្រោះបំផុត”។
ចំណែក លោក ប្រាជ្ញ វុត្ថា ប្រធានអគ្គសនីខេត្តមណ្ឌលគីរី បានបញ្ជាក់ប្រាប់ CEN កាលពីថ្ងៃទី២៣ ខែវិច្ឆិកា ថា ការប្តឹងនេះ គឺជាមិនត្រឹមត្រូវទេ ពីព្រោះដីដែលលោកថៃ ឃីន អះអាងថា ជាដីរបស់ខ្លួននោះ គឺជាដីរបស់រដ្ឋ។ រីឯលោកថេង សេដ្ឋា អនុប្រធានអគ្គសនីខេត្តមណ្ឌលគីរីបានអះអាងថា ការប្តឹងរូបលោក គឺខុសហើយ ពីព្រោះការងារនេះ ខាងអគ្គិសនីកម្ពុជានៅភ្នំពេញ (EDC) ជាអ្នកដោះស្រាយ ហើយមកប្តឹងលោកម៉េចត្រូវ។ ហើយលោកមិនមានអ្វីបកស្រាយទេ ព្រោះការងារនេះថ្នាក់ដឹកនាំ EDC ជាអ្នកដោះស្រាយ។
លោកអេង គន្ធា អគ្គនាយករងអគ្គិសនីកម្ពុជា បានថ្លែងបញ្ជាក់ថា ដីដែលលោកថៃ ឃីន អះអាងថា ជាដីរបស់ខ្លួននោះ គឺមិនត្រឹមត្រូវទេ ព្រោះដីនោះជាដីរដ្ឋទេ និងមិនពាក់ព័ន្ធជាមួយលោកទេ។ ហើយខាងអគ្គិសនីកម្ពុជាមានឯកសារទាំងអស់ បើសិនជាមិនមែនដីរដ្ឋយើងយកធ្វើអី ហើយដីនេះមិនមានបុគ្គលធ្វើកម្មសិទ្ធិទេ ហើយគាត់ចង់ប្តឹងទៅដល់ណាប្តឹងទៅជាសិទ្ធិរបស់គាត់។
ទាក់ទងករណីនេះ អភិបាលខេត្តមណ្ឌលគីរី លោកស្វាយ សំអ៊ាង បានធ្វើលិខិតទៅប្រតិភូរាជរដ្ឋាភិបាលទទួលបន្ទុកជាអគ្គនាយកអគ្គិសនីកម្ពុជា កាលពីថ្ងៃទី៩ ខែតុលា ឆ្នាំ២០២០ ដោយបានបញ្ជាក់ថា កន្លងមករដ្ឋបាលខេត្តបានទទួលពាក្យបណ្តឹងតវ៉ាករណីទំនាស់ដីធ្លីរវាងអង្គភាពអគ្គិសនីខេត្តមណ្ឌលគីរី ជាមួយប្រជាពលរដ្ឋឈ្មោះ ថៃ ឃីន និងឈ្មោះ អ៊ឹង ចន្ធូ លើទំហំ ២០៣៥ម៉ែត្រការ៉េ ដែលមានទីតាំងស្ថិតនៅភូមិដើមស្រល់ សង្កាត់មនោរម្យ ក្រុងសែនមនោរម្យ ខេត្តមណ្ឌលគីរី។ ក្រោយពីរដ្ឋបាលក៏ដូចជាគណៈកម្មការសុរិយោដីខេត្តបានធ្វើការស្រាវជ្រាវឯកសារពាក់ព័ន្ធ រួមទាំងសាវតាននៃការគ្រប់គ្រងកាន់កាប់ដីធ្លីនេះ ឃើញថា លោកថៃ ឃីន និងអ្នកស្រី អ៊ឹង ចន្ធូ បានកាន់កាប់ដីទំហំ២០៣៥ម៉ែត្រការ៉េ ជាយូរឆ្នាំមកហើយដោយមានលិខិតទទួលស្គាល់ការកាន់កាប់ពីអាជ្ញាធរមូលដ្ឋាន ហើយប្រជាពលរដ្ឋក៏បានប្រើប្រាស់ដីនេះក្នុងជីវភាពរស់នៅជាបន្តបន្ទាប់រហូតមក។ រីឯអង្គភាពអគ្គិសនីខេត្ត អាជ្ញាធរខេត្តបានស្រាវជ្រាវ និងត្រួតពិនិត្យលើឯកសារពាក់ព័ន្ធឃើញថា ក្រសួងរ៉ែ និងថាមពល បានផ្ទេរប្រគល់ដីទំហំតែ ២៨០២ម៉ែត្រការ៉េ ប៉ុណ្ណោះ ជូនអង្គភាពអគ្គិសនីគ្រប់គ្រង និងប្រើប្រាស់ ពុំមានឯកសារណាមួយពាក់ព័ន្ធក្នុងការគ្រប់គ្រងលើទំហំដី ២០៣៥ម៉ែត្រការ៉េ របស់លោកថៃ ឃីន និងអ្នកស្រី អ៊ឹងចន្ធូ នោះឡើយ។
អភិបាលខេត្តមណ្ឌលគីរីបានបញ្ជាក់ថា “… អាជ្ញាធរខេត្តយល់ឃើញថា ការទាមទាររបស់អង្គភាពអគ្គិសនីខេត្តហាក់ដូចជាមានលក្ខណៈមិនសមស្របទៅនឹងស្ថានភាព នៃការគ្រប់គ្រងជាក់ស្តែង ដែលអាចបង្កទំនាស់ស្មុគស្មាញធ្វើឲ្យអាជ្ញាធរមានការលំបាកក្នុងការដោះស្រាយ។ ដូចនេះ ដើម្បីបញ្ចប់ទំនាស់ស្របតាមគោលនយោបាយរបស់រាជរដ្ឋាភភិបាល ក្នុងការដោះស្រាយទំនាស់ជៀសវាងទុកនៅរ៉ាំរ៉ៃអូសបន្លាយយូរអង្វែង អាជ្ញាធរខេត្តសូមសំណូមពរឯកឧត្តមប្រតិភូរាជរដ្ឋាភិបាលទទួលបន្ទុលអគ្គនាយកអគ្គិសនីកម្ពុជា សុំផ្តល់ដីទំហំ ២០៣៥ម៉ែត្រការ៉េ ជូនលោកថៃ ឃីន និងអ្នកស្រី អ៊ឹង ចន្ធូ កាន់កាប់ប្រើប្រាស់ និងអាស្រ័យផល ស្របតាមការទួលស្គាល់ពីអាជ្ញាធរមូលដ្ឋាន និងស្នើសុំអង្គភាពអគ្គិសនីខេត្តគ្រប់គ្រងដីទំហំតែ២៨០២ម៉ែត្រការ៉េ ដែលក្រសួងរ៉ែ និងថាមពល ប្រគល់ជូន និងបានចុះបញ្ជីសារពើភ័ណ្ដរបស់អង្គភាពអគ្គិសនីខេត្តដើម្បីបញ្ចប់ទំនាស់ ”៕ ដោយ៖ CEN
