កណ្តាល ៖ ប្រជាពលរដ្ឋនាំគ្នាទៅស្ទូចត្រី ក៏ប្រទះឃើញសពបុរសម្នាក់អណ្តែតនៅក្នុងរណ្តៅទឹក រួចរត់ទៅប្តឹងសមត្ថកិច្ចឲ្យចុះជួយអន្តរាគមន៍ភ្លាមៗ។ ហេតុការភ្ញាក់ផ្អើលនេះដែរ កើតឡើងនៅវេលាម៉ោង ១០ និង ៣០ នាទីព្រឹក ថ្ងៃទី២៤ ខែវិច្ឆិកា ឆ្នាំ២០២០ ស្ថិតនៅក្នុងភូមិម៉ឺនរៀម ឃុំទួលព្រិច ស្រុកអង់ស្នួល ខេត្តកណ្តាល។
បើយោងតាមប្រភពពីបងប្រុសដែលឃើញហេតុការណ៍បានប្រាប់ខាងព័ត៌មាន CEN ថា មុនពេលកើតហេតុខាងលើ រូបគាត់បានទៅស្ទូចត្រីម្នាក់ឯង នៅក្នុងរណ្តៅទឹក ស្រាប់តែដើមកដល់គាត់បានងើបមើលទៅមុខ ស្រាប់តែឃើញសភាពសពហើមអណ្តែតទឹក រួចគាត់មានការភ័យខ្លាចរត់ទៅប្រាប់អ្នកភូមិ និងរាយការណ៍ទៅសមត្ថកិច្ចឲ្យចុះមកជួយពិនិត្យមើលនៅកន្លែងកើតហេតុភ្លាមៗ។
សពជនរងគ្រោះខាងលើ នៅមិនទាន់ស្គាល់អត្តសញ្ញាណនៅឡើយ។ ក្រោយកើតហេតុខាងលើសមត្ថកិច្ចមូលដ្ឋាន ចុះមកដល់និងទំនាក់ទំនងទៅខាងជំនាញ កោសល្យវិច័យឲ្យចុះមកពិនិត្យ តែនៅមិនទាន់បញ្ជាក់ថា ជាករណីស្លាប់ដោយសារអ្វីឲ្យពិតប្រាកដ។ រួចក៏បានយកសពទៅតម្កល់ទុកនៅវត្ត អោងការ ដើម្បីស្វែងរកសាច់ញាតិបន្ត៕ដោយ៖សាមេត
