ព្រះសីហនុ៖ ករណីអំពើលួចឆក់ ឬ គ្រឿងញៀន បើទោះជាសមត្ថកិច្ចធ្វើការបង្ក្រាបសកម្មយ៉ាងណា ក៏ហាក់ដូចករណីទាំងនេះ នៅតែជាក្តីកង្វល់ និងក៏ដូចជាការព្រួយបារម្ភ សម្រាប់ប្រជាពលរដ្ឋនៅតាមមូលដ្ឋានទូទាំងប្រទេស ព្រោះថា អំពើចោរកម្ម ឆក់ប្លន់ ពិសេសគ្រឿងញៀន គឺនៅតែកើតមានឡើងដដែល ពោលគឺប្រៀបដូចគ្រាន់តែវែកចកអ៊ីចឹង។
ជាក់ស្តែង ដូចជាករណីគ្រឿងញៀនដ៏គឃ្លើននេះជាដើម នៅឯទឹកដីក្រុងព្រះសីហនុ បានធ្វើឲ្យប្រជាពលរដ្ឋកំពុងមានការព្រួយបារម្ភជាខ្លាំង ដោយពួកអ្នកប្រើប្រាស់គ្រឿងញៀន បានកំពុងបានដៃខ្លាំងតែម្តង រហូតដល់ថ្នាក់ប្រជាពលរដ្ឋសឹងលែងហ៊ានចេញពីផ្ទះ ព្រោះពួកវាកើតចេញទង្វើដ៏អាក្រក់ដេញចាប់ស្រីៗដើរយប់ព្រលប់ធ្វើបាបដោយមិនថាយ៉ាងណាខ្លះ។ ក្នុងនោះ ស្រី្តអាជីវករម្នាក់ដែលស្ទើរតែក្លាយជាជនរងគ្រោះ បានប្រាប់ទៅអ្នកកាសែតថា នៅក្រោយហ្គារ៉ាស់សាំងតេលាអូ១ ទល់មុខនឹងផ្សារចិន ស្ថិតក្នុងភូមិ១ សង្កាត់៤ ខណ្ឌមិត្តភាព មានក្មេងស្ទាវមួយក្រុមបាននិងកំពុងចែកចាយគ្រឿងញៀនជារៀងរាល់ថ្ងៃ និងថែមទាំងបង្កការភ័យខ្លាចដល់អ្នកធ្វើដំណើរ ជាពិសេសនារីនារីដែលដើរម្នាក់ឯងពេលយប់ព្រលប់ ។
ស្ត្រីរងគ្រោះខាងលើបានបញ្ជាក់ឲ្យដឹងថា នៅពេលគាត់ដើរមកផ្ទះ ដល់ផ្លូវកែង (កន្លែងឆក់ប្លន់ដ៏សាហាវពីមុន) ពួកសុទ្ធតែបែកថ្នាំ ដែលចែកចាយគ្រឿងញៀនសឹងរាល់ថ្ងៃ តែប៉ូលិសចាប់លែងៗ ក៏ស្រាប់តែពួកវាបញ្ចេះគ្នាវាឲ្យចុះពីម៉ូតូដេញចាប់គាត់ តែសំណាង គាត់មានគ្នា ហើយនៅពេលគាត់ស្រែកខ្លាំងតេទៅប៉ូលិស ពួកវាក៏បានដកថយ។
ស្ត្រីរងគ្រោះនៅបានបន្តថា អ្នកនៅម្តុំនោះប្រាប់ថា ប៉ូលិសមកចាប់រហូតហ្នឹង តែចាប់មេខ្លោងអត់បាន ហើយចាប់រាយរងចាប់ព្រលែងៗ គឺព្រលែងដើម្បីរកមុខមេខ្លោង។ គាត់បន្ថែមថា អំពើឆក់ប្លន់ តាំងពីឯកឧត្តម គួច ចំរើន ឡើងកាន់តំណែងមក គឺលែងកើតមាន ប៉ុន្តែ បញ្ហាគ្រឿងញៀនរាល់ថ្ងៃ។
តាមរយៈកង្វល់នេះ ប្រជាពលរដ្ឋក៏សំណូមពរឲ្យឯកឧត្តម គួច ចំរើន អភិបាលខេត្តព្រះសីហនុ និងព្រមទាំងលោកឧត្តមសេនីយ៍ទោ ជួនណារិន្ទ មេត្តាជួយអន្តរាគមន៍ដល់ពួកគាត់ផង ព្រោះថា ដោយសារតែបញ្ហាគ្រឿងញៀននេះ ជាហេតុធ្វើឲ្យពួកគាត់ព្រួយបារម្ភពីសុវត្ថិភាពភ័យខ្លាចសឹងពុំហ៊ានចេញពីផ្ទះ៕ ដោយ៖ លឹម ហុង
