ភ្នំពេញ៖ ក្រោយពីមានបញ្ហារវាងតារាចម្រៀង VannDa និងក្រុមហ៊ុនស្មាត ទាក់ទងនិងកុងត្រាការងាររហូតដល់ក្រុមហ៊ុនស្មាតបានដាក់ពាក្យបណ្តឹងតារាចម្រៀង VannDa ស្រាប់តែក្រុមហ៊ុន Cellcard បានប្រកាសជាសាធារណៈស្វាគមន៍ VannDa ក្នុងនាមជាទូតសុច្ឆន្ទៈថ្មីរបស់ខ្លួន។
តាមរយៈផេកហ្វេសបុកផ្លូវការរបស់ក្រុមហ៊ុន Cellcard បានបង្ហោះជាសាធារណៈកាលពីថ្ងៃម្សិលមិញថា «ស្វាគមន៍ Vann Da – វណ្ណដា ជាសិល្បករពេញដោយទេពកោសល្យរបស់ខ្មែរយើងម្នាក់ មកកាន់គ្រួសារ សែលកាត ជាទូតសុច្ឆន្ទៈថ្មី ពួកយើងនឹងចូលរួមជាមួយគ្នា ក្នុងការបង្កើតស្នាដៃសិល្បៈថ្មីៗ ដើម្បីឲ្យពិភពលោកទទួលស្គាល់ស្នាដៃកូនខ្មែរយើង និងចូលរួមជាមួយគ្នាក្នងកិច្ចការងារសង្គមនានា!
សូមចូលរួមស្វាគមន៍គាត់ទាំងអស់គ្នា »។ ក្រោយការប្រកាសជាសាធារណៈបែបនេះ បានធ្វើឱ្យអ្នកគាំទ្រមានការភ្ញាក់ផ្អើលជាខ្លាំង ដោយសារទើបតែឃើញលោក VannDa ចេញវីដេអូបកស្រាយរឿងមានបញ្ហាជាមួយក្រុមហ៊ុនស្មាតក្តៅៗមិនទាន់និងដឹងថាទៅជាយ៉ាងណាផង ស្រាប់តែទទួលបានកុងត្រាការងារជាទូតសុច្ឆន្ទៈថ្មីរបស់ក្រុមហ៊ុន Cellcard ទៅហើយ។
គួរបញ្ជាក់ផងដែរថា កាលពីថ្ងៃម្សិលមិញតារាចម្រៀង VannDa បានបង្ហោះវីដេអូមួយដែលមានរយៈពេលជាង៧នាទី ធ្វើការបកស្រាយនិងចោទជាសំណួរជាច្រើន ក្រោយពីខ្លួនបានទទួលបានដីកាកោះពីតុលាការយោងតាមពាក្យបណ្តឹងរបស់ក្រុមហ៊ុនស្មាត។ ដោយក្នុងនោះលោកក៏បានបញ្ជាក់ថា កុងត្រារវាងលោកនិងក្រុមហ៊ុនស្មាត បានចប់ទៅហើយ ហើយការបន្តកុងត្រាទៀតឬយ៉ាងណាខាងតំណាងរបស់លោកក៏បានជជែកជាមួយក្រុមហ៊ុនស្មាតដែរតែក៏ត្រូវក្រុមហ៊ុនស្មាតស្នើដកលក្ខណមួយចំនួន និងជជែកឡើងវិញពីតម្លៃនិងសេវាផ្សេងៗ។ ក្រោយពីការជជែកនោះ អស់រយៈពេលប្រមាណ៦ខែ លោកក៏មិនទទួលបានដំណឹង ឬPayment អ្វីពីខាងក្រុមហ៊ុនដែរ៕ ដោយ៖ កូលាប ក្រហម
