ភ្នំពេញ៖ នេះជាខណៈពេលដ៏ស្លុតរន្ធត់ខ្លាំងណាស់ នៅពេលដែលបានឃើញក្នុងវីដេអូបុរសជនជាតិចិនមានមាឌធំម្នាក់ បានប្រើអំពើហិង្សាទៅលើប្រពន្ធខ្លួនជាជនជាតិខ្មែរយ៉ាងសាហាវព្រៃផ្សៃ នៅចំពោះមុខកូនស្រី និងបុគ្គលិករបស់ខ្លួន កាលពីវេលាម៉ោងជាង ៨ យប់ថ្ងៃទី២៣ ខែវិច្ឆិកា ឆ្នាំ២០២០ កន្លងទៅនេះ ស្ថិតនៅផ្ទះលេខ 67B ផ្លូវលេខ310 សង្កាត់បឹងកេងកងទី២ ខណ្ឌបឹងកេងកង រាជធានីភ្នំពេញ។
បុរសជនជាតិចិនជាប្តីនោះមានឈ្មោះ ឈិន ស៊ាអ៊ី អាយុ ៤២ ឆ្នាំ និងស្ត្រីជាប្រពន្ធមានឈ្មោះ ជីវ ស៊ុយងីង អាយុ ៣១ ឆ្នាំ។ អ្នកទាំងពីរមានកូនស្រី២នាក់ ដែលជាចំណងដៃនៃអាពាហ៍ពិពាហ៍ស្របច្បាប់អស់រយៈពេលជិត ១០ ឆ្នាំ។
លទ្ធផលនៃអំពើហិង្សាដ៏សាហាវនេះ ស្ត្រីជាប្រពន្ធខាងលើ បានទទួលរងរបួសធ្ងន់ធ្ងរច្រើនកន្លែងក្នុងនោះរួមមាន៖ ត្រង់ចំណុក, សៀតផ្កាខាងឆ្វេង, ត្របកលើក្រោមនៃភ្នែកខាងឆ្វេង, ជង្គង់ខាងស្តាំ និងកែងដៃខាងឆ្វេង។
យោងតាមពាក្យបណ្តឹង ស្ត្រីរងគ្រោះបានប្រាប់ពីមូលហេតុ ដែលនាំឲ្យប្តីជនជាតិជាប្តីរូបនេះ មានចិត្តកំណាចមកលើរូបនាងយ៉ាងសាហាវបែបនេះ គឺដោយសារកូនស្រីពៅរបស់ពួកគេ បានកាន់រំពាត់ធ្វើឲ្យប៉ះពៀរវង់ផឹកស៊ីរបស់ប្តី ហើយនៅពេលនោះប្តីបានស្តីគំហកឲ្យថាមិនចេះមើលកូន ចុះបើកាន់ប៉័ងតោ ឬ កាំភ្លើង មិនបាញ់គេឯងងាប់អស់ហើយ! ។ បន្ទាប់មក រូបនាងក៏បានឆ្លើយថា កូនធ្វើបែបនេះក៏ព្រោះតែកូនបានមើលវីដេអូឪវាប្រើហិង្សាច្របាច់កម៉ែវា។ ឮបែបនេះ បុរសជាប្តីជនជាតិចិនឈ្មោះ ឈិន ស៊ាអ៊ី ក៏បានសុំមើលវីដេអូ តែនាងពុំឲ្យខ្លាចបោកទូរស័ព្ទ ក៏បានផ្ទុះកំហឹងខ្លាំងក្លាបែបនេះតែម្តង។
ជាមួយនឹងទង្វើដ៏ព្រៃផ្សៃនេះ ស្ត្រីជាប្រពន្ធក៏បានប្តឹងទាមទារសំណងជំងឺចិត្តពីប្តីជនជាតិចិនរបស់ខ្លួនចំនួន ៥ ម៉ឺនដុល្លារ៕ ដោយ៖ លឹម ហុង