ភ្នំពេញ៖ តារាសម្តែងជើងចាស់តួយាយផាន់ ក្នុងរឿងទុំទាវ ត្រូវម៉ូតូមួយគ្រឿងបានបើកមកបុកពីក្រោយ បណ្តាលឱ្យរងរបួសបែកក្បាលរួចរត់គេចខ្លួនបាត់។ ហេតុការណ៍នេះបានកើតឡើងនៅម្តុំក្រោយព្រះបរមរាជវាំង រាជធានីភ្នំពេញ។
ហើយបើតាមប្រភពព័ត៌មានក្នុងស្រុកមួយបានឱ្យដឹងថា អ្នកគ្រូ កាន់ សុវណ្ណនី ដែលទស្សនិកជនស្គាល់ថាជាតួយាយផាន់ ក្រោយរងគ្រោះថ្នាក់បច្ចុប្បន្នកំពុងសម្រាកព្យាបាលនៅផ្ទះលេខ៣៤២e២z សង្កាត់មិត្តភាព ខណ្ឌ៧មករា រាជធានីភ្នំពេញ។
យ៉ាងណាក៏ដោយក្រោយពីទទួលបានដំណឹងនេះ អ្នកលេងបណ្តាញសង្គមជាច្រើនបានខមិនជូនពរសូមឱ្យអ្នកគ្រូ កាន់ សុវណ្ណនី ឆាប់ជាសះស្បើយ ហើយក៏មានសប្បុរសជនបានផ្តល់ថវិកាមួយចំនួនដល់អ្នកគ្រូ កាន់ សុវណ្ណនី តាមរយៈលោក អ៉ឹម ជីវ៉ា ផងដែរ។
គួររំលឹកថា អ្នកគ្រូ កាន់ សុវណ្ណនី គឺជាតារាសម្តែងជើងចាស់មួយរូបដែលមានទេពកោសល្យសិល្បៈមិនធម្មតា ហើយល្បីល្បាញយ៉ាងខ្លាំងរហូតមកដល់ពេលបច្ចុប្បន្ន ក្រោយពីសម្តែងជាតួម្តាយក្នុងរឿងទុំទាវ ដែលបានបង្ហាញពីចរិតកាចឆ្នាស់ឆ្នើមចំពោះកូនស្រី ហើយដាច់ខាតមិនលើកកូនឱ្យទុំដែលជាអ្នកក្រីក្រឡើយ ទោះមានបញ្ជាពីស្តេចផែនដីក៏ដោយ គ្រប់យ៉ាងគឺដើម្បីឱ្យកូននិងខ្លួនបានខ្ពស់មុខខ្ពស់មាត់ មានទ្រព្យចាយមិនអស់៕ ដោយ៖ កូលាប ក្រហម