ភ្នំពេញ៖ បុរសម្នាក់ត្រូវបានរថយន្តបុកហើយកិនស្លាប់បាត់បង់ជីវិតភ្លាមៗ ក្រោយពេលកំពុងជិះម៉ូតូធ្វើដំណើរពីលិចទៅកើត តាមបណ្ដោយផ្លូវ ២៧១ ។ ហេតុការណ៍នេះបានកើតឡើងកាលពីវេលាម៉ោង២និង២នាទីរសៀល ថ្ងៃទី ២៧ ខែវិច្ឆិកាឆ្នាំ ២០២០ នៅត្រង់ចំណុចស្ថានីយបូមទឹកបឹងត្របែក ស្ថិតក្នុងសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ។
តាមប្រភពព័ត៌មានដែលក្រុមការងារយើងទទួលបានពីកន្លែងកើតហេតុ បានឲ្យដឹងថា បុរសដែលបានស្លាប់បាត់បង់ជីវិតនោះ គឺមានឈ្មោះ ប៊ុត សុភ័ក្ដ្រ អាយុ ៣០ ឆ្នាំមានមុខរបរជាជាងកាត់សក់ សព្វថ្ងៃស្នាក់នៅក្នុងសង្កាត់ក្បាលកោះ ខណ្ឌច្បារអំពៅ ជិះម៉ូតូមួយគ្រឿងម៉ាក QBTX ពណ៌ខ្មៅ ពាក់ផ្លាកលេខភ្នំពេញ1GU 65-99 បើកបរក្នុងទិសដៅពីលិចទៅកើតតាមបណ្ដោយផ្លូវ ២៧១ រីឯរថយន្តបង្កវិញម៉ាកហ៊ីយ៉ាន់ដាយចង្កូតស្ដាំ ពណ៌សពាក់ផ្លាកលេខTk-19-85 អ្នកបើកបរមានឈ្មោះ ហឿនរ៉ាត់ ភេទប្រុស អាយុ២៨ឆ្នាំ រស់នៅស្រុកបរសេដ្ឋ ខេត្តកំពង់ស្ពឺ ។
តាមប្រភពពីប្រជាពលរដ្ឋបានឲ្យដឹងថា នៅមុនពេលកើតហេតុ គេបានឃើញជនរងគ្រោះជិះម៉ូតូម្នាក់ឯង តាមបណ្ដោយផ្លូវ២៧១ ស្របទិសដៅគ្នាជាមួយនឹងរថយន្តបង្ក ខណៈពេលមកដល់និងត្រង់ស្ថានីយបូមទឹកបឹងត្របែក ក៏ស្រាប់តែមានម៉ូតូមួយគ្រឿងទៀតមិនចាំម៉ាកបានទាក់ដៃចង្កូតគ្នា បណ្ដាលឱ្យម៉ូតូរបស់ជនរងគ្រោះដួលក៏ស្រាប់តែមានរថយន្តដឹកខ្សាច់ មកពីក្រោយកិនបែកក្បាលស្លាប់ភ្លាមនៅនឹងកន្លែងកើតហេតុតែម្ដង។
រួចក៏ព្យាយាមបើករត់រហូតទៅដល់ផ្លូវ ៦០ ម៉ែត្រ ទើបសមត្ថកិច្ចដេញពីក្រោយតាមចាប់ឃាត់ខ្លួន បានទាំងរថយន្តបានទាំងអ្នកបើកបរបង្ក ។
រីឯសាកសពជនរងគ្រោះ ត្រូវបានសមត្ថកិច្ចជំនាញប្រគល់ទៅឲ្យក្រុមគ្រួសារ ដឹកយកទៅរក្សាទុកនៅវត្តកៀនស្វាយក្នុងធ្វើបុណ្យតាមប្រពៃណី ។
ក្រោយកើតហេតុ សមត្ថកិច្ចមូលដ្ឋានក៏បានចុះមកដល់ ដើម្បីធ្វើការវាស់វែង និងយកម៉ូតូជនរងគ្រោះ ព្រមទាំងរថយន្តបង្កទៅរក្សាទុកនៅការិយាល័យចរាចរណ៍ជើងគោក រង់ចាំដោះស្រាយគ្នាទៅតាមផ្លូវច្បាប់ ៕ដោយ៖ហេងវុត្ថា
