ភ្នំពេញ ៖ ក្នុងគោលបំណងចូលរួមចំណែកពង្រឹងការអនុវត្តច្បាប់ចរាចរណ៍ផ្លូវគោក ដើម្បីបញ្ជៀសគ្រោះថ្នាក់ចរាចរណ៍ ដែលជាឃាតករនៅលើដងផ្លូវ បង្កឲ្យខូចខាតទ្រព្យសម្បត្ដិ អាយុជីវិតមនុស្ស កាលពីថ្ងៃទី២៧ ខែវិច្ឆិកា ឆ្នាំ២០២០ គណៈបញ្ជាការឯកភាពរដ្ឋបាលខណ្ឌកំបូល បានត្រួតពិនិត្យអ្នកបើកបរ និងព្រូរថយន្តចំនួន ១៦០នាក់ ក្នុងនោះធ្វើតេស្តទឹកនោមរកសារជាតិញៀន រកឃើញអ្នកផ្ទុកសារធាតុញៀនចំនួន ៩នាក់។
បច្ចុប្បន្នក្រុមការងារបានបញ្ជូនអ្នកបររថយន្ត ដែលមានផ្ទុកសារជាតិញៀនខាងលើ និងវត្ថុតាងទៅអធិការដ្ឋាននគរបាលខណ្ឌកំបូល ដើម្បីបន្តចាត់ការតាមនីតិវិធីច្បាប់។
មន្ត្រីសាលាខណ្ឌបានឱ្យដឹងថា ៖ លោក ឃឹម ស៊ុនសូដា អភិបាលខណ្ឌកំបូល និងជាប្រធានគណៈបញ្ជាការឯកភាពរដ្ឋបាលខណ្ឌកំបូល បានបែងចែក មន្ត្រីសាលាខណ្ឌ ដឹកនាំដោយលោក ទ្រី ណារ៉េត និងលោក គន់ ចាន់សុភារី នាយករងរដ្ឋបាល ដោយមានការចូលរួមសហការពី មន្ត្រីនគរបាលអធិការដ្ឋាននគរបាលខណ្ឌ មន្ត្រីមូលដ្ឋានកងរាជអាវុធខណ្ឌ ព្រមទាំងមន្ត្រីសន្តិសុខសណ្ដាប់ធ្នាប់ខណ្ឌ បានដាក់គោលដៅត្រួតពិនិត្យអ្នកបើកបររថយន្តដឹកដី និងព្រូ ដើម្បីធ្វើតេស្តទឹកនោមរកសារជាតិញៀន ដោយបែងបែងចែកជា ២ក្រុមដូចខាងក្រោម៖ក្រុមទី១: គោលដៅផ្លូវលេខ ៤២ ចំនុចភូមិបឹងធំទី១ សង្កាត់បឹងធំ ខណ្ឌកំបូល ដឹកនាំដោយលោក ទ្រី ណារ៉េត នាយករងរដ្ឋបាលខណ្ឌ។ក្រុមទី២: គោលដៅ ផ្លូវលេខ៤២ ចំនុចភូមិអំពិល សង្កាត់កំបូល ដឹកនាំដោយ លោក គន់ ចាន់សុភារី នាយករងរដ្ឋបាលខណ្ឌ៕ដោយ៖បញ្ញាស័ក្តិ
