កំពង់ឆ្នាំង ៖ កងរាជអាវុធហត្ថខេត្តកំពង់ឆ្នាំង បានឃាត់ខ្លួនជនសង្ស័យ ១ នាក់ ពីបទប្រើប្រាស់ផ្លាកលេខក្លែងក្លាយ ហើយបានកសាងសំណុំរឿង បញ្ជូនទៅសាលាដំបូងខេត្ត រីឯវត្ថុតាងរក្សាទុកនៅសាខាគយ និងរដ្ឋាករខេត្ត។អាវុធហត្ថខេត្តកំពង់ឆ្នាំង បានបញ្ជាក់ថា ការឃាត់ខ្លួនបុរសម្នាក់ និងរថយន្ត LEXUS RX 400h កែច្នៃមួយគ្រឿង យោងតាមដីកាសម្រេចឱ្យបើកការស៊ើបអង្កេតជាក់ស្តែង ពីស្ថាប័នអយ្យការខេត្តកំពង់ឆ្នាំង ដើម្បីយកសួរនាំដោយសង្ស័យជាប់ពាក់ព័ណ្ធអំពើចោរកម្ម ឬការក្លែងបន្លំផ្លាកលេខ។
បើតាមកងរាជអាវុធហត្ថខេត្តកំពង់ឆ្នាំង បានឲ្យដឹងថា នៅវេលាម៉ោង ១៧:៣៥ នាទី ថ្ងៃទី២៧ ខែវិច្ឆិកា ឆ្នាំ២០២០ នៅចំណុចភូមិទី១ សង្កាត់ខ្សាម ក្រុងកំពង់ឆ្នាំង កម្លាំងកងរាជអាវុធហត្ថខេត្តចំនួន ៥ នាក់ មធ្យោបាយរថយន្ត ១ គ្រឿង ដឹកនាំដោយលោកវរសេនីយ៍ទោ ហង្ស សុជាតិ មេបញ្ជាការរង ទទួលផែនយុត្តិធម៌ និងដោយមានការសម្របសម្រួលពី ឯកឧត្តម អ៊ិត សុធា ព្រះរាជអាជ្ញារងអមសាលាដំបូងខេត្ត បានចុះធ្វើការឃាត់ខ្លួនជនសង្ស័យ ១ នាក់ ឈ្មោះ ឃឹម ប៊ុនធឿន ភេទប្រុស អាយុ ២៧ ឆ្នាំ ទីលំនៅភូមិស្មែត ឃុំស្វាយជ្រុំ ស្រុករលាប្អៀរ ពីបទប្រើប្រាស់ស្លាកលេខក្លែងក្លាយ ។
វត្ថុតាងដកហូតរួមមាន : -រថយន្ត Lexus RX 400 h ពណ៌ស ០១ គ្រឿង -ផ្លាកលេខរថយន្តចំនួន ០២ សន្លឹក – ទូរស័ព្ទដៃចំនួន ០១ គ្រឿង ។
ជនសង្ស័យ ឃឹម ប៊ុនធឿន នេះមានមុខរបរជាម្ចាស់ការ៉ាសជួសជុលរថយន្តមួយកន្លែង និងជាឈ្មួញដុះស្លែរកស៊ីទិញលក់តែរថយន្តអត់ពន្ធទំនើបៗ ដូចជា៖ CAMERY 2012, TUNTRA 2020, GS300, LEXUS RX 330 ឬ RX 400h, MAZDA PICK UP និងរថយន្តស៊េរីទំនើបៗជាច្រើនទៀត ដោយរថយន្តមួយគ្រឿងៗតម្លៃចន្លោះពី ៧,៥០០ដុល្លារ ឬត្រឹម២០,០០០ដុល្លារ ហើយការទិញលក់នោះ ខ្លួនមានបក្ខពួកខ្លួន និងឈ្មួញមួយចំនួនចាំទិញរថយន្តទាំងនោះ។ រីឯឯកសារគឺជនសង្ស័យ ឃឹម ប៊ុនធឿន ជាអ្នកជួយរៀបចំឯកសារក្លែងក្លាយឱ្យ និងជាអ្នកបំពាក់ផ្លាកលេខរថយន្តក្លែង ដែលខ្លួនបានទិញពីក្រុមចោរឱ្យថែមទៀតផង។ ចំពោះផ្លាកលេខរថយន្ត គឺជាផ្លាកលេខដែលចោរលួច យកមកលក់ឱ្យជនសង្ស័យ ឃឹម ប៊ុនធឿន ដែលជនរូបនេះតែងតែទិញទុក ដើម្បីទុកសម្រាប់បំពាក់លើរថយន្ត។ ដោយឡែករថយន្តដែលឃាត់បានខាងលើនេះ សមត្ថកិច្ចកំពុងតែស៊ើបអង្កេតបន្តថាតើជារថយន្តដែលលួចគេមក ឬជារថយន្តបានទិញមកពីណា។
គួរបញ្ជាក់ថា រថយន្តម៉ាក LEXUS RX 400h ពណ៌ស ដែលពាក់ផ្លាកលេខ ភ្នំពេញ BD-9326 ក្រោយការស្រាវជ្រាវ ឃើញថា ជាផ្លាកលេខរបស់រថយន្ត តូយូតាហាយឡិនឌឺ (HIGH LANDER) ស៊េរីឆ្នាំ២០០២ ពណ៌ខ្មៅ និងមានម្ចាស់កម្មសិទ្ធិឈ្មោះ GUO CHAOYANG (គ័រ ឆូវយ៉ាង) រស់នៅភ្នំពេញ មិនមែនជាផ្លាកលេខរថយន្ត LEXUS RX 400h ពណ៌សនោះឡើយ។
បច្ចុប្បន្នជនសង្ស័យការិយាល័យជំនាញ កសាងសំណុំរឿងបញ្ជូនទៅសាលាដំបូងខេត្ត រីឯវត្ថុតាងរក្សាទុកនៅសាខាគយ និងរដ្ឋាករខេត្ត ៕ដោយ៖បញ្ញាស័ក្តិ
