ព្រះសីហនុ៖ ផលិតផលជាឱសថបំប៉នសុខភាព ដែលហួសកាលបរិច្ឆេទប្រើប្រាស់សរុបចំនួន ៤ទូកុងតឺន័រ ស្មើនឹង ៣៣០កេស របស់ក្រុមហ៊ុន JIN HAE INVESTMENT CO.,LTD ត្រូវបានមន្ត្រីសាខា ក.ប.ប. ខេត្តព្រះសីហនុ រកឃើញ និងដកហូត។
បន្ទាប់ពីទទួលបានការស្នើសុំកិច្ចសហការពីសាខាគយ និងរដ្ឋាករកម្ពុជា មន្ត្រីសាខានៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំខេត្តព្រះសីហនុ (ក.ប.ប. ) សហការគ្នាត្រួតពិនិត្យ និងវាយតម្លៃគុណភាពផលិតផលឱសថបំប៉នសុខភាព មានប្រភពមកពីប្រទេសក្រៅចំនួន ៤ទូកុងតឺន័រ របស់ក្រុមហ៊ុន JIN HAE INVESTMENT CO.,LTD នៅថ្ងៃព្រហស្បតិ៍ ទី៣ ខែធ្នូ ឆ្នាំ២០២០ នេះ។
ក្នុងសកម្មភាពចុះត្រួតពិនិត្យ មន្ត្រីជំនាញបានត្រួតពិនិត្យលើផលិតផលឱសថបំប៉នសុខភាពរួមមាន៖ -OCTA-Z ចំនួន ៣០ប៉ាឡែត ស្មើនឹង ១២៦កេស -CHANGE ចំនួន ២ប៉ាឡែត ស្មើនឹង ៤៨កេស -YA HWANG SAM ចំនួន ៤ប៉ាឡែត ស្មើនឹង ៩៦កេស -GAN BO HO ចំនួន ២ប៉ាឡែត ស្មើនឹង ៦០កេស។
ជាលទ្ធផល ផលិតផលបំប៉នសុខភាពខាងលើ ហួសកាលបរិច្ឆេទប្រើប្រាស់ទាំងអស់។ បន្ទាប់មក សមត្ថកិច្ចចម្រុះ បានកិបសៀលើទូកុងតឺន័ររក្សាទុក នៅទីលានកំពង់ផែ និងរង់ចាំម្ចាស់ទំនិញចូលមកដោះស្រាយតាមនីតិវិធីច្បាប់៕រក្សាសិទ្ធិដោយ៖បញ្ញាស័ក្តិ
