ភ្នំពេញ៖ បុរសម្នាក់បានបើករថយន្ដរបស់ខ្លួន ចេញពីកន្លែងឃ្លាំងលក់រថយន្តមួយកន្លែង ប្រហែលជាច្រឡំជាន់ហ្គាស្មានតែហ្រ្វាំង ក៏ជ្រុលទៅបុកនឹងរបាំងថ្មពុះចែកទ្រូងផ្លូវ ពេញទំហឹង បណ្ដាលឱ្យរងការខូចខាតយ៉ាងដំណំ ហើយកើលម៉ាស៊ីនរថយន្ត ទៅមុខលែងរួច ។
ហេតុការណ៍នេះ បានកើតឡើងកាលពីវេលាម៉ោង ៥ នឹង ៣០ នាទីល្ងាច ថ្ងៃទី៥ ខែធ្នូ ឆ្នាំ២០២០ ស្ថិតតាមបណ្ដោយផ្លូវលេខ២១៥ ក្នុងសង្កាត់ផ្សារដេប៉ូទី២ ខណ្ឌទូលគោក រាជធានីភ្នំពេញ ។
យោងតាមប្រភពព័ត៌មាន ដែលយើងទទួលបាន ពីកន្លែងកើតហេតុ បានប្រាប់ឲ្យដឹងថា នៅមុនពេលកើតហេតុ គេបានឃើញបុរសម្នាក់ បើករថយន្តម៉ាកហាយឡិនឌ័រ ពណ៌ស ថែមទាំងមិនទាន់មានផ្លាកលេខផងនោះ ចេញពីឃ្លាំងលក់រថយន្តមួយកន្លែង ខ្វះការប្រុងប្រយ័ត្ន ក៏ជ្រុលទៅបុកនឹងរបាំងទ្រូងផ្លូវពេញទំហឹង បណ្ដាលឲ្យបាក់ចំនួន៤កង់ ទើបរថយន្តទៅមុខលែងរួច តែសំណាងល្អ មិនបណ្ដាលឲ្យមានអ្នករងរបួសនោះទេ។
ក្រោយកើតហេតុ សមត្ថកិច្ចមូលដ្ឋានក៏បានចុះទៅដល់ រួចទាក់ទងទៅផ្នែកជំនាញចរាចរណ៍ក្រុង ឱ្យចុះមកធ្វើការវាស់វែង និងស្ទូចរថយន្តបង្ក យកទៅរក្សាទុកនៅឯចរាចរណ៍ជើងគោករាជធានីភ្នំពេញ ដើម្បីទុកដោះស្រាយគ្នា ទៅតាមផ្លូវច្បាប់ ៕ រក្សាសិទ្ធិដោយ៖ហេងវុត្ថា
