បាត់ដំបង ៖ កម្លាំងប៉ូលិសការិយាល័យប្រឆាំងគ្រឿងញៀនខេត្តបាត់ដំបង បានចាប់បុរសម្នាក់ជួញដូរគ្រឿងញៀន និងថ្នាំម៉ាទឹកកក១០ថង់ ថ្នាំយ៉ាម៉ា៥គ្រាប់ កសាងសំណុំរឿងបញ្ជូនទៅតុលាការ នៅថ្ងៃទី៩ខែធ្នូឆ្នាំ២០២០។
លោកសុខ និមល នាយការិយាល័យប្រឆាំងបទល្មើសគ្រឿងញៀនខេត្តបាត់ដំបង បានឲ្យដឹងថា ជនសង្ស័យម្នាក់ដែលចាប់ឃាត់ខ្លួនឈ្មោះឌុំ ហុន ភេទប្រុសអាយុ២២ឆ្នាំ មានទីលំភូមិដីក្រហម ឃុំតាសែន ស្រុកកំរៀង ខេត្តបាត់ដំបង។ ក្នុងប្រតិបត្តិការនេះ កម្លាំងដកហូតបានថ្នាំម៉ាទឹកកក១០ថង់ ថ្នាំយ៉ាម៉ាចំនួន៥គ្រាប់ ហើយចាប់ឃាត់ខ្លួន កាលពីម៉ោង១៤និង០០នាទី ថ្ងៃទី០៨ខែធ្នូឆ្នាំ២០២០ នៅចំណុចក្រុមទី១២ ភូមិអូរអន្លក់ ឃុំតាសែន ស្រុកកំរៀង ខេត្តបាត់ដំបង។
លោកសុខ និមលបានបញ្ជាក់ថា កម្លាំងបានសហការជាមួយកម្លាំងប៉ូលិសស្រុក ចុះបង្ក្រាបបានករណីរនេះ ហើយចាប់ឃាត់ខ្លួនជនសង្ស័យម្នាក់ និងវត្ថុតាងបានភ្លាមៗជាក់ស្ដែងតែម្ដង។ បច្ចុប្បន្ននេះ កម្លាំងបានកសាងសំណុំរឿង បញ្ជូនជនសង្ស័យនិងវត្ថុតាងទៅតុលាការ ដើម្បីចាត់ការទៅតាមផ្លូវច្បាប់ ៕ដោយ៖អ៊ុងសារុំ
