ភ្នំពេញ៖ អ្នកនាងស្រីអូន ដែលល្បីល្បាញខាងការងារសង្គម និងជាម្ចាស់ក្រុមហ៊ុនផលិតផលសុខភាពល្បីឈ្មោះមួយ ថ្មីៗនេះបានទទួលតារាសម្តែងជើងចាស់៤រូប ធ្វើជាម្តាយចិញ្ចឹម ក្រោយពីដឹងថាពួកគាត់សុទ្ធតែមានជីវភាពខ្វះខាតខ្លាំង រហូតដល់គ្មានលុយបង់ថ្លៃបន្ទប់ជួល និងត្រូវប្រកបរបរលាងចានឱ្យគេ។
តាមរយៈផេកហ្វេសប៊ុកផ្ទាល់ អ្នកនាងស្រីអូនបានថ្លែងថា «នាងខ្ញុំស្រីអូននិងស្វាមី បានទទួលតារាជើងចាស់ ដែលមានជីវភាពខ្វះខាត មកធ្វើជាម្ដាយធម៌ដើម្បីផ្គត់ផ្គង់ និងមើលថែថ្ងៃនេះមានម្ដាយធម៌ដល់ទៅ៤នាក់ កូននឹងទិញធានារ៉ាប់រងសុខភាពជូនម៉ែ ផ្ដល់ដើមទុនរកស៊ីជូនម៉ែ ផ្ដល់កន្លែងស្នាក់នៅ និងថវិកាម៉ែខានលែងដើរលាងចានឱ្យគេទៀតហើយ កូនបានសងថ្លៃផ្ទះដែលម៉ែជំពាក់គេរួចរាល់ហើយ ឈប់យំទៅម៉ែ បងប្អូនគ្រប់គ្នាមិននឹកស្មានថាម៉ែៗពិបាកដល់ថ្នាក់នេះទេ កូនបានជួយម៉ែៗហើយ ជូនបុណ្យផងបងប្អូនខ្មែរ»។
ក្រោយពីដំណឹងនេះត្រូវបានចែកចាយ អ្នកលេងបណ្តាញសង្គមជាច្រើន រួមជាមួយអ្នកសិល្បៈផងដែរ បានខមិនអបអរសាទរ និងចែករំលែកបន្តបន្ទាប់ ត្រេកអរនិងរំភើបជំនួសចំពោះទឹកចិត្តដ៏ប្រពៃនេះ។
គួរបញ្ជាក់ថា មិនត្រឹមតែតារាសម្តែង៤រូបនេះទេ ដែលអ្នកនាងស្រីអូនទទួលរ៉ាប់រងចិញ្ចឹមនិងផ្គត់ផ្គង់ សព្វថ្ងៃនេះអ្នកនាងក៏មានកូនចិញ្ចឹម ដែលជាក្មេងកំព្រារាប់រយនាក់ផ្សេងទៀត ដែលកំពុងទទួលការផ្គត់ផ្គង់ផងដែរ៕ រក្សាសិទ្ធិដោយ៖ កូលាប ក្រហម
