ភ្នំពេញ៖ រដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ បានធ្វើការអំពាវនាវដល់បងប្អូនប្រជាពលរដ្ឋខ្មែរ ដែលមានបំណងចង់ធ្វើ ផ្អក ប្រហុក និងត្រីឆ្អើ សម្រាប់ទុកបរិភោគប្រចាំឆ្នាំនោះ អញ្ជើញទៅទិញត្រីក្នុងខែបុស្សនេះ ។ ត្រីឆ្នាំ២០២០នេះអាចនឹងមានច្រើនជាងរាល់ឆ្នាំ នៅក្នុងរាជធានីភ្នំពេញ និងខេត្តកណ្តាលនោះ។
យោងតាមសេចក្តីជូនដំណឹងរបស់រដ្ឋបាលជលផល ដែលប៊ីធីវីទទួលបាន នាថ្ងៃទី១៧ ខែធ្នូ ឆ្នាំ២០២០នេះ បានឲ្យដឹងថា នៅក្នុងរដូវនេសាទឆ្នាំ២០២០–២០២១នេះ បន្ទាប់ពីបានធ្វើការសង្កេតតាមដានលើកម្ពស់ទឹកដែលហូរចេញពីបឹងទន្លេសាបរួចមក ឃើញថាកន្លងដាយនៅតាមដងទន្លេសាប ក្នុងភូមិសាស្ត្ររាជរាជធានីភ្នំពេញ និងខេត្តកណ្តាល អាចនេសាទត្រីបានច្រើននៅក្នុងខែបុស្សនេះ គឺចាប់ពីថ្ងៃទី២០ រហូតដល់ថ្ងៃទី២៦ ខែធ្នូ ឆ្នាំ២០២០ខាងមុខនេះ ប្រសិនបើផ្ទៃមេឃស្រឡះល្អ គ្មានភ្លៀងកក់ខែ ឬទទួលរងឥទ្ធិពលព្យុះជាដើមនោះ៕ រក្សាសិទ្ធិដោយ៖បញ្ញាស័ក្តិ
