កណ្តាល ៖ កម្លាំងអធិការដ្ឋាននគរបាលស្រុកមុខកំពូល បានអនុវត្តដីកាបង្គាប់ឲ្យចាប់ខ្លួន ជនជាប់ចោទម្នាក់ ពីបទលួចលក់អចលនទ្រព្យរបស់អ្នកដទៃ កាលពី ថ្ងៃទី១៧ ខែធ្នូ ឆ្នាំ២០២០ វេលាម៉ោង១៦និង៣០នាទីរសៀល នៅចំណុចភូមិជ្រែមួយរយ ឃុំសំបួរមាស ស្រុកមុខកំពូល ខេត្តកណ្តាល ។ លោក អាត ច័ន្ទដារា ចៅក្រមស៊ើបសួរ នៃសាលាដំបូងខេត្តកណ្តាល បានសម្រេចបញ្ជាដល់ប្រធានពន្ធនាគារខេត្ត ទទួលឃុំខ្លួនបុគ្គលនេះ។
ការឃាត់ខ្លួនជនជាប់ចោទនេះ ដោយកម្លាំងអធិការដ្ឋាននគរបាលស្រុកមុខកំពូលដឹកនាំដោយលោកអធិការនគរបាលស្រុក លោកអធិការរងទទួលផ្នែកនគរបាលយុត្តិធម៌ សហការជាមួយកម្លាំងប៉ុស្តិ៍នគរបាលរដ្ឋបាលសំបួរមាស ទើបអាចឃាត់ខ្លួនជនជាប់រូបនេះបាន ។ ជនជាប់ចោទឈ្មោះ យឹម សំអុល ភេទប្រុស អាយុ៤១ឆ្នាំ ជនជាតិខ្មែរ មុខរបរ កសិករ ទីលំនៅបច្ចុប្បន្ន ភូមិជ្រែមួយរយ ឃុំសំបួរមាស ស្រុកមុខកំពូល ខេត្តកណ្តាល ត្រូវចាប់ខ្លួនយោងតាមដីកាបង្គាប់ឲ្យចាប់ខ្លួនលេខ៩១៥ដកបចខ ចុះថ្ងៃទី២៧ ខែវិច្ឆិកា ឆ្នាំ២០២០ របស់លោក អាត ច័ន្ទដារា ចៅក្រមស៊ើបសួរ នៃសាលាដំបូងខេត្តកណ្តាល ពីបទ ៖ លួចលក់អចលនទ្រព្យរបស់អ្នកដទៃ ប្រព្រឹត្តនៅភូមិថ្មី ឃុំស្វាយអំពារ ស្រុកមុខកំពូល ខេត្តកណ្តាល កាលពីអំឡុងឆ្នាំ២០១៨ បទល្មើសព្រហ្មទណ្ឌដែលមានចែងឲ្យផ្តន្ទាទោសតាមបញ្ញត្តិមាត្រា ២៥៥នៃច្បាប់ភូមិបាល។
លោកចៅក្រមយល់ឃើញថាអំពើប្រព្រឹត្តរបស់ជនជាប់ចោទឈ្មោះ យឹម សំអុល ជាបទមជ្ឈឹម ហើយជនត្រូវចោទបានព្យាយាមគេចវេសពីដីកាបង្គាប់ឲ្យចូលខ្លួនរបស់តុលាការ និងព្យាយាមអូសបន្លាយនីតិវិធីនៃការស៊ើបសួរ។ ដើម្បីចៀសវាងជនត្រូវចោទបំផ្លាញភស្តុតាង គាប់សង្កតទៅលើសាក្សី គាបសង្កត់ដើមបណ្តឹង និងដើម្បីធានាជនត្រូវចោទទុកជូនតុលាការ ចាត់ការតាមនីតិវិធីច្បាប់ គប្បីចាប់ខ្លួនជនត្រូវចោទបញ្ជូនទៅតុលាការចាត់ការតាមច្បាប់។
ហេតុដូច្នេះលោកចៅក្រម អាត ច័ន្ទដារា បានសម្រេច បង្គាប់ឲ្យចាប់ខ្លួនជនត្រូវចោទឈ្មោះ យឹម សំអុល និងបង្គាប់ឲ្យភ្នាក់ងារមានសមត្ថកិច្ច ឲ្យចាប់ខ្លួនឈ្មោះខាងលើ និងបញ្ជាដល់ប្រធានពន្ធនាគារខេត្តកណ្តាល ឬមណ្ឌលឃុំខ្លួនខេត្តកណ្តាល ឲ្យទទួលនិងឃុំខ្លួនបុគ្គលិនេះ ហើយអនុវត្តបន្តតាមនីតិវិធីច្បាប់៕រក្សាសិទ្ធិដោយ៖បញ្ញាស័ក្តិ
