ស្វាយរៀង៖បុរសម្នាក់ត្រូវបានកម្លាំងនគរបាលព្រហ្មទណ្ឌកម្រិតធ្ងន់ សហការស្រាវជ្រាវឃាត់បាននៅខេត្តស្វាយរៀង បន្ទាប់ធ្វើសកម្មភាពប៉ុនប៉ងអំពើឃាតកម្មនៅក្រុងតាខ្មៅ ខេត្តកណ្តាល ។
សមត្ថកិច្ចបានឲ្យដឹងថា នៅព្រឹកថ្ងៃទី២០ ខែធ្នូ ឆ្នាំ២០២០នេះ លោកឧត្តមសេនីយ៍ត្រី កុយ សុភាព បានដឹកនាំកម្លាំងជំនាញការិយាល័យព្រហ្មទណ្ឌកម្រិតធ្ងន់ និងកម្លាំងអធិការដ្ឋានគរបាលស្រុកកំពង់រោទិ៍ សហការជាមួយសមត្ថកិច្ចនគរបាលខេត្តកណ្តាល ដឹកនាំដោយលោក ឧត្តមសេនីយ៏ត្រី រឿន ណារ៉ា ស្នងការរងទទួលផែនការងារនគរបាលព្រហ្មទណ្ឌ ដោយមានការសម្របសម្រួលពីព្រះរាជអាជ្ញាអមសាលាដំបូងខេត្តស្វាយរៀង បានស្រាវជ្រាវឃាត់ខ្លួនបុរសម្នាក់ឈ្មោះ ឆាយ សាលាភ អាយុ៣៦ឆ្នាំ ជនជាតិខ្មែរ មុខរបរលក់ផលិតផលតាមអនឡាញ មានទីលំនៅភូមិព្រែកខ្សេវ សង្កាត់រកាខ្ពស់ ក្រុងតាខ្មៅ ខេត្តកណ្តាល ដែលបានប្រព្រឹត្តអំពើប៉ុនប៉ងឃាតកម្មកាលពីថ្ងៃទី១៩ ខែធ្នូ ឆ្នាំ២០២០ នៅភូមិព្រែកខ្សេវ សង្កាត់រកាខ្ពស់ ក្រុងតាខ្មៅ ខេត្តកណ្តាល ។
បន្ទាប់ពីធ្វើសកម្មភាព ជនសង្ស័យបានគេចមកលាក់ខ្លួននៅផ្ទះរបស់ឈ្មោះ ម៉ា ឈិត ហៅយុ ភេទប្រុស នៅភូមិត្រពាំងត្រាច ឃុំស្វាយតាយាន ស្រុកកំពង់រោទិ៍ ខេត្តស្វាយរៀង ។ ក្នុងពេលឃាត់ខ្លួន សមត្ថកិច្ចបានដកហូត ម៉ូតូមួយគ្រឿងម៉ាកស៊ីរូស ពណ៌ខ្មៅតែមក្រហម ពាក់ស្លាកលេខវៀតណាម 84-G1 019.40 និងទូរស័ព្ទមួយគ្រឿងម៉ាកហាវ៉េពណ៌ខ្មៅ ។
ជនសង្ស័យម្នាក់ជាមនុស្សប្រើប្រាស់គ្រឿងញៀន បានទាញកាំភ្លើងខ្លីបាញ់បងប្រុសរបស់ខ្លួន បណ្តាលឲ្យ រងរបួសធ្ងន់ ហើយរត់គេចខ្លួនបាត់ ខណៈសមត្ថកិច្ចខេត្តកណ្តាល និងអធិការដ្ឋាននគរបាលក្រុងតាខ្មៅ កំពុង ស្វែងរក ចាប់ខ្លួនប្អូនប្រុស បង្កើតណាត់បងបង្កើតមកបាញ់សម្លាប់ ដល់ក្នុងផ្ទះ ។ ហេតុការណ៍ បាញ់សម្លាប់មនុស្សនេះ បានកើតឡើងនៅថ្ងៃទី១៩ ខែធ្នូ ឆ្នាំ ២០២០ វេលា ម៉ោង ៧ និង ១០ នាទី នៅចំណុច ផ្ទះជនសង្ស័យ ភូមិព្រែកខ្សេវ សង្កាត់រកាខ្ពស់ ក្រុងតាខ្មៅ ខេត្តកណ្តាល ។
បើតាមរបាយការណ៍របស់អគ្គស្នងការនគរបាលជាតិបានឲ្យដឹងថា លោកឧត្តមសេនីយ៍ត្រី រឿន ណារ៉ា ស្នងការរងនៃស្នងការដ្ឋាននគរបាលខេត្តកណ្តាល បានឲ្យដឹងថា ៖ ជនរងគ្រោះជាបងបង្កើតឈ្មោះ ឆាយ សៀមមី អាយុ ជាង ៤៣ ឆ្នាំ ជនជាតិខ្មែរ មុខរបរជាងភ្លើង ទីលំនៅភូមិកាហេ ឃុំកាហេ ស្រុកកងមាស ខេត្តកំពង់ចាម ។ ចំណែកជនសង្ស័យ ត្រូវជាប្អូនបង្កើតឈ្មោះ ឆាយ សាលាភ ភេទប្រុស អាយុ ៣៦ ឆ្នាំ ជនជាតិខ្មែរ ទីលំនៅក្នុងភូមិសង្កាត់កើតហេតុ មុខរបរ មិនពិតប្រាកដ បានជិះម៉ូតូ ១ គ្រឿង ម៉ាក scoopy ពណ៌ ក្រហម គេចខ្លួនបាត់ ។
វត្ថុតាង ចាប់យកអាវុធខ្លី ១ ដើម ម៉ាក Lock 98 លេខ ៖ 00080409236 បង់ ១ គ្រាប់ ចំនួន ១០ របស់ ជនសង្ស័យមានប្រភពមិនច្បាស់ ។
លោកឧត្តមសេនីយ៍ត្រី រឿន ណារ៉ា បានឲ្យដឹងទៀតថា មុនពេលកើតហេតុ ជនសង្ស័យជាមនុស្សប្រើប្រាស់ គ្រឿងញៀន ហើយតែងតែឈ្លោះគ្នា ជាមួយប្រពន្ធរកស៊ីលក់ផលិតផលតាមអនឡាញ ។ លុះមកដល់ ថ្ងៃទី ១៨ ខែធ្នូ ឆ្នាំ ២០២០ វេលាម៉ោង ៤ រសៀល ជនសង្ស័យបានឈ្លោះប្រកែកជាមួយប្រពន្ធរបស់ខ្លួនទៀត ពេលនោះ ជនរងគ្រោះ បានចូលទៅជួយសម្របសម្រួលឲ្យឈប់ឈ្លោះគ្នា តែពេលនោះជនសង្ស័យ បែរជាខឹង ជនរងគ្រោះថា ជនរងគ្រោះចេះដឹងរឿងប្តីប្រពន្ធ របស់គេចង់បំបែកបាក់ប្តីប្រពន្ធគេ ។ លុះមកដល់វេលាម៉ោង ៤ ទៀបភ្លឺ នាថ្ងៃកើតហេតុ ជនសង្ស័យបានទូរស័ព្ទហៅជនរងគ្រោះ ពីខេត្តកំពង់ចាមឲ្យឡើងមកជួបនៅផ្ទះ របស់ខ្លួននៅភូមិព្រែកខ្សេវ សង្កាត់រកាខ្ពស់ ក្រុងតាខ្មៅ ខេត្តកណ្តាល ដើម្បីនិយាយគ្នាបន្តិច ។
ពេលនោះ ជនរងគ្រោះ បានជិះម៉ូតូឡើងមកជួបជនសង្ស័យ តាមការណាត់ តែនៅពេលមកដល់ មិនទាន់បាន និយាយអ្វីផង ក៏ត្រូវជនសង្ស័យដកកាំភ្លើងខ្លី ម៉ាកឡុកបាញ់ជនរងគ្រោះត្រូវចំក្រោមក្លៀក ខាងស្តាំធ្លាយគ្រាប់ ទៅក្រោយ របួសយ៉ាងធ្ងន់ ហើយជនសង្ស័យបានរកបាញ់ឪពុកក្មេក តែមិនផ្ទុះ និងប្រតាយប្រតប់គ្នាជ្រុះកាំភ្លើង ត្រូវឪពុកក្មេកយកបាន ។ ជនសង្ស័យ បានរត់គេចឡើងជិះម៉ូតូ scoopy ពណ៌ក្រហមឡើងមកតាខ្មៅគេចខ្លួន ។
បច្ចុប្បន្ន ជនជនសង្ស័យ បានបញ្ជូនមកដល់ការិយាល័យជំនាញខេត្តដើម្បីបំពេញនីតិវិធី ប្រគល់ជូនសមត្ថកិច្ចនគរបាលខេត្តកណ្តាល ចាត់ការតាមច្បាប់ ៕ រក្សាសិទ្ធិដោយ ៖ បញ្ញាស័ក្តិ
