ភ្នំពេញ៖ បុរសម្នាក់ជាគួកជេរដី និងចងការប្រាក់ ត្រូវបានខ្មាន់កាំភ្លើង បានបាញ់ប្រហារ បណ្តាលឲ្យដេកដួលស្លាប់យ៉ាងអាណោចអាធ័ម នាវេលាម៉ោងប្រហែល ៣ រសៀលថ្ងៃទី១៧ ខែធ្នូ ឆ្នាំ២០២០ ស្ថិតនៅតាមផ្លូវដីវាលមួយកន្លែង ក្នុងភូមិទួលកី សង្កាត់ភ្លើងឆេះរទេះ ខណ្ឌកំបូល។
តែឈាមស្រែកស្បែកហៅ នៅទីបំផុត ឃាតករដៃឆៅឈ្មោះ សុខ ហេងសំបូរ អាយុ ៣១ ឆ្នាំ ត្រូវបានកម្លាំងជំនាញរបស់នាយកដ្ឋាននគរបាលព្រហ្មទណ្ឌ ដឹកនាំសហការឃាត់ខ្លួននៅក្នុងភូមិស្រែញរ សង្កាត់ពងទឹក ខណ្ឌដង្កោ និងដកហូតអាវុធខ្លី១ដើម ។ បន្ទាប់មក សមត្ថកិច្ចក៏ឈានទៅធ្វើការឃាត់ខ្លួនឈ្មោះ ផេង ស៊ីថុល ដែលជនដៃចង្អុលបង្ហាញថាជា ម្ចាស់កាំភ្លើងនៅទីតាំងផ្សេងគ្នា ក្នុងសង្កាត់ពងទឹក ។
អ្នកទាំងពីរត្រូវបានដឹងថា គឺសុទ្ធសឹងតែជាអ្នកជំពាក់លុយជនរងគ្រោះម្នាក់ ៤ ទៅ ៥ ពាន់ដុល្លារ និង១ម៉ឺនដុល្លារ ប៉ុន្តែ ដោយសារគ្មានលុយសង ក៏រួមគំនិតគ្នាធ្វើរឿងនេះតែម្តងទៅ។
តែទោះយ៉ាងណា ខណៈពេលឆ្លើយសារភាពនៅចំពោះមុខសមត្ថកិច្ច ជនសង្ស័យទាំងពីរបានឆ្លើយយកត្រូវរៀងៗខ្លួន ដោយក្នុងនោះ ឈ្មោះ ផេង ស៊ីថុល បាននិយាយថា «បងអត់ដឹងអីផង បែរអូនឯងមកឆ្លើយដាក់បងជាម្ចាស់កាំភ្លើងទៅវិញ! អូនឯងមានគំនិតរឿងអ្វីបងអត់ដឹងអីទេ ណែអូនណា កុំធ្វើអ្វីមួយខុសនឹងច្បាស់ ជំពាក់លុយគេសងលុយគេណា!»។ ចំណែកខ្មាន់កាំភ្លើងបាននិយាយចោទថា «គាត់ (ផេង ស៊ីថុល) នៅជាមួយខ្លួន និងយកកាំភ្លើងចេញពីក្នុងឡានរបស់គាត់ឲ្យខ្លួន និងបាននិយាយថា គាត់ក៏ជំពាក់លុយជនរងគ្រោះដែរ បើគាត់បាញ់សម្លាប់ នោះអ្នកនៅក្នុងបុរីក៏ខុសទាំងអស់គ្នា»។
យ៉ាងណាមិញ ដើម្បីជាការតបនឹងការចោទប្រកាន់របស់ឈ្មោះ សំបូរ ជនសង្ស័យឈ្មោះ ផេង ស៊ីថុល ក៏បាននិយាយថា «បងគ្មានសមត្ថភាពឯណាមានសិទ្ធិកាន់កាំភ្លើងទេ ព្រោះថាសូម្បីតែទូរស័ព្ទបែកអេក្រង់ មិនមែនលុយដូរផង តើមានលុយឯណាទិញកាំភ្លើងនោះ!»។
តែយ៉ាងណា មហានជនបានបញ្ចេញមតិថា៖ «ដល់ពេលអ៊ីចឹងបានដឹងខ្លួន ប្រកែកយកត្រូវរាងខ្លួន គុកទាំងពីរនាក់ហ្មងទៅ, ជំពាក់លុយគេ អត់សងហើយបាញ់សម្លាប់គេទៀត ពួកអាត្រឹមត្រូវ…»។
សូមបញ្ជាក់ថា ដោយអនុវត្តតាមបទបញ្ជាយ៉ាងម៉ឺងម៉ាត់ពីសំណាក់ឯកឧត្ដមឧត្ដមសេនីយ៍ឯក ស ថេត អគ្គស្នងការរងនិងជាស្នងការនគរបាលរាជធានីភ្នំពេញ លោកឧត្តមសេនីយ៍ទោ សុង លី ស្នងការរង លោកវរសេនីយ៍ឯក ហង្ស មុនី អធិការនគរបាលខណ្ឌកំបូល បានឲ្យកម្លាំងជំនាញផ្នែកព្រហ្មទណ្ឌ ដឹកនាំដោយលោកវរសេនីយ៍ទោ ឈឹម សាវុទ្ធ អធិការរង ចុះសហការស្រាវជ្រាវ ជាមួយការិយាល័យព្រហ្មទណ្ឌធ្ងន់ នៃស្នងការរាជធានីភ្នំពេញ និងបានការសហការ ជាមួយនាយកដ្ឋានព្រហ្មទណ្ឌក្រសួងមហាផ្ទៃ ចាប់ខ្លួនជនសង្ស័យពីរនាក់ ម្នាក់ជាជនដៃដល់បាញ់សម្លាប់ជនរងគ្រោះ និងម្នាក់ជាអ្នកផ្ដល់កាំភ្លើងខ្លីឲ្យជនដៃដល់។ នៅមុនពេលកើតហេតុគេឃើញ ជនរងគ្រោះជិះម៉ូតូមួយគ្រឿង ម៉ាកហុងដា PCX ពណ៌ស ពាក់ផ្លាកលេខភ្នំពេញ1ID-7477 តែម្នាក់ឯងចេញពីស្ទីម នៅក្នុងភូមិស្រែជម្រៅ សង្កាត់ចោមចៅទី២ ខណ្ឌពោធិ៍សែនជ័យ។ លុះពេលទៅដល់កន្លែងកើតហេតុ ក៏ត្រូវបានជនសង្ស័យបាញ់ប្រហារតែម្ដង។
ជនរងគ្រោះឈ្មោះ នៅ ចំណាន អាយុ៤៥ឆ្នាំ មុខរបរគួកជេរដី រថយន្ត-ម៉ូតូ ព្រមទាំងចងការប្រាក់ មានទីលំនៅក្នុងភូមិព្រៃព្រីងត្បូង សង្កាត់ចោមចៅ៣ ខណ្ឌពោធិ៍សែនជ័យ (ស្លាប់ពេលបញ្ជូនទៅមន្ទីរពេទ្យ)។ ជនសង្ស័យទី១ ឈ្មោះ សុខ ហេងសំបូរ ភេទប្រុស អាយុ៣០ឆ្នាំ រស់នៅភូមិស្រែញ សង្កាត់ពងទឹក ខណ្ឌដង្កោ រាជធានីភ្នំពេញ (ជនដៃដល់បាញ់ជនរងគ្រោះ)។ ជនសង្ស័យទី២ ឈ្មោះ ផេង ស៊ីថុល ភេទប្រុស អាយុ៤៧ឆ្នាំ រស់នៅភូមិដំណាក់ត្រយឹង សង្កាត់ចោមចៅ២ ខណ្ឌពោធិ៍សែនជ័យ (ជាអ្នកផ្ដល់កាំភ្លើង)។ វត្ថុតាងដកហូត អាវុធខ្លីម៉ាក CF98 មានគ្រាប់ចំនួន ៩គ្រាប់។
នៅចំពោះមុខសមត្ថកិច្ចជនសង្ស័យបានសារភាពថា ពួកខ្លួនពិតជាបានធ្វើសកម្មភាពបាញ់សម្លាប់ឈ្មោះ នៅ ចំណាន ពិតប្រាកដមែន មូលហេតុដោយសារតែពួកខ្លួនជំពាក់ប្រាក់ជនរងគ្រោះច្រើន ហើយគ្មានលទ្ធភាពសង។ សមត្ថកិច្ចបានបង្ហើបថា ជនដៃដល់ជំពាក់លុយជនរងគ្រោះប្រមាណ៣០ម៉ឺនដុល្លារ ដោយសរុបទាំងដើម ទាំងការ។ ជនសង្ស័យទាំងពីរនាក់ខាងលើ ត្រូវបានកម្លាំងជំនាញនៃអធិការដ្ឋាននគរបាលខណ្ឌកំបូល កសាងសំណុំរឿងបញ្ជូនទៅ សាលាដំបូងរាជធានីភ្នំពេញចាត់ការតាមនីតិវិធីច្បាប់៕ រក្សាសិទ្ធិដោយ៖ លឹម ហុង
