ម៉ូតូពីរគ្រឿងបុកគ្នាពេញទំហឹង បណ្ដាលឲ្យស្លាប់ម្នាក់ ចំណែកឯម្នាក់ទៀត របួសធ្ងន់

ភ្នំពេញ÷ម៉ូតូពីរគ្រឿងជិះក្នុងល្បឿនលឿន ទិសដៅបញ្ច្រាសគ្នាបុកគ្នាចំពីមុខពេញទំហឹង បណ្ដាលឲ្យក្មេងប្រុសម្នាក់ស្លាប់ភ្លាមៗ ចំណែកឯម្នាក់ទៀត រងរបួសធ្ងន់បញ្ជូនទៅកាន់មន្ទីរពេទ្យ។

ហេតុការណ៍នេះដែលកើតឡើងនៅវេលាម៉ោង ១០ និង ៤០ នាទីយប់ថ្ងៃទី ២២ ខែធ្នូ ឆ្នាំ ២០២០​ ស្ថិតនៅតាមបណ្ដោយផ្លូវ ២៦១ ក្រុងសង្កាត់បឹងសាឡាង ខណ្ឌទួលគោក រាជធានីភ្នំពេញ។

សពមាន ឈ្មោះ រដ្ឋា ភេទប្រុស អាយុ ១៦ ឆ្នាំ មុខរបរជាសិស្សស្នាក់នៅសង្កាត់ផ្សាដើមគរ ខណ្ឌទួលគោក។

បើយោងតាមប្រភពនៅកន្លែងកើតហេតុ បានឲ្យដឹងថា គេឃើញប្អូនប្រុសបានជិះម៉ូតូម៉ាកហុងដា PCX មួយគ្រឿងពណ៌ស ដែលពាក់ផ្លាកលេខ ភ្នំពេញ 1HN 7007 ចូលទៅបាយឆានៅជាប់កន្លែងកើតហេតុ រួចប្អូនបានត្រឡប់មកវិញ ធ្វើដំណើរតាមបណ្តោយផ្លូវ ២៦១ ក្នុងទិសដៅពីជើងមកត្បូង មកដល់កន្លែងកើតហេតុ ក៏ត្រូវបានម៉ូតូមួយគ្រឿងទៀតម៉ាក ការហ្វេ ដែលពាក់ផ្លាកលេខ ភ្នំពេញ 1GP1032 ធ្វើដំណើរបញ្រ្ចាសទិសក្នុងទិសដៅពីត្បូងមកជើង​ មកបុកចំពីមុខពេញទំហឹងបណ្តាលឲ្យម្ចាស់ម៉ូតូ PCX ដួលបោកក្បាលស្លាប់ភ្លាមៗនៅនិងកន្លែង ចំណែកឯម៉ូតូមួយគ្រឿងទៀតរងរបួសធ្ងន់បញ្ជូនទៅមន្ទីរពេទ្យ។

ក្រោយពេលកើតហេតុខាងលើ សមត្ថកិច្ចមូលដ្ឋាន ចុះមកដល់រួចប្រគល់តួនាទីនេះ ទៅខាងជំនាញចរាចរណ៍ ចុះមកវាស់វែងយកម៉ូតូពីរគ្រឿង ទៅរក្សាទុកនិងធ្វើកំណត់ហេតុ ប្រគល់សពជូនទៅឲ្យក្រុមគ្រួសារ ធ្វើបុណ្យតាមប្រពៃណី៕រក្សាសិទ្ធិដោយ៖ សា មេត