ភ្នំពេញ៖ អនុត្តតាមបទបញ្ជាដ៏ខ្ពង់ខ្ពស់របស់សម្តេចតេជោ ហ៊ុន សែន ជុំវិញការដាក់បញ្ជាអោយ អាជ្ញាធរាជធានី ខេត្តចុះត្រួតពិនិត្យនិងចាប់រថយន្តតទ្រុងខុសលក្ខណៈបច្ចេកទេស ឃើញថា សម្រាប់អាជ្ញាធររាជធានីភ្នំពេញបានចេញប្រតិបត្តិការលើការងារនេះយ៉ាងសកម្មនិងម៉ឺងម៉ាត់ ។ដោយឡែកសម្រាប់ ការចុះពិនិត្យនិងបិទយានដ្ឋានកែច្នៃរថយន្តគ្មានច្បាប់នៅរាជធានីភ្នំពេញ រដ្ឋបាលរាជធានី ក៏បាននិងកំពុងធ្វើសកម្មភាពយ៉ាងខ្លាំងផងដែរ ដោយគិតមកដល់ថ្ងៃនេះ បានបិទយានដ្ឋានកែច្នៃរថយន្តគ្មានច្បាប់ចំនួន១៣ទីតាំងហើយ។
លោកសាំ ពិសិដ្ឋ ប្រធានមន្ទីរសាធារណការនិងដឹកជញ្ជូនរាជធានីភ្នំពេញបានអោយដឹងនៅរសៀលថ្ងៃទី២១ខែកុម្ភៈឆ្នាំ២០១៨នេះថា នៅព្រឹកថ្ងៃទី២១ ខែកុម្ភៈ ឆ្នាំ២០១៨ ក្រុមការងារចម្រុះរដ្ឋបាលរាជធានីភ្នំពេញ ស្នងការនគរបាលរាជធានីភ្នំពេញ បញ្ជាការកងរាជអាវុធហត្ថរាជធានីភ្នំពេញ រដ្ឋបាលខណ្ឌពោធិ៍សែនជ័យ និងមន្ទីរសាធារណការ និងដឹកជញ្ជូនរាជធានីភ្នំពេញ បានចុះត្រួតពិនិត្យយានដ្ឋានកែច្នៃរថយន្តចំនួន ៦ទីតាំង រួមមាន៖ ១-យានដ្ឋាន ជាងនីវូ ២-យានដ្ឋាន GL ៣-យានដ្ឋាន ថុង ថារិទ្ធ ៤-យានដ្ឋាន អ៊ួន ជាង ៥-យានដ្ឋាន ហុង ម៉េង ៦-យានដ្ឋាន សា សឿន ។ ក្រុមការងារបានរកឃើញថា យានដ្ឋានកែច្នៃរថយន្តទាំងនេះ ធ្វើអាជីវកម្មដោយគ្មានច្បាប់អនុញ្ញាត្ត និងសម្រេចបិទយានដ្ឋានទាំង ៦ ចាប់ពីពេលនេះតទៅ។
លោកបន្តថា សម្រាប់នៅទូទាំងរាជធានីភ្នំពេញ ក្រុមការងារនេះបានសម្រេចបិទយានដ្ឋានកែច្នៃរថយន្តគ្មានច្បាប់បានចំនួន១៣ទីតាំងហើយ ហើយការងារនេះនឹងបន្តធ្វើអោយដូចភ្លៀងរលឹម។
គួររំលឹកថានៅព្រឹកថ្ងៃសុក្រទី៩ ខែកុម្ភៈ ឆ្នាំ២០១៨កន្លងមកថ្មីៗនេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ក្នុងឱកាសដែរអញ្ជើញជាអធិបតីភាពបើកការដ្ឋានសាងសង់ស្ពានឆ្លងកាត់ទន្លេមេគង្គថ្មីមួយទៀតតភ្ជាប់ទឹកដីនៃខេត្តកំពង់ចាម ទៅកាន់ទឹកដីនៃខេត្តត្បូងឃ្មុំ សម្តេចតេជោ ហ៊ុន សែនបានដាក់ឱសានវាទ ចាប់ពីម៉ោង០០យប់ថ្ងៃទី៩កុម្ភៈ តទៅ គ្មានវត្តមានឡាន តទ្រុង លើដងផ្លូវទៀតឡើយ។ បើមាននៅតំបន់ណា ភូមិសាស្ត្រណា ចៅហ្វាយខេត្ត និងក្រុងនោះ ជាអ្នកទទួលខុសត្រូវ។ បើនរណាមកតវ៉ាឬអ្នកកាង ទោះជាឋានៈណាក៏ដោយ ក៏ធ្លាក់បុណ្យស័ក្តិទាំងអស់ និងបញ្ចូលព្រៃសតែម្តង៕ ដោយ៖កូឡាប
