ភ្នំពេញ ៖ ទីស្តីការគណៈរដ្ឋមន្ត្រី អង្គភាពអ្នកនាំពាក្យរាជរដ្ឋាភិបាល នៅរសៀលថ្ងៃទី១៤ ខែមករា ឆ្នាំ២០២១ បានចេញសេចក្តីប្រកាសព័ត៌មានមួយថា គោលនយោបាយ ឈ្នះ-ឈ្នះ ដែលដាក់ចេញដោយសម្តេចអគ្គមហាសេនាបតីតេជោ ហ៊ុន សែន មានតម្លៃ ជា ប្រវត្តិសាស្ត្រដ៏ធំធេង ព្រោះបានធ្វើឲ្យប្រជាជាតិកម្ពុជាទាំងមូលទទួលបានសុខសន្តិភាពពេញលេញ មានឯកភាពជាតិ និងឯកភាពទឹកដី ទាំងស្រុង ចាប់តាំងពីចុងឆ្នាំ១៩៩៨ មក ដែលក្នុងប្រវត្តិសាស្ត្រកម្ពុជា ៥០០ឆ្នាំកន្លងមកពុំធ្លាប់មាន។
សម្តេចតេជោ ហ៊ុន សែន បានប្តេជ្ញាចិត្តធ្វើឱ្យតំបន់អតីតសមរភូមិក្តៅគគុកទាំងឡាយ ក្លាយទៅជាតំបន់មិនត្រឹមតែទទួលបាននូវសុខសន្តិភាព ប្រកបដោយ ការអភិវឌ្ឍ និងការតភ្ជាប់ដោយមិនអនុញ្ញាតតំបន់ទាំងអស់នោះ នៅឯកោះដាច់ស្រយ៉ាល គ្មានចរន្តជីវិតជាសហគមន៍ទំនើប ដោយទទួល បានទាំងវិស័យអប់រំ សុខាភិបាលចំណេះជំនាញពាណិជ្ជកម្មជាដើម ពីរាជរដ្ឋាភិបាលប្រកបដោយប្រសិទ្ធភាព។ លទ្ធផល នៃនយោបាយ ឈ្នះ-ឈ្នះ បានបង្ហាញយ៉ាងជាក់ស្តែង តាមរយៈការតភ្ជាប់ពីតំបន់ដាច់ស្រយ៉ាលមួយចំនួនធំ នោះបើរាប់ពីខេត្តកោះកុង ដែលមានរបាំងជួរភ្នំក្រវាញ ភ្នំទំព័រ បែងចែកដាច់ពីគ្នារវាងខេត្តពោធិ៍សាត់ ខេត្តបាត់ដំបង និងខេត្តប៉ៃលិន (អាតៃ អូរសោម ប្រម៉ោយ តាសាញ់ ក្រពើពីរ សំឡូត ជាដើម)។
នាចុងឆ្នាំ២០២០ កន្លងទៅថ្មីៗនេះ ឯកឧត្តម ផៃ ស៊ីផាន ជាប្រធានអង្គភាពអ្នកនាំពាក្យរាជរដ្ឋាភិបាល បានដឹកនាំក្រុមការងារ ចុះស្វែងយល់ជាក់ស្តែង នៃការអនុវត្តគោលនយោបាយតភ្ជាប់ ដែលជាសមទ្ធិផលរបស់រាជរដ្ឋាភិបាល កើតចេញពីនយោបាយឈ្នះ-ឈ្នះ នៅតាមតំបន់ខាងលើ។
ក្រុមការងាររបស់អង្គភាពអ្នកនាំពាក្យរាជរដ្ឋាភិបាល បានចាប់ធ្វើដំណើរចេញពីខេត្តកោះកុង ឆ្លងកាត់តាម ជួរភ្នំក្រវាញ (អាតៃ) ឆ្ពោះទៅកាន់តំបន់អូរសោម ហើយបន្តទៅប្រម៉ោយ ក្រពើពីរ តាសាញ់ និងសំឡូត តាមផ្លូវជាតិលេខ១០ ដែល កំពុងសាងសង់តភ្ជាប់ពីខេត្តបាត់ដំបង ខេត្តពោធិ៍សាត់ និងខេត្តកោះកុង។ ការធ្វើដំណើរនេះ គឺមានភាពរលូនងាយស្រួល ខណៈ ការស្ថាបនាផ្លូវជាតិលេខ១០ សម្រេចបានប្រមាណ ៤០% ទៅ ៥០% រួចហើយ។
អតីតសមរភូមិក្តៅគគុក និងជាអតីតតំបន់របស់ក្រុមផ្តាច់ខ្លួន នៅតាមជួរភ្នំក្រវាញនាពេលនេះ បានក្លាយជាមូលដ្ឋានភូមិ-ឃុំ ដែលស្ថិតក្រោមរចនាសម្ព័ន្ធនៃការគ្រប់គ្រង និងដឹកនាំរបស់រដ្ឋបាលខេត្តសាមីនីមួយៗ។ យើងសង្កេតឃើញថា ជីវភាពរស់នៅរបស់ប្រជាពលរដ្ឋទៀតសោត ក៏ទទួលបានឱកាសអភិវឌ្ឍន៍ល្អប្រសើរព្រមៗគ្នា ពីនយោបាយ ឈ្នះ-ឈ្នះ មិនចាញ់ការរស់នៅអ្នកទីប្រជុំជននោះដែរ។ គេហដ្ឋានភាគច្រើន សាងសង់ដោយថ្មសំណង់ ប្រក់ក្បឿងយ៉ាងប្រណិត( ផ្ទះក្បឿង)។ សម្ភារៈប្រើប្រាស់របស់ពួកគាត់ ក៏មានគ្រប់គ្រាន់ និងទំនើបទាន់សម័យ។ ពោលគឺតំបន់ទាំងនោះប្រែក្លាយទៅតំបន់កសិឧស្សាហកម្ម និងទេសចរណ៍ធម្មជាតិ ដែលជា សក្តានុពលដ៏ខ្លាំងក្លានៃខឿនសេដ្ឋកិច្ចជាតិ។ ទាំងនេះហើយជាសមិទ្ធផលដែលកើតចេញពីនយោបាយឈ្នះ-ឈ្នះ ដែលត្រូវបានចាត់ទុកថា ជាជម្រើសដ៏មានប្រសិទ្ធភាពតែមួយគត់ និងជាក្តីសង្ឃឹមដ៏មុតមាំសម្រាប់ប្រជាជាតិកម្ពុជា ព្រោះមិនត្រឹមតែអាចបញ្ចប់សង្គ្រាមដ៏រ៉ាំរៃរវាងជាតិសាសន៍ឯងប៉ុណ្ណោះទេថែមទាំងនាំមកនូវសន្តិភាព សន្តិសុខ និងស្ថិរភាពសង្គមទូទាំងប្រទេស។ ប្រជាជាតិទាំងមូលនេះស្ថិតនៅក្រោមរដ្ឋធម្មនុញ្ញតែមួយព្រះមហាក្សត្រជាទីសក្ការៈតែមួយ និងរាជរដ្ឋាភិបាលតែមួយ ដែលចេញពីការបោះឆ្នោតដោយទៀងទាត់ ដែលបង្ហាញថា ប្រទេសកម្ពុជា ទទួលបានឯករាជ្យពេញលេញបន្ទាប់ពីឆ្នាំ១៩៥៣ ៕ រក្សាសិទ្ធិដោយ៖បញ្ញាស័ក្តិ