ក្រោយពីបានឃើញមនុស្សម្នា ភ្លូកទឹកភ្លូកដីទៅពពាក់ពួនគ្នាសឹងស្ទះខ្យល់ និងសូម្បីមិនខ្លាចឆ្លងកូវីដ១៩ ដើម្បីទៅទទួលយកកាក់កាត់ឆុងហ្វ្រី នៅផ្ទះអ្នកគ្រូហុងស៊ុយ ណាលី ដែលហាក់ដូចជាគ្មានការពិចារណាទាល់តែសោះ ស្រាប់តែលោកអាចារ្យធំ បានលើកយកនូវឱវាទមួយឃ្លាបន្សល់ទុករបស់ព្រះពុទ្ធ ដែលបានទូន្មានទៅដល់ពុទ្ធសាសនិកជនថា «ជំនឿដោយបញ្ញា នាំមកនូវសេចក្តីសុខ សុភមង្គល នាំមកនូវផ្លូវដែលត្រូវ»។ ការលើកឡើងបែបនេះ លោកអាចារ្យធំ ចង់មានន័យថា គឺចង់ឲ្យបងប្អូនប្រជាពលរដ្ឋចេះប្រើខួរក្បាល ក្នុងការជឿទៅលើគ្រូចម្លែកៗផ្សេងៗផង។
ក្នុងនោះ អាចារ្យធំ បាននិយាយបែបនេះថា «អីគេ នាំគ្នាទៅតម្រង់ជួរយកកាក់កាត់ឆុង ឥឡូវ យកកាក់ឲ្យអ្នកគ្រូវិញផង ព្រោះយកអស់ពេកទៅ ឥឡូវនេះ អ្នកគ្រូឆុងវិញហើយ ព្រោះត្រូវបានអាជ្ញាធរមានសមត្ថកិច្ចកោះហៅអ្នកគ្រូទៅហើយ ព្រោះតែរឿងចែកកាក់កាត់ឆុង ល្មើសនឹងវិធានការទប់ស្កាត់ការឆ្លងរាលជំងឺកូវីដ១៩»។
អាចារ្យធំ បន្តថា៖ «យើងមិនហាមឃាត់ទេ អារឿងសិទ្ធិក្នុងការជឿ ក្នុងការសម្រេចចិត្តជ្រើសរើសលើមាគ៌ា ឬ លទ្ធិណាមួយ អត់មានកំរិតបិទសិទ្ធិនោះទេ ប៉ុន្តែ ជំនឿជឿទាំងឡាយណាក៏ដោយ គឺសូមឲ្យមានអំណះអំណាង មានទ្រីស្តីបទឲ្យសមស្របទៅនឹងតថភាពជាក់ស្តែង ទៅតាមច្បាប់ធម្មជាតិ ជឿ ឬធ្វើឲ្យគេជឿ សូមឲ្យសមហេតុផលផលផង…»។
ជាមួយគ្នានោះផងដែរ ទាក់ទងនឹងគ្រូម្នាក់នៅម្តុំផ្សារព្រៃទា ដែលអះអាង និងសូត្រធម៌បែបរ៉េប ៧ ភាសា រកស្តាប់មិនយល់ ក៏ត្រូវបានអាចារ្យធំ ដាក់ឲ្យយ៉ាងដូច្នេះថា៖ «អីណា ៥, ៦ ភាសា ដូចរ៉េបអីតិចហ្នឹង អាគ្រូមួយណា នៅតែមានអ្នកទៅ នៅតែមានពួកអាឆ្កួតឡប់មួយចំនួនយកក្បាលមេក្រូទៅភ្ជង់ (សម្ភាសន៍) អ្ហែងអត់ការងារធ្វើមែនអា ពេលកូវីដអ្ហែងអត់មានការងារធ្វើតាហ្មងអា!»៕ រក្សាសិទ្ធិដោយ៖ លឹម ហុង
