ប្រជាពលរដ្ឋរស់នៅក្នុងតំបន់ Kelurahan Jenggot ក្នុងទីក្រុង Pekalongan នៃខេត្ត Central Java ពិតជាការរន្ធត់ចិត្តជាខ្លាំងកាលពីម្សិលមិញ ខណៈដែលភូមិត្រូវបានជន់លិចទឹក ជាមួយពណ៌ដូចឈាមអ៊ីចឹង!។
នេះបើយោងតាមការចុះផ្សាយរបស់សារព័ត៌មានឥណ្ឌូណេស៊ី Kompas បានឲ្យដឹងថា ទឹកជោរជន់ពោរពេញទៅដោយអ្វីដែលពណ៌នាថាហាក់ដូចជាឈាមនេះ គឺតាមពិតទៅ វាបណ្តាលមកពីការបោះចោលផលិតផលថ្នាំជ្រលក់វាយនភណ្ឌឧស្សាហកម្មខុសច្បាប់ នៅក្បែរភូមិប៉ុណ្ណោះ។
ប្រភពមួយនិយាយថា អ្វីដែលកាន់តែច្បាស់ជាងនេះទៀតនោះ គឺថាការជ្រលក់វាយនភ័ណ្ឌសម្រាប់ផលិតស្បៃ គឺភូមិនេះជាអ្នកផលិតដ៏ល្បី។ យោងតាមប្រភពព័ត៌មានក្នុងស្រុកមួយ ក៏បាននិយាយថា “ទឹកជំនន់ឈាម” នេះ គឺបណ្តាលមកពីអ្នកស្រុកដែលមិនមានការទទួលខុសត្រូវ បានបោះចោលផលិតផលថ្នាំជ្រលក់វាយនភ័ណ្ឌនៅក្បែរភូមិតែម្តង។
ប្រភពបន្តថា មានអ្នកណាម្នាក់ បានបោះចោលកាកសំណល់ថ្នាំជ្រលក់ពណ៌។ ហេតុដូច្នេះ នៅពេលភ្លៀងធ្លាក់ខ្លាំងកាលពីម្សិលមិញ បង្កឲ្យជ្រាបចូលទឹកសាយភាយពេញទូទាំងភូមិតែម្តង។ ហើយវាមិនអាចទៅរួចទេ ដែលនិយាយថា បណ្តាលមកពីទឹកហូរចូលរោងចក្រនោះ។
ទោះយ៉ាងណា សម្រាប់ករណីនេះ អាជ្ញាធរនៅពុំទាន់អាចរកឃើញ អ្នកបោះចោលកាកសំណល់ថ្នាំជ្រលក់ពណ៌នោះនៅឡើយទេ៕ រក្សាសិទ្ធិដោយ៖ លឹម ហុង
