គូស្នេហ៍ជនជាតិហ្វីលីពីនមួយគូ បានធ្វើឲ្យអ្នកលេងអ៊ិនធឺណេត ហួសពីការភ្ញាក់ផ្អើល ខណៈអ្នកទាំងពីរបានធ្វើរឿងដ៏ចម្លែក ដោយសម្រេចចិត្តរៀបការនៅលើអាកាស ក្នុងរយៈកម្ពស់ ៣៧,០០០ ហ្វ៊ីត (ជាង១ម៉ឺនម៉ែត្រ) នៅលើជើងហោះហើររបស់ក្រុមហ៊ុនអាកាសចរណ៍ AirAsia ឆ្ពោះទៅកាន់ Boracay។
អ្នកទាំងពីរបាននិយាយថា ពួកគេត្រូវតែមានក្រុមហ៊ុនអាកាសចរណ៍ AirAsia មកចូលរួមក្នុងពិធីមង្គលការរបស់ពួកគេ ពីព្រោះក្រុមហ៊ុនគឺជាផ្នែកដ៏ធំមួយនៃរឿងស្នេហារបស់ពួកគេ។ តាមពិតទៅ កូនក្រមុំឈ្មោះ Micah Cura អាយុ ២៣ ឆ្នាំ ជាអ្នករស់នៅទីក្រុង Tarlac City និងកូនកំលោះឈ្មោះ Kristoffer “Topy” Rustia អាយុ ២៦ ឆ្នាំមកពីទីក្រុង Quezon City បានជួបគ្នាកាលពី ៣ ឆ្នាំមុន នៅពេលដែលពួកគេទាំងពីរនាក់ ត្រូវបានជួលឱ្យធ្វើជាអ្នកបើកបរយន្តហោះរបស់ក្រុមហ៊ុន AirAsia ។
នាង Micah បាននិយាយថា “វាជាក្តីសុបិន្តរបស់យើង ក្នុងការរៀបការនៅលើយន្ដហោះ ពីព្រោះ AirAsia បានដើរតួយ៉ាងសំខាន់នៅក្នុងរឿងស្នេហារបស់យើង”។
កូនកំលោះបាននិយាយថា៖ “នេះជាសេចក្តីស្នេហាដំបូងរបស់ខ្ញុំ។ នាងគឺជានារីម្នាក់ល្អខ្លាំងណាស់ នាងតែងតែធ្វើឲ្យខ្ញុំសប្បាយចិត្ត”។
ចំណែកកូនក្រមុំវិញ ក៏បានចែករំលែកពាក្យពីរបីម៉ាត់ដោយខ្លួននាងផ្ទាល់ថា៖ “Topy គឺគាត់អត់ធ្មត់ណាស់ និងយកចិត្តទុកដាក់នូវរាល់តម្រូវការរបស់ខ្ញុំ។ គាត់ព្យាយាមគ្រប់ពេល ធ្វើយ៉ាងណាដើម្បីឱ្យខ្ញុំសប្បាយចិត្ត”។
គូស្វាមីភរិយាថ្មីថ្មោងនេះបានរស់នៅជាមួយគ្នាអស់រយៈពេល ២ ឆ្នាំកន្លះ ហើយៗ ថែមទាំងមានកូនអាយុ១ឆ្នាំ ជាមួយគ្នាផងដែរ។ ដំបូងឡើយ ពួកគេជាមិត្តរួមការងារនៅសាកលវិទ្យាល័យ Santo Tomas ប៉ុន្តែបានអះអាងថា ពួកគេមិនដែលគិតដល់រឿងមានថ្ងៃនេះជាមួយគ្នានោះទេ រហូតដល់ក្រុមហ៊ុន AirAsia បាននាំពួកគេមកជាមួយគ្នា។
គួរបញ្ជាក់ថា អ្នកដំណើរចំនួន ១៣០ នាក់ ដែលបានចូលរួមក្នុងពិធីមង្គលការនេះ បានចាប់ផ្តើមផ្ទុះឡើងនូវស្នូរទះដៃកងរំពង ដើម្បីអបអរសាទរចំពោះពួកគេ នៅចុងបញ្ចប់នៃពិធី។ សូមអបអរសាទរ Micah និង Topy!៕ រក្សាសិទ្ធិដោយ៖ លឹម ហុង
