ភ្នំពេញ ៖ បុរសល្មោភកាមម្នាក់មានប្រពន្ធកូនរួចទៅហើយ បានធ្វើសកម្មភាពចាប់រំលោភក្មេងស្រីអាយុ ៤ ឆ្នាំម្នាក់ ត្រូវបានប្រជាពលរដ្ឋឃើញស្រែកឆោឡោ បង្កឲ្យមានការភ្ញាក់ផ្អើលឡើងនាំគ្នាដេញចាប់ឃាត់ខ្លួនបានប្រគល់ឲ្យសមត្ថកិច្ច។
ហេតុការណ៍ខាងលើនេះបង្កឲ្យមានការភ្ញាក់ផ្អើលឡើងនៅវេលាម៉ោង ៤ និង ៣០នាទីល្ងាចថ្ងៃទី ១៧ ខែកុម្ភៈ ឆ្នាំ ២០២១ស្ថិតនៅត្រង់ចំណុចបន្ទប់ជួលរបស់ជនសង្ស័យ ក្នុងភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។
ជនសង្ស័យល្មោភកាម ដែលធ្វើសកម្មភាពចាប់រំលោភក្មេងស្រីអាយុ៤ឆ្នាំមានឈ្មោះប្រាក់ ព្រែក ភេទប្រុស អាយុ២៧ឆ្នាំមុខរបរមិនពិតប្រាកដ ស្នាក់នៅបន្ទប់ជួលកន្លែងកើតហេតុខាងលើភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។
តាមប្រភពពីសាច់ញាតិរបស់ជនរងគ្រោះបានឲ្យដឹងថា នៅមុនពេលកើតហេតុក្មេងស្រីក្មេងស្រីរងខាងលើ បានទៅលេងបន្ទប់ជួលរបស់ជនសង្ស័យ ដោយឃើញឱកាសល្អស្ងាត់ជនសង្ស័យក៏បានបិទទ្វារបន្ទប់ ហើយបានធ្វើសកម្មភាពចាប់រំលោភទៅលើក្មេងស្រីរងគ្រោះតែម្ដង ខណៈនោះត្រូវបានប្រជាពលរដ្ឋអ្នកជិតខាង ឃើញបិទទ្វារបន្ទប់មានការសង្ស័យក៏បានទៅអើតមើលបន្ទប់ ក៏បានឃើញជនសង្ស័យកំពុងតែធ្វើសកម្មភាពចាប់រំលោភទៅលើក្មេងស្រីរងគ្រោះ ក៏បានស្រែកផ្អើលឆោឡោឡើង ភ្លាមនោះជនសង្ស័យមានការភ័យស្លន់ស្លោ ក៏បានស្ទុះរត់ចេញពីកន្លែងកើតហេតុត្រូវបានប្រជាពលរដ្ឋ ដេញតាមរហូតដល់វត្តមង្គលហៅវត្តព្រែកព្នៅ ក៏ចាប់បានប្រគល់ឲ្យសមត្ថកិច្ចនគរបាលប៉ុស្តិ៍ព្រែកព្នៅ យកមកសួរនាំចំណែកឯក្មេងស្រីរងគ្រោះ ត្រូវបានក្រុមគ្រួសារបញ្ជូនទៅកាន់មន្ទីរពេទ្យក្នុងរាជធានីភ្នំពេញតែម្ដង។
បច្ចុប្បន្នជនសង្ស័យក្រោយពីសាកសួរនាំរួច ត្រូវបានសមត្ថកិច្ចបញ្ជូនទៅអធិការដ្ឋាននគរបាលខណ្ឌព្រែកព្នៅ ដើម្បីសាកសួរបន្តកសាងសំណុំរឿងបញ្ជូន ទៅសាលាដំបូងរាជធានីភ្នំពេញចាត់ការតាមផ្លូវច្បាប់៕ រក្សាសិទ្ធិដោយ៖សារឿន
