ព្រះសីហនុ ៖ នៅថ្ងៃទី១៨ខែកុម្ភៈឆ្នាំ២០២១ អាជ្ញាធរស្រុកស្ទឹងហាវ ខេត្តព្រះសីហនុ មានកិច្ចសហការពីតំណាងអយ្យការអមសាលាដំបូងខេត្តព្រះសីហនុ បានដឹកនាំកម្លាំងសាធារណៈចុះអនុវត្តរុះរើសំណង់ខ្ទម នៅលើទីតាំងដីមានប័ណ្ណសារកម្មសិទ្ធិរបស់អ្នកដទៃ មានទីតាំងនៅភូមិឬទ្ធី២ ឃុំកែវផុស ស្រុកស្ទឹងហាវ ខេត្តព្រះសីហនុ។
ពលរដ្ឋជាច្រើននាក់ដែលមានផ្ទះ និងដីនៅតំបន់នោះ បានលើកគ្នាតវ៉ាប្រឆាំងនឹងការចុះអនុវត្តនេះ។រហូតដល់ថ្ងៃទី១៩ខែកុម្ភៈឆ្នាំ២០២១នេះ ក្រុមប្រជាជនកំពុងបន្តផ្តុំគ្នាដើម្បីស្នើសុំអោយមានការដោះស្រាយនិងទទួលខុសត្រូវចំពោះការរុះរើបំផ្លាញផ្ទះនិងដំណាំរបស់គាត់។
អាជ្ញាធរខេត្តព្រះសីហនុ និងតំណាងអយ្យការអមសាលាដំបូងខេត្ត នៅថ្ងៃទីកំពុងព្យាយាមសម្របសម្រួលនិងមានវិធានការបន្ត។
ខ្ទមនិងផ្ទះចំនួន៥៨ខ្នងក្នុងចំណោមផ្ទះប្រមាណជាង៧០ខ្នង និងដំណាំមួយចំនួនផងត្រូវបានរុះរើឈូសឆាយចោល។គ្រឿងចក្រអេស្កាវ៉ាទ័រចំនួន៣គ្រឿងត្រូវពលរដ្ឋគុបដបសាំងបណ្តេញដើម្បីបញ្ឈប់សកម្មភាពឈូសឆាយផ្ទះនិងបានស្ទាក់ទុកមិនអោយចេះព្រមទាំងព្រមានដុតកំទេចចោលបើមិនមានដំណោះស្រាយជូនពួកគាត់។
ខ្ទមឬផ្ទះទាំងនោះ ខ្លះមានម្ចាស់រស់នៅខ្លះបិទទ្វារជាខ្ទមចាំដីនិងមានក្បាលដីខ្លះធ្វើរបងហ៊ុព័ទ្ធទុកចោល។
ប្រជាជនខ្លះ បាននិយាយថា ពួកគាត់បានចូលមកកាប់រានយកជាចំណែកតូចៗធ្វើផ្ទះនៅព្រោះជីវភាពខ្វះខាត ។
ឯអ្នកខ្លះទៀតបានទិញពីគេ ការអូសទាញរបស់មេខ្យល់ដោយលើកហេតុផលថាទីនេះជាដីរដ្ឋ (គម្របព្រៃឈើ)។
យោងតាមឯកសារ ដីនេះមានបណ្ណ័រឹង ចុះហត្ថលេខាដោយ លោក ចេង ស្រុង នៅថ្ងៃ២៩ មករា២០១៩ មានទំហំ១០០ហិចតា ស្មើនឹង២០ប័ណ្ណ។
ប្រវត្តិប័ណ្ណនេះមានឈ្មោះដើម គង់ មាលា ភេទស្រី កើតឆ្នាំ១៩៦២ បានផ្ទេរ(លក់ឡៃឡុង)អោយទៅឈ្មោះ ឆៃ ជីងហ៊ាង ។
រដ្ឋបាលខេត្តព្រះសីហនុ កាលពីថ្ងៃទី១៧ខែមិថុនាឆ្នាំ២០២០ បានចេញសេចក្តីជូនដំណឹងមករដ្ឋបាលស្រុកស្ទឹងហាវដើម្បីដឹកនាំរៀបចំតាមនីតិវិធី។
រដ្ឋបាលស្រុកស្ទឹងហាវបានជូនដំណឹងដល់ពលរដ្ឋនៅតំបន់នេះឲ្យរុះរើចេញពីទីតាំងកម្មសិទ្ធរបស់គេប៉ុន្តែពលរដ្ឋមិនអនុវត្តតាមឡើយនិងនៅតែបន្តសកម្មភាព ទិញ/លក់ តគ្នា សង់ផ្ទះថ្មីៗបន្ថែមដោយគ្មានអាជ្ញាធរដឹងឮ៕ រក្សាសិទ្ធិដោយ៖បញ្ញាស័ក្តិ
