ខេត្តព្រះវិហារ៖ ឧត្ដមសេនីយ៍ទោសួស សុខដារ៉ា ស្នងការនគរបាលខេត្តព្រះវិហារ នៅថ្ងៃទី១៩ ខែកម្ភៈ ឆ្នាំ ២០២១ បានថ្លែងថា ជនណាពាក់ព័ន្ធនឹងបទល្មើសគ្រឿងញៀនត្រូវទទួលខុសត្រូវចំពោះមុខច្បាប់ យ៉ាងធ្ងន់ធ្ងរបំផុត។
ឧត្ដមសេនីយ៍ទោ ស្នងការនគរបាលខេត្ត បានថ្លែងប្រកាសបែបនេះ បន្ទាប់ពីរក ឃេីញថ្នាំម្សៅស ចំនួន២០ដុំ ស្មេីនឹងទម្ងន់ចំនួន៧០១៨,៦ក្រាម ជាថ្នាំញៀនប្រភេទ ហេរ៉ូអ៉ីន ដែដែលមុខសញ្ញាសង្ស័យជួញដូរគ្រឿងញៀនយកទុកប្លុងចោលនៅក្នុងព្រៃ។
លោកថា នៅថ្ងៃទី០៤ ខែមករា ឆ្នាំ ២០២១វេលាម៉ោង ១ ១និង១៥នាទី កម្លាំងការិយាល័យប្រឆាំងបទល្មើសគ្រឿងញៀន សហការជាមួយកងកម្លាំងអន្តរាគមន៍ នៃស្នងការស្នងការដ្ឋាននគរបាលខេត្តនិងកងកម្លាំងអធិការដ្ឋាននគរបាលស្រុកឆែបចេញល្បាតតាមដងទន្លេរពៅ និងតាមដងទន្លេមេគង្គព្រំដែនកម្ពុជា-ទ្បាវ ជាពិសេសចំណុចសំខាន់ៗ ដល់ចំណុចព្រៃកប់ខ្មោចមាត់ច្រាំងទន្លេ ស្ថិតនៅភូមិកំពង់ក្រសាំង ឃុំកំពង់ស្រទ្បៅ២ ស្រុកឆែប បានប្រទះឃើញថង់ពណ៌ខ្មៅ រុំព័ទ្ធជុំវិញ សង្ស័យជាម្សៅពណ៌ស ប្រភេទហេរ៉ូអ៉ីន ដែលជនមិនស្គាល់អត្តសញ្ញាណ កប់ក្នុងដីក្របស្លឹកឈេី។
ករណីខាងលេីនេះ ក្រោមការដឹកនាំបញ្ជាផ្ទាល់ ពីលោក ឧត្ដមសេនីយ៍ទោសួស សុខដារ៉ា ស្នងការនគរបាលខេត្ត និងមានការសម្របសម្រួលដឹកនាំពីឯកឧត្តម ទី សុវិនថាល់ ព្រះរាជអាជ្ញាខេត្តព្រះវិហារ ឱ្យយកវត្ថុតាងមកវិភាគ និងថ្លឹងនៅស្នងការដ្ឋាន បញ្ជាក់ឃេីញថ្នាំម្សៅស ចំនួន២០ដុំ ស្មេីនឹងទម្ងន់ចំនួន៧០១៨,៦ក្រាម ពិតជាថ្នាំញៀនប្រភេទ ហេរ៉ូអ៉ីន ប្រាកដមែន និងមានវិធានការ ស្រាវជ្រាវរកមុខ សញ្ញាសង្ស័យក្នុងករណីនេះ មកផ្ដន្ទាទោសតាមច្បាប់៕ រក្សាសិទ្ធិដោយ៖បញ្ញាស័ក្តិ
