ភ្នំពេញ ៖ បុរសម្នាក់និងរួមដំណើរ២នាក់ទៀត បានបើករថយន្តក្នុងល្បឿនលឿន ខ្វះការប្រុងប្រយ័ត្នបានរេចង្កូតជ្រុលទៅបុកបង្គោលសំយ៉ាបផ្ទះប្រជាពលរដ្ធបាក់២ដើម រួចបន្តទៅបុករះម៉ូតូ៣គ្រឿងទៀត បណ្តាលឲ្យមានមនុស្សរងរបួសធ្ងន់ស្រាល៣នាក់ ចំណែកឯតៃកុងរថយន្តបង្កនិងអ្នករួមដំណើរជាមួយត្រូវសមត្ថកិច្ចឃាត់បាន។
ហេតុការណ៍គ្រោះថ្នាក់ចរាចរណ៍នេះដែរ បានកើតឡើងនៅវេលាម៉ោង៥ និង ៣០ នាទីល្ងាចថ្ងៃអាទិត្យទី ២១ ខែកុម្ភៈឆ្នាំ ២០២១ ស្ថិតនៅតាមបណ្តោយផ្លូវបេតុង ,ចំណុចក្នុងបុរីសែនមនោរម្យ ,ក្នុងសង្កាត់កន្ទោក ខណ្ឌកំបូល រាជធានីភ្នំពេញ។
ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគាត់បានឃើញរថយន្តម៉ាក TOYOTA មួយគ្រឿងពណ៌សពាក់ផ្លាកលេខភ្នំពេញ 2B-3079 បើកបរដោយបុរសម្នាក់រួមដំណើរពីរនាក់ទៀត ធ្វើដំណើរតាមបណ្តោយផ្លូវបេតុង ក្នុងទិសដៅពីលិចមកកើតក្នុងល្បឿនលឿនមិនប្រយ័ត្នខណៈមកដល់ចំណុចកើតហេតុ ស្រាប់តែរេចង្កូតទៅបុកនិងរបងសំយ៉ាបផ្ទះប្រជាពលរដ្ឋ បាក់អស់ពីរដើមរួចបន្តទៅបុករះម៉ូតូ៣គ្រឿងទៀត នៅខាងមុខបណ្ដាលឲ្យមានមនុស្សរងរបួសធ្ងន់ស្រាល៣នាក់ ដឹកយកទៅសង្គ្រោះបន្ទាន់ភ្លាមៗ។
ក្រោយពេលកើតហេតុសមត្ថកិច្ចមូលដ្ឋាន សហការជាមួយនឹងខាងជំនាញចរាចរណ៍ខណ្ឌកំបូល ចុះមកដល់រួចក៏បានទំនាក់ទំនងទៅខាងជំនាញចរាចរណ៍ក្រុង ឲ្យចុះមកវាស់វែងនិងធ្វើកំណត់ហេតុយកម៉ូតូ ៣គ្រឿងនិងរថយន្តមួយគ្រឿងទៀត ទៅរក្សាទុកនៅការរិយាល័យចរាចរណ៍ផ្លូវគោក រង់ចាំដោះស្រាយនៅពេលក្រោយ៕ រក្សាសិទ្ធិដោយ៖ សា មេត
