ដូចដែលប្រិយមិត្តបានដឹងរួចមកហើយ ចំពោះទង្វើដ៏គួរឲ្យគួរស្អប់ខ្ពើម របស់យុវជនមួយក្រុម ឬអាចហៅបានថា ក្រុមខ្ទើយបាតសង្គម បានធ្វើឲ្យមហាជនផ្ទុះកំហឹងយ៉ាងខ្លាំង ក្រោយពីពួកគេបានរាំចាក់ក្បាច់ឌីជេ ជាមួយបទចម្រៀងដ៏អសុរោះជេរទៅលើស្ត្រីកប់ៗមាត់។ តែយ៉ាងណាមិញ ខណៈក្រុមបាតផ្សារនេះពុំទាន់ត្រូវបានសមត្ថកិច្ចនាំខ្លួនមកមកដុះក្អែលនៅឡើយផងនោះ ក៏ស្រាប់តែលេចចេញបុរសម្នាក់ទៀត ឬហៅថាចាស់ឡប់គ្រឿង ចេញមកច្រៀងនៅលើ Tik Tok ជាមួយបទ Remix “ឆ្នាំថ្មី KD ឡើងថ្លៃ” ដែលធ្វើឲ្យប៉ះពាល់ដល់តម្លៃសេចក្តីថ្លៃថ្នូរសង្គមយ៉ាងខ្លាំង។
ក្រោយពីវីដេអូនេះ បានផ្ទុះឡើងជាមួយកំហឹងមហាជនយ៉ាងខ្លាំងក្លា នៅទីបំផុត បុរសរូបនេះក៏ត្រូវបានសមត្ថកិច្ចខេត្តកំពង់ស្ពឺធ្វើការស្រាវជ្រាវ និងឲ្យចូលខ្លួនមកសុំទោសជាសាធារណៈ។
នេះបើយោងតាមទំព័រហ្វេសប៊ុក ស្នងការនគរបាលខេត្តកំពង់ស្ពឺ បានឲ្យដឹងថា៖ «ក្រុមកាងារប្រតិកម្មរហ័ស នៃស្នងការដ្ឋាននគរបាលខេត្ដកំពង់ស្ពឺ ក្រោយពីទទួលបានការចង្អុលណែនាំពីលោកឧត្តមសេនីយ៍ទោ សម សាមួន ស្នងការនគរបាលខេត្ត ឱ្យស្រាវជ្រាវគណនី tik tok ឈ្មោះពូហុន ដែលបានច្រៀងចម្រៀង reb remix បទ”ឆ្នាំថ្មី ២០២១ KD ឡើងថ្លៃ” ធ្វើឱ្យប៉ះពាល់ ដល់កិត្តិយសសេចក្ដីថ្លៃថ្នូរសីលធម៌សង្គមរបស់ខ្មែរយើង ពិសេសធ្វើឱ្យមហាជនអ្នកនិយមបណ្ដាញសង្គមធ្វើការរិះគន់យ៉ាងខ្លាំង សំណូមពរស្នើសុំឱ្យសមត្ថកិច្ចចាត់វិធានការចំពោះបុគ្គលជាម្ចាស់គណនីតិកតុក ឈ្មោះពូហុន នេះទៅតាមច្បាប់។
នៅថៃ្ងទី២៣ ខែកុម្ភៈ ឆ្នាំ២០២១ សមត្ថកិច្ចស្នងការដ្ឋាននគរបាលខេត្តកំពង់ស្ពឺ បានចុះស្រាវជ្រាវនិងអញ្ជើញបុគ្គលឈ្មោះ ហួន ហុន ភេទប្រុស អាយុ៣៨ឆ្នាំ មុខរបរអ្នករត់តុនៅហាងBBQ សាច់អាំងមួយកន្លែងក្នុងក្រុងច្បារមន យកមកធ្វើការសាកសួរស្វែងរកប្រភពពិត បុគ្គលខាងលើបានទទួលស្គាល់សារភាពថាខ្លួនគឺជាម្ចាស់គណនី តិកតុក ឈ្មោះពូហុន ពិតជាបានធ្វើបទចម្រៀងដែលមានអត្ថន័យមិនសមរម្យនិងបានបង្ហោះទៅក្នុង បណ្ដាញ tik tok ចែកចាយជាសាធារណៈប្រាកដមែន។
ដោយសារតែកំហុសអចេតនាខ្វះការគិតគូរពិចារណាគ្រប់ជ្រុងជ្រោយការភ្លើតភ្លើនភ្លេចភ្លាំងមិនបានគិតពីតម្លៃនៃស្ដ្រីខ្មែរ ព្រោះតែចង់ល្បីនៅក្នុងបណ្ដាញសង្គមធ្វើឱ្យបុគ្គល ហួន ហុន បង្កើតនូវអំពើដែលសង្គម មហាជនមិនអាចទទួលយកបាន ដោយដឹងអំពីកំហុសបុគ្គល
ហួន ហុន បានសុំការអធ្យាស្រ័យលើកលែងទោស និងសុំទោសពីសំណាក់បងប្អូនប្រជាពលរដ្ឋនៅទូទាំងប្រទេស អ្នកនិយមបណ្ដាញសង្គមមេត្តាអត់ឱនយោគយល់កុំប្រកាន់ទោសចំពោះទង្វើអសីលធម៌នេះផង ជាថ្មីម្ដងទៀត សូមអាជ្ញាធរមានសមត្ថកិច្ចមេត្ដាផ្ដល់ឱកាសដើម្បីបានធ្វើការកែខ្លួនជាថ្មី ហើយសូមប្ដេជ្ញាថា ចាប់ពីថៃ្ងនេះទៅ ឈប់លេងបណ្ដាញសង្គមទៀតហើយ ..!»៕ រក្សាសិទ្ធិដោយ៖ លឹម ហុង