ខេត្តបាត់ដំបង ៖ សេចក្តីរាយការណ៍បានបញ្ជាក់ថា ការបញ្ជូនខ្លួនមេខ្យល់៣៩នាក់ទៅកាន់តុលាការធ្វើឡើងដោយសមត្ថកិច្ចនិង អាជ្ញាធរស្រុកជាប់ព្រំដែនខេត្តបាត់ដំបង បានឃាត់ខ្លួន និងបានបញ្ជូនក្រុមមេខ្សល់ទៅតុលាការ ដើម្បីចាត់ការតាមនីតិវិធីច្បាប់ ក្នុងអំឡុងនៃវិបត្តិជំងឺកូវីដ១៩ រហូតមកដល់ថ្ងៃ២៤កុម្ភៈឆ្នាំ២០២១ នេះ។
យោងតាមលោកស្រី រស់ ជីវី ស្នងការរងខេត្តបាត់ដំបង ទទួលបន្ទុកការជួញដូរមនុស្ស និងការពារអនីតិជន បានប្រាប់សារព័ត៌មានឲ្យដឹងថា ពួកមេខ្យល់ទាំងអស់នោះ ភាគច្រើនត្រូវបានសមត្ថកិច្ចឃាត់ខ្លួនបាន នៅពេលនាំពលករលួចឆ្លងដែនខុសច្បាប់ តាមបន្ទាត់ព្រំដែនជាក់ស្ដែង និងកំពុងបន្តស្វែងរកពួកមេខ្យល់មួយចំនួនទៀត ។
លោកស្រីស្នងការរងបានលើកឡើងទៀតថា ការកំណត់មុខសញ្ញា និងចាប់ខ្លួនពួកមេខ្យល់ទាំងនោះ មានផលលំបាកមួយចំនួន ព្រោះពួកនោះមានការបំលាស់ទីមិនច្បាស់លាស់ ខណៈការចាប់ខ្លួនពួកគេ តាមរយៈនគរបាលវរៈការពារព្រំដែន កងទ័ព និងកម្លាំងកងរាជអាវុធហត្ថជាដើម ។
សូមជម្រាបថាផ្នែកតាមរបាយការណ៍រដ្ឋបាលខេត្តបាត់ដំបង បានដែលបានផ្សព្វផ្សាយនៅថ្ងៃទី២៣ ខែកុម្ភៈ ឆ្នាំ២០២១ មានពលករឆ្លងដែនមកពីប្រទេសថៃ តាមច្រកព្រំដែននានា ជាប់ខេត្តបាត់ដំបង មានចំនួន ២២៣នាក់ និងចាប់ពីមានការឆ្លងរីករាលដាលក្នុងសហគមន៍ នៃជំងឺកូវីដ១៩ នៅខេត្តសាមុទសាខន មានជិត ៩០០០នាក់ បានបញ្ចប់ចត្តាឡីស័ក និងអនុញ្ញាតឱ្យត្រឡប់ទៅផ្ទះវិញជាង៤៧០០នាក់ ហើយអាជ្ញាធរខេត្ត នឹងរៀបចំមណ្ឌលចត្តាឡីស័ក ២បន្ថែម និងពង្រីកការបោះតង់ ឬធ្វើរោងនៅតាមមណ្ឌលមួយចំនួននៅតាមស្រុកជាប់ព្រំដែន ខណៈកំណើនពលករកាន់តែច្រើនឆ្លងដែនមកពីថៃ ៕ រក្សាសិទ្ធិដោយ៖CEN
