ឯកអគ្គរដ្ឋទូតស្តីទីអាមេរិចប្រចាំទីក្រុងសេអ៊ូល បាននិយាយនៅថ្ងៃពុធនេះថា សហរដ្ឋអាមេរិចមិនចង់ចរចារជាមួយកូរ៉េខាងជើងឡើង ប្រសិនជាកូរ៉េខាងជើងចង់ប្រើប្រាស់អាមេរិច ជាមធ្យោបាយពន្យាពេល ដើម្បីអភិវឌ្ឍន៏កម្មវិធីនុយក្លេអ៊ែរ និងមីស៊ីលរបស់ពួកគេ។
លោក Marc Knapper ឯកអគ្គរដ្ឋទូតស្តីទីអាមេរិច និយាយនៅក្នុងកិច្ចប្រជុំជាមួយអ្នកសារព័ត៌មានដូច្នេះថា កូរ៉េខាងជើងគួរតែបង្ហាញឆន្ទះប្រើប្រាស់ឱកាសសំរាប់ធ្វើឲ្យមានកិច្ចចរចារ ដើម្បីវិវត្តន៏ទៅការលុបបំបាត់នុយក្លេអ៊ែររបស់ខ្លួន។
ការថ្លែងរបស់លោក ធ្វើឡើងក្នុងពេលដែលកូរ៉េខាងជើងបានថ្លែងកាលពីពេលថ្មីៗនេះថា ខ្លួនមានឆន្ទៈចរចារជាមួយអាមេរិច។
ជុំវិញការសំដែងឆន្ទៈរបស់កូរ៉េខាងជើងនេះ ក្រសួងការបរទេសអាមេរិចកាលពីខាងដើមបាននិយាយថា ខ្លួននឹងចរចារជាមួយកូរ៉េខាងជើង ក្នុងករណីដែលរបបនេះត្រៀមខ្លួនរួចរាល់ក្នុងការចរចារពីការលុបបំបាត់នុយក្លេអ៊ែរប៉ុណ្ណោះ៕ សុភ័ក្ត្រ
