ភ្នំពេញៈ មេខ្យល់ដែលនាំមនុស្សឆ្លងកាត់ព្រំដែនខុសច្បាប់ គឺព្រំដែនកម្ពុជា-ថៃ-វៀតណាម ត្រូវបានសមត្ថកិច្ចចាប់ឃាត់ខ្លួនចំនួន ៨៩នាក់ និងពលករគេចធ្វើចត្តាឡីស័កចំនួន ២០២នាក់ គិតចាប់ពីថ្ងៃទី១៣-២៣ ខែកុម្ភៈ ឆ្នាំ២០២១។ នេះបើតាមការបញ្ជាក់របស់មន្ត្រីជាន់ខ្ពស់អគ្គស្នងការដ្ឋាននគរបាលជាតិប្រាប់ CEN នៅថ្ងៃទី២៥ ខែកម្ភៈ ឆ្នាំ២០២១។
មន្ត្រីជាន់ខ្ពស់អគ្គស្នងការដ្ឋាននគរបាលជាតិបានបញ្ជាក់ថា មេខ្យល់នាំប្រជាពលរដ្ឋឆ្លងដែនខុសច្បាប់ ដែលសមត្ថកិច្ចចាប់ខ្លួនមានដូចជាៈ ខេត្តបន្ទាយមានជ័យ បាត់ដំបង ឧត្តរមានជ័យ ប៉ៃលិន កំពត ស្វាយរៀង តាកែវ និងខេត្តកោះកុង។ មេខ្យល់បានប្រើល្បិចថ្មីដោយនាំមនុស្សឆ្លងដែនខុសច្បាប់ប្រើរូបភាពបន្លំភ្នែកសមត្ថកិច្ច ដោយបានដាក់បង្កប់មនុស្សនៅក្នុងរថយន្តដឹកផ្លែឈើ…។
មន្ត្រីដដែលបានបន្តថា ការស្វែងរក និងទប់ស្កាត់ពលករគេចវេសពីចត្តាឡីស័ក គឺគិតចាប់ពីថ្ងៃទី១៣-២៣ ខែកុម្ភៈ ឆ្នាំ២០២១ មានចំនួន ២០២នាក់ ក្នុងនោះស្រី ៨៦នាក់ និងបានបញ្ជូនទៅមណ្ឌលធ្វើចត្តាឡីស័ក។
ពលករដែលគេចវេសពីការធ្វើចត្តាឡីស័កមានដូចជាៈ ខេត្តបន្ទាយមានជ័យ ឧត្តរមានជ័យ ប៉ៃលិន បាត់ដំបង តាកែវ កំពត ស្វាយរៀង ព្រៃវែង និងខេត្តសៀមរាប …។
សូមជម្រាបថា កម្លាំងសមត្ថកិច្ចពាក់ព័ន្ធនៅខេត្តជាប់ព្រំដែនថៃ និងវៀតណាម បានខិតខំធ្វើការទប់ស្កាត់ពលករឆ្លងដែននខុសច្បាប់ និងស្រាវជ្រាវរកមេខ្យល់ដើម្បីនាំយកមកផ្តន្ទាទោសតាមច្បាប់៕ រក្សាសិទ្ធិដោយៈ ចេស្តារ
