ភ្នំពេញៈ នៅទីបំផុតតុលាការបានសម្រេចឃុំខ្លួនផ្កាយបីយោធា និងបក្ខពួកចំនួន ៣នាក់ ដាក់ពន្ធនាគារពាក់ព័ន្ធករណីក្លែងលិខិត ក្លែងហត្ថលេខា និងត្រារបស់សម្តេចនាយករដ្ឋមន្ត្រី ដើម្បីធ្វើលិខិត ស.ជ.ណ ពាក់ព័ន្ធដីទំហំ ៨.៦០ហិកតា ដែលមានទីតាំងស្ថិតនៅភូមិស្លែងដីដុះ ឃុំព្រែកតាទែន ស្រុកពញាឮ ខេត្តកណ្តាល ក្នុងតម្លៃ ១លាន ៥សែនដុល្លារ។
ផ្កាយបីយោធា និងបក្ខពួកចំនួន ៣នាក់ ត្រូវបានសមត្ថកិច្ចនៃស្នងការដ្ឋាននគរបាលខេត្តកណ្តាលចាប់ខ្លួនកាលពីថ្ងៃទី២៣-២៦ ខែកុម្ភៈ ឆ្នាំ២០២១ និងបានបញ្ជូនទៅសាលាដំបូងខេត្តកណ្តាលនៅថ្ងៃទី២៧ ខែកុម្ភៈ នេះ។
វត្ថុតាងដកហូតរួមមាន : អាវយោធាដៃខ្លី ដែលមានផ្លាកឈ្មោះ ឧ.យ៉ាន់ ចំណាប់ និងឋានន្តរស័ក្តិផ្កាយ៣ ០១គូរ។ទូរសព្ទដៃ ០៧គ្រឿង រថយន្ត ០៤គ្រឿង (Land Cruiser ០១គ្រឿង Lexus 330 ០២គ្រឿង និងMercedes ០១គ្រឿង) អាវុធខ្លី ០១ដើម និងឯកសារវត្ថុតាងមួយចំនួន។
លោករស់ ផុនចាន់និមល ចៅក្រមស៊ើបសួរសាលាដំបូងខេត្តកណ្តាល សម្រេចឃុំខ្លួនជនជាប់ចោទទាំង ៤នាក់ដាក់ពន្ធនាគារជាបណ្តោះអាសន្ននៅថ្ងៃទី២៧ ខែកុម្ភៈ ឆ្នាំ២០២១នេះ។ ដោយក្នុងនោះ ឈ្មោះ យ៉ាន់ ចំណាប់ ត្រូវបានដាក់ឲ្យស្ថិតនៅក្រោមការពិនិត្យពីបទបន្លំឯកសារសាធារណៈ ប្រើប្រាស់ឯកសារសាធារណៈក្លែង (ក្លែងលិខិត ក្លែងហត្ថលេខា និងត្រារបស់សម្តេចនាយករដ្ឋមន្ត្រី) ប្រើប្រាស់នូវឯកសណ្ឋានជាអាទិ៍ ដែលមានភាពប្រហាក់ប្រហែលនិងយោធា និងកាន់កាប់អាវុធដោយគ្មានការអនុញ្ញាត។
ឈ្មោះ សួន ផល្លី , ឈ្មោះ យ៉ែម សារឿន ត្រូវបានដាក់ឲ្យស្ថិតនៅក្រោមការពិនិត្យពីបទប្រើប្រាស់ឯកសារសាធារណៈក្លែង។
ឈ្មោះ មាស ភូរិន្ទ ត្រូវបានដាក់ឲ្យស្ថិតនៅក្រោមការពិនិត្យពីបទសមគំនិតក្នុងអំពើប្រើប្រាស់ឯកសារសាធារណៈក្លែង។
តាមចម្លើយសារភាពរបស់ឈ្មោះ យ៉ែម សារឿន ក្នុងនាមខ្លួនជាតំណាងប្រជាពលរដ្ឋ៣១គ្រួសារនៅភូមិស្លែងដីដុះ ឃុំព្រែកតាទែន ស្រុកពញាឮ ខេត្តកណ្តាល បានផ្តិតមេដៃស្នើសុំកាត់ដីបឹងចំណុចបឹងកញ្ច្រាំ ចំនួន ៨.៦០ហិចតា ពេលនោះនៅក្នុងឆ្នាំ២០១៧ ខ្លួនបានពឹងពាក់ឈ្មោះ ហម សន្ធិ ឱ្យជួយរត់ការសុំស.ជ.ណ ពីរាជរដ្ឋាភិបាល និងក្រសួងធនធានទឹកដើម្បីកាត់ដីនេះ ប៉ុន្តែមិនបានសម្រេច។ បន្ទាប់មកនៅឆ្នាំ២០១៩ឈ្មោះ យ៉ែម សារឿន បានពឹងឈ្មោះឡុង សុខ ឱ្យជួយរត់ការម្តងទៀត ប៉ុន្តែមិនបានសម្រេច រហូតមកដល់ឆ្នាំ២០២០ ឈ្មោះ យ៉ែម សារឿន បានពឹងឈ្មោះ សួន ផល្លី ដើម្បីរត់ការសុំ ស.ជ.ណ និងកាត់ដីពីក្រសួងធនធានទឹកនៅចំណុចខាងលើ ដោយ មានធ្វើកិច្ចសន្យាព្រមព្រៀងគ្នាលើតម្លៃ និងមានរយៈពេលកំណត់។ លុះមកដល់ថ្ងៃទី២៨.០១.២០២១ ឈ្មោះ សួន ផល្លី បានផ្ញើលិខិតបង្គាប់ការ លេខ៣៨ អអរ/២១ តាមរយៈប្រព័ន្ធ Telegram មកឱ្យឈ្មោះ យ៉ែម សារឿន។
បន្ទាប់ពីទទួលបានលិខិតបង្គាប់ការនេះហើយ ឈ្មោះ យ៉ែម សារឿន បានថតចម្លងឯកសារនេះចេញជាច្រើនសន្លឹក និងបានឱ្យឈ្មោះម៉េង ទៅសួរមេឃុំព្រែកតាទែន ដើម្បីស្នើសុំការចុះវាស់វែង។
-តាមចម្លើយសារភាពរបស់ ឈ្មោះ សួន ផល្លី បានឱ្យដឹងថាខ្លួនបានទទួលការពឹងពាក់ពីឈ្មោះ យ៉ែម សារឿន ដើម្បីរត់ការកាត់ដីបឹងកញ្ច្រាំ នៅចំណុច ភូមិស្លែងដីដុះ ឃុំព្រែកតាទែន ស្រុកពញាឮ ខេត្តកណ្តាល ដែលមានទំហំ ៨.៦០ហិចតាដើម្បីស្នើសុំ ស.ជ.ណ ពីរាជរដ្ឋាភិបាល និងធ្វើប័ណ្ណកម្មសិទ្ធិដីធ្លី ទីតាំងខាងលើចែកជូនប្រជាពលរដ្ឋចំនួន៣១គ្រួសារ។ ដោយធ្វើការព្រមព្រៀងក្នុងតម្លៃ១.៥០០.០០០$ (មួយលានហាសិបម៉ឺនដុល្លារអាមេរិក) បន្ទាប់ពីធ្វើកិច្ចព្រមព្រៀងស្តីពីការផ្តល់សេវាកម្មធ្វើប័ណ្ណកម្មសិទ្ធិដីរួចមកខ្លួន បានពឹងពាក់ឱ្យឈ្មោះ យ៉ាន់ ចំណាប់ ជាអ្នកធ្វើលិខិតបង្គាប់ការពីរាជរដ្ឋាភិបាល លុះមកដល់ថ្ងៃទី២៨.០១.២០២១ ឈ្មោះ យ៉ាន់ ចំណាប់បានផ្ញើឯកសារលិខិតបង្គាប់ការតាម Messenger មកឱ្យខ្លួនពិនិត្យមើលខ្លឹមសារ ពេលនោះខ្លួនថាអាចទទួលយកបានហើយ ក៏ឱ្យ យ៉ាន់ ចំណាប់ រៀបចំចុះហត្ថលេខា យកមក។ នៅថ្ងៃទី០៤.០២.២០២១វេលាម៉ោង៨ ឈ្មោះយ៉ាន់ ចំណាប់ បានមកជួបខ្លួនដោយយកលិខិតបង្គាប់ការថតចម្លងដែលមានលេខ ៣៨ អអរ/២១ ចុះថ្ងៃទី២៨.០១.២០២១។ បន្ទាប់ពីទទួលបានដីកាបង្គាប់នេះភ្លាមខ្លួនក៏បាន ហៅឈ្មោះយ៉ែម សារឿន ឱ្យមកយកដីកាបង្គាប់ការនេះ និងបានទទួលប្រាក់ចំនួន ២១.០០០$ (ពីរម៉ឺនមួយពាន់ដុល្លារ) ពីឈ្មោះយ៉ែម សារឿន។
តាមចម្លើយរបស់ មាស ភូរិន្ទ ដែលត្រូវជាកូនចៅរបស់ឈ្មោះ សួន ផល្លី បានឱ្យដឹងថា ឈ្មោះ សួន ផល្លី មានទំនាក់ទំនងជាមួយ ឈ្មោះ យ៉ាន់ ចំណាប់ និងពាក់ព័ន្ធ រឿងរត់ការ លិខិតបង្គាប់ការនេះពិតប្រាកដមែន។ នៅថ្ងៃទី២៧.០១.២០២០ វេលាម៉ោង១៧ ឈ្មោះ យ៉ាន់ ចំណាប់បានថតរូបឯកសារ ផ្ញើមកឱ្យឈ្មោះ សួន ផល្លី ហើយឈ្មោះ សួន ផល្លី បានប្រើខ្លួនឱ្យជួយអានខ្លឹមសារឯកសារនោះ បន្ទាប់មកឈ្មោះ សួន ផល្លី បានឱ្យខ្លួនផ្ញើប្រាក់ទៅឱ្យ ឈ្មោះ យ៉ាន់ ចំណាប់ ជាច្រើនដង ក្នុងមួយដងចន្លោះពី ៣០០$ទៅ ៥០០$ ហើយឈ្មោះ សួន ផល្លី បានឱ្យខ្លួនបើកឡានជូនគាត់ទៅជួបឈ្មោះ យ៉ាន់ ចំណាប់ និងបានប្រគល់ប្រាក់ជាច្រើន នៅហាងកាហ្វេPN ម្តុំផ្សារទំនើបអ៊ីអន២។
តាមចម្លើយសារភាពរបស់ ឈ្មោះ យ៉ាន់ ចំណាប់ បានឱ្យដឹងថានៅថ្ងៃទី២០.០១.២០២១ ខ្លួនបានទទួលការពឹងពាក់ពីឈ្មោះ សួន ផល្លី រត់ការរឿងដីធ្លីរបស់ប្រជាជន៣១គ្រួសារដែលស្ថិតនៅចំណុច បឹងកញ្ច្រាំ ទំហំ ៨.៦០ហិចតា នៅភូមិស្លែដីដុះ ឃុំព្រែកតាទែន ស្រុកពញាឮ ខេត្តកណ្តាល ដើម្បីធ្វើ ស.ជ.ណ របស់រាជរដ្ឋាភិបាល ដោយឈ្មោះ សួន ផល្លី សន្យាថានឹងឱ្យប្រាក់ទៅខ្លួន៥០.០០០$ ក្រោយពីធ្វើបានសម្រេច តែខ្លួនបានទារលុយមុនចំនួន១០.០០០$ ។ ដល់ថ្ងៃទី២៧.០១.២០២១ វេលាម៉ោង១០ព្រឹក ឈ្មោះ សួន ផល្លីបាន ទូរស័ព្ទណាត់ខ្លួនទៅជួបនៅហាងកាហ្វេដដែលនឹងបានប្រគល់ប្រាក់ចំនួន ១០.០០០$ ទៅឱ្យខ្លួនដើម្បីរត់ការ បន្ទាប់មកខ្លួនក៏បាន ទៅជួបអ្នកកាត់តឯកសារ ដែលស្គាល់គ្នានៅហាងកាហ្វេមួយកន្លែង ដើម្បីឲ្យកាត់តឯកសារធ្វើ ស.ជ.ណ ដោយព្រមព្រៀងគ្នាក្នុងតម្លៃ១០០$ (ទាក់ទងគ្នាតាម Telegram) ដល់ថ្ងៃទី ២៨.០១.២០២១ វេលាម៉ោង១១ អ្នកកាត់តបានផ្ញើរូបភាព លិខិតបង្គាប់ការ គ្មានលេខ គ្មានត្រា គ្មានហត្ថលេខា មកឱ្យខ្លួនតាម Telegram ខ្លួនក៏ផ្ញើបន្តទៅឱ្យឈ្មោះ សួន ផល្លីមើល។ ក្រោយពីព្រមព្រៀងគ្នាលើខ្លឹមសារហើយ ខ្លួនក៏បានឱ្យអ្នកកាត់ត នោះធ្វើលិខិតបង្គាប់ការដោយមានលេខ ឈ្មោះ ត្រា និងហត្ថលេខា របស់សម្តេចតេជោ ហ៊ុន សែន ដែលចុះថ្ងៃទី២៨.០១.២០២១។ ក្រោយមកទៀតខ្លួនបានថតចម្លងលិខិតនេះ ហើយណាត់ជួបឈ្មោះ សួន ផល្លី ដើម្បីប្រគល់លិខិតនេះឱ្យទៅគាត់ និងទទួលបានប្រាក់កក់ ពីឈ្មោះ សួន ផល្លី ១០.០០០$ទៀត ។
រយៈពេលប្រហែលមួយសប្តាហ៍ក្រោយមក ឈ្មោះ សួន ផល្លី បានទាក់ទងសួរអំពីលិខិតច្បាប់ដើម ខ្លួនក៏បានកុហកឈ្មោះ សួន ផល្លី ថា ម្តងថ្ងៃនេះ ម្តងថ្ងៃនោះ មិនបានប្រគល់ច្បាប់ដើមឲ្យទេ ។
យោងតាមឯកសារប្រមែប្រមូល អាចសន្និដ្ឋានបានថា ៖ ឈ្មោះ យ៉ាន់ ចំណាប់ ពិតជាបានធ្វើលិខិតបង្គាប់ការ លេខ ០៣៨ អអរ/២១ ចុះថ្ងៃទី២៦.០១.២០២១ ចុះហត្ថលេខាដោយ សម្តេចតេជោ នាយករដ្ឋមន្ត្រី (ឯកសារក្លែងក្លាយ) និង បានយកលិខិតបង្គាប់ការនេះទៅឲ្យឈ្មោះ សួន ផល្លី ប្រើប្រាស់កាលពីថ្ងៃទី២៨.០១.២០២១ ពិតប្រាកដមែន។ ចំណែកឈ្មោះសួន ផល្លី ក៏បានយកលិខិតបង្គាប់ការនេះដដែលទៅឲ្យឈ្មោះ យ៉ែម សារឿន ប្រើប្រាស់ពិតប្រាកដមែន។
ឯឈ្មោះយ៉ែម សារឿន បានយកលិខិតនេះទៅឲ្យឈ្មោះម៉េង ដើម្បីយកទៅសួរ ស្មៀន ឃុំព្រែកតាទែន ស្រុកពញាឮ ខេត្តកណ្តាល ដើម្បីដាក់ឲ្យអនុវត្ត ។ ការធ្វើលិខិតបង្គាប់ការនេះជាថ្នូរនឹងការផ្តល់ប្រាក់ត្រឡប់មកវិញឈ្មោះយ៉ែម សារឿន ផ្តល់ប្រាក់ ចំនួន២១.០០០$ (ពីរម៉ឺនមួយពាន់ដុល្លារ) ទៅឲ្យឈ្មោះសួន ផល្លី ហើយឈ្មោះសួន ផល្លី បានយកប្រាក់ ចំនួន២០.០០០$ (ពីរម៉ឺនដុល្លារ)ឲ្យទៅឈ្មោះ យ៉ាន់ ចំណាប់ កាលពីថ្ងៃទី១៨.០១.២០២១ វេលម៉ោង ១៣:០០នាទី ។ បើតាមកិច្ចសន្យាធ្វើឡើងរវាងឈ្មោះយ៉ែម សារឿន និងឈ្មោះសួន ផល្លី នៅពេលណាដែលឈ្មោះសួន ផល្លី រត់ការបានសម្រេច លើការស្នើរសុំ ស.ជ.ណ ពីរាជរដ្ឋាភិបាល និងធ្វើប័ណ្ណកម្មសិទ្ធិ នៃដីទំហំប្រហែល៨.៦០ហិចតា ដែលមានទីតាំងស្ថិតនៅ ភូមិស្លែងដីដុះ ឃុំព្រែកតាទែន ស្រុកពញាឮ ខេត្តកណ្តាល គឺតម្រូវឲ្យឈ្មោះយ៉ែម សារឿន ផ្តល់ប្រាក់ចំនួន ១.៥០០.០០០$ (មួយលានហាសិបម៉ឺនដុល្លារ) ទៅឲ្យឈ្មោះសួន ផល្លី៕ រក្សាសិទ្ធិដោយៈ ចេស្តារ
